Sikat na vlogger na si Viy Cortez, nakunan

ni Thea Janica Teh | December 19, 2020

Malungkot na inanunsiyo ng vlogger na si Viy Cortez sa kanyang latest vlog na siya ay nakunan sa baby nito kay Cong TV na isa ring vlogger.

Sa video na may title na “Blessing”, ikinuwento nito na noong Disyembre 12 lang nila nalaman ni Cong na siya ay buntis.

Aniya, “Sobrang saya niya na nalaman niya na buntis ako. Tapos nagpa-check-up kami, nalaman ko na six weeks pregnant na ako nu'ng December 12."

Ipinamalita na rin ng dalawa ang unexpected blessing na ito sa kanilang pamilya at sa grupo nilang Team Payaman.

Sa sobrang saya umano nila ni Cong ay nagsimula na itong magplano para sa kanilang baby.

Ngunit, nitong Disyembre 18, sa kanilang monthsary, dinugo umano si Viy at nakunan.

"Kahapon, nakunan ako. At ngayong araw, na-confirm na wala na talaga. Nakunan pala talaga ako kahapon nu'ng dinugo ako."

Hindi napigilan ni Viy na maiyak sa kanyang pagkukuwento. Ginawa niya rin umano ang video na ito upang maalala ang kanilang baby kahit sa saglit na panahon lamang.

"Sobrang saglit lang, pero sa saglit na 'yun, sobrang dami naming plano ni Cong. Gusto kong makilala n'yo siya kahit ganu'n kasaglit."

Dagdag pa ni Viy, nag-aalala umano sa kanya si Cong ngunit, sinabi nito na nasa recovery stage na siya.

"Dumating siya, blessing siya ni Lord, pero siguro, ganu'n talaga. Baka hindi pa tamang oras, baka may tamang oras. Darating din 'yung tamang oras."

Nakilala si Viy Cortez at Cong TV sa kanilang nakakatuwang mga vlogs kasama ang Team Payaman at sa mga business nito tulad ng Cong clothing, VIY line cosmetics at marami pang iba.

2 patay sa sunog sa QC

ni Thea Janica Teh | December 19, 2020

Patay ang dalawang katao kabilang ang isang person with disability (PWD) matapos masunog ang tinitirhan nitong lumang residential building sa Barangay Pagasa, Quezon City nitong Biyernes nang gabi.

Napag-alamang magkapatid ang mga biktima na kinilalang sina Juanita Ramo, 58-anyos at Silvestre Ramo, 63-anyos na naka-wheelchair.

Ayon kay Bureau of Fire Protection Quezon City District Director Senior Superintendent Joe Bangyod, nagsimula ang sunog sa ikaapat na palapag. Namatay umano ang magkapatid sa suffocation dahil ang unit nito ay nasa ikalimang palapag kung saan umaakyat ang usok.

Dagdag pa ni Bangyod, nakita nilang maraming nakatambak na papel at gulong sa pinagmulan ng sunog na dahilan umano ng paglaki nito.

Nakita rin ng isang residente na sa unit na ‘yun ay nasusunog ang aircon. Kaya naman isa ito sa tinitingnang dahilan ng sunog ng mga bumbero.

Umabot sa ikalawang alarma ang sunog na tumagal nang halos isang oras. Apektado sa sunog ang 8 pamilyang nakatira sa nasabing gusali.

Samantala, tinatayang nasa P150,000 ang halaga ng istrakturang napinsala sa sunog.

Bagyong Vicky, hanggang sa Linggo pa

ni Thea Janica Teh | December 19, 2020

Magdadala ng malakas na pag-ulan ang Bagyong Vicky sa bansa ngayong weekend habang patuloy nitong binabaybay ang Sulu Sea kasabay ng Tail-End ng Frontal System, ayon sa 5 am Severe Weather Bulletin ng PAGASA ngayong Sabado nang umaga.

