Nahuli ang kapatid dahil sa drugs pero itinago ng mga pulis

ni Seigusmundo Del Mundo - @Panaginip, salamin ng inyong buhay | October 15, 2020

Salaminin natin ang panaginip ni Dorithy na ipinadala sa Facebook Messenger.

Dear Professor,

Hinuli ng mga pulis ang kapatid ko dahil sa drugs. Hinanap namin siya sa mga presinto pero hindi namin nakita. Sabi ng janitor sa police station, itinatago ‘yung kapatid ko.

Ano ang ibig sabihin ng panaginip ko? Hindi ako mapakali kahit halos isang linggo na ‘yung panaginip ko.

Naghihintay,

Dorithy

Sa iyo, Dorithy,

Karaniwan, ang mga hinuli ng pulis dahil sa drugs ay itinatago muna, pero kapag nagawa na nila ‘yun, kunwari ay aktuwal na hinuli at tatawag pa ng opisyal ng barangay bilang testigo saka pa lang ilalabas ang kanilang nahuli. Ibig sabihin, ang suspek ay dalawang beses na hinuhuli kasi ‘yung una, bigla na lang dinampot nang walang mga opisyal ng barangay at sa ikalawang paghuli ay may testigo nang mga opisyal.

Siyempre, ‘yung unang paghuli, mali pero ‘yung ikalawa ay mali rin. Kaya lang, wala namang nagagawa ang mga pangkaraniwang tao o mamamayan dahil sila ay mahirap lang.

Sa iyong panaginip, hinuli ang kapatid mo, ibig sabihin, sa tunay na buhay ay hindi naman siya hinuhuli. Ang iyong panaginip ay nagsasabing maaaring alam mong nagda-drugs ang kapatid mo o may hinala ka na siya ay gumagamit.

Dahil dito, makikitang ninenerbiyos ka dahil baka bukas-makalawa ay hulihin ang kapatid mo.

Mahirap paniwalaan pero sa mundo ng pag-aanalisa ng mga panaginip, may isang basehan na nagsasabing ang naganap na sa panaginip ay hindi na magaganap sa reyalidad. Bakit? Kasi nga “naganap na.”

Hanggang sa muli,

Professor Seigusmundo del Mundo

Pahiwatig na titira sa mala-palasyong bahay at parating na Mr. Right

ni Seigusmundo Del Mundo - @Panaginip, salamin ng inyong buhay | October 14, 2020

Salaminin natin ang panaginip ni Winne Rose na ipinadala sa Facebook Messenger.

Dear Professor,

Napanaginipan ko na kasama ko ang mama ko at nasa isang magandang bahay kami na parang palasyo. Maingat kaming naglalakad dahil baka madulas kami. May hinahanap kaming tao na kausap ng mama ko at gagawa ng motor dahil nasira ‘yung motor namin na ginagamit sa pag-alis-alis.

May nakita kaming lalaki sa palasyo at sabi