P148 Bilyon sa 2020 national budget, di pa nagagamit

ni Thea Janica Teh | December 16, 2020

Inaprubahan ng House of Representatives ngayong Miyerkules ang pagpapalawig ng validity ng 2020 national budget at Bayanihan to Recover as One Act (Bayanihan 2) hanggang sa susunod na taon.

Sa plenary session, sumang-ayon ang mga mambabatas sa pagbabago ng Senado sa House Bill 6656 na palawigin ang validity ng national budget hanggang Disyembre 31, 2021.

Kaya naman, inaprubahan din ng mga ito ang House Bill 8063 na naglalayong magamit ang budget ng Bayanihan 2 hanggang June 30, 2021.

Nitong Disyembre 14, sinabihan ni Pangulong Rodrigo Duterte ang mga mambabatas na ayusin na ang pagpapalawig ng validity upang masiguro na hindi maaantala ang mga proyekto sa pagpuksa sa COVID-19.

Kung hindi man ito naaprubahan, ang natirang budget ay mapupunta na sa National Treasure.

Samantala, as of November 30, nasa P110 bilyon pa sa ilalim ng 2020 budget ang hindi pa nagagamit at P38 bilyon naman sa ilalim ng Bayanihan 2, ayon kay Sen. Sonny Angara.

Davao, Cotabato at NCR, out sa dry run ng face-to-face classes

ni Thea Janica Teh | December 16, 2020

Hindi sasali sa pilot implementation ng face-to-face classes sa Enero ang Davao City at Cotabato, ayon sa Department of Education (DepEd) ngayong Miyerkules.

Ayon sa Coordinating Council of Private Educational Associations (COCOPEA), hindi pa handa ang mga eskuwelahan sa bansa na magsagawa ng face-to-face class ngayong school year.

Nauna na ring nagsabi ang Metro Manila council na hindi sasali ang National Capital Region sa dry run ng face-to-face classes sa January.

Ibinahagi ni COCOPEA Managing Director Joseph Noel Estrada na hindi pa umano kumokonsulta sa kanila ang DepEd patungkol sa pagbabalik ng face-to-face classes sa ibang lugar.

Dagdag pa ni Estrada, huli na para pag-usapan ang face-to-face classes dahil dapat ay isinagawa ito bago pa magsimula ang school year.

Hindi na umano nakapagplano at nakapaghanda ng budget ang mga paaralan para rito.

Samantala, tinatayang nasa 1,000 paaralan sa buong Pilipinas ang hinirang ng DepEd sa pagsali sa implementasyon ng face-to-face classes sa susunod na taon.

Ang dry run ay gagawin sa mga lugar na may mababang kaso ng COVID-19.

Noong Mayo, matatandaang hindi pinayagan ng pamahalaan ang pagsasagawa ng face-to-face classes hangga’t wala pang COVID-19 vaccine.

Paglobo ng Covid-19, inaasahan sa Pasko at New Year

ni Thea Janica Teh | December 15, 2020

Handa na ang mga pribadong ospital sa posibilidad na pagtaas ng kaso ng COVID-19 sa darating na holiday, ayon sa mga opisyal nito ngayong Martes.

Ayon sa OCTA Research Group, maaaring matapos ang taong 2020 sa 480,000 kaso ng COVID-19 sa Pilipinas. Kaya naman, pinaalalahanan nito ang publiko na panatilihin ang pagsunod sa mga health protocols tulad ng pagsusuot ng face mask at face shield, social distancing at pag-iwas sa mass gathering.

Ibinahagi ng Members of the Private Hospitals Association of the Philippines, Inc. na bumaba ang bilang ng naa-admit sa ospital dahil sa COVID-19 nitong nakaraang linggo, ngunit naghahanda na rin umano ang mga ito sa posibilidad na muling paglobo ng kaso ng tatamaan ng virus.

Sa katunayan, ayon kay Members of the Private Hospitals Association of the Philippines, Inc. President Jose Rene de Grano, nagbigay ito ng mandato na nakalaan ang 20% ng allocation ng beds para lamang sa mga pasyenteng may COVID-19.

Dagdag pa nito, nakahiwalay ang COVID areas sa non-COVID areas. Aniya, mas safe pa umano ang ospital kaysa sa mga pasyalan tulad ng mga malls dahil istriktong sinusunod ng mga staff ang health protocols.

Samantala, pinaalalahanan naman ng vice-president ng Philippine College of Physicians na si Dr. Maricar Limpin ang publiko na huwag nang magdiwang ng holiday sa labas ng bahay upang maiwasang mahawa ng virus.

Aniya, "Gusto sana naming paalalahanan ang lahat na kaya nating mag-celebrate at gawing masaya ang Kapaskuhang ito but at the same time, panatilihin nating ligtas ang bawat isa."