Makararanas ng malakas na pag-ulan ang CALABARZON, Bicol Region, Visayas, Aurora, Dinagat Islands, Surigao del Norte, Surigao del Sur, Agusan del Norte, Camiguin, Misamis Oriental, Oriental Mindoro, Marinduque at iba pang parte ng northern at central portion ng Palawan kabilang ang Calamian, Cuyo at Cagayancillo Island.

Mahina hanggang malakas na pag-ulan naman ang mararanasan sa Cagayan Valley, Apayao, Kalinga, Mountain Province, Ifugao, Metro Manila at natitirang bahagi ng Central Luzon, MIMAROPA at Cordillera Administrative Region dahil naman sa northern monsoon o hanging amihan.

Namataan kaninang 4 am ang sentro ng Bagyong Vicky sa 150 kilometers west ng Dipolog City, Zamboanga del Norte na may maximum sustained wind na 45 kilometers per hour (kph) at may bugso ng hangin nang hanggang 55 kph papuntang westward sa 25 kph.

Samantala, nasa Tropical Cyclone Wind Signal (TCWS) No. 1 pa rin ang ilang lugar sa bansa kabilang ang mga sumusunod: Luzon -Northern at central portions ng Palawan (Araceli, Dumaran, Taytay, El Nido, San Vicente, Roxas, Puerto Princesa City, Aborlan, Narra, Quezon) kasama ang Calamian, Cuyo, Cagayancillo at Kalayaan Islands Visayas -Southern portion ng Cebu (Pinamungahan, San Fernando, Carcar, Aloguinsan, Barili, Sibonga, Dumanjug, Ronda, Alcantara, Argao, Moalboal, Badian, Dalaguete, Alegria, Alcoy, Malabuyoc, Boljoon, Ginatilan, Oslob, Samboan, Santander) -Western portion ng Bohol (Loon, Tagbilaran City, Dauis, Panglao, Cortes, Maribojoc) -Siquijor -Negros Oriental -Central at southern portions ng Negros Occidental (San Carlos City, Salvador Benedicto, Talisay City, Bacolod City, Murcia, Bago City, Pulupandan, Valladolid, San Enrique, La Carlota City, La Castellana, Moises Padilla, Pontevedra, Hinigaran, Isabela, Binalbagan, Himamaylan City, Ilog, Kabankalan City, Cauayan, Candoni, Sipalay City, Hinoba-An) -Guimaras -Southern portion ng Iloilo (Barotac Nuevo, Dingle, Anilao, Duenas, Lambunao, Dumangas, Pototan, Zarraga, Mina, Badiangan, Janiuay, Maasin, Cabatuan, New Lucena, Santa Barbara, Leganes, Iloilo City, Pavia, Alimodian, San Miguel, Oton, Leon, Tubungan, Igbaras, Guimbal, Tigbauan, Miagao, San Joaquin) -Southern portion ng Antique (Bugasong, Laua-An, Valderrama, San Remigio, Patnongon, Belison, Sibalom, San Jose, Hamtic, Tobias Fornier, Anini-Y) Mindanao -Misamis Occidental Northern at central portions ng Zamboanga del Norte (Siocon, Baliguian, Gutalac, Kalawit, Labason, Tampilisan, Liloy, Godod, Bacungan, Salug, Sindangan, Siayan, Manukan, Jose Dalman, Sergio Osmena Sr., Pres. Manuel A. Roxas, Katipunan, Dipolog City, Pinan, Mutia, La Libertad, Polanco, Rizal, Sibutad, Dapitan City) -Zamboanga del Sur -Zamboanga Sibugay.

Inaasahan na lalabas na sa Philippine Area of Responsibility (PAR) ang Bagyong Vicky sa darating na Linggo nang hapon o gabi.

Pinaalalahanan ng PAGASA ang publiko lalo na ang mga residenteng naninirahan sa mga lugar na nakapailalim sa signal No. 1 sa posibilidad na pagbaha at landslide dahil sa malakas na pag-ulan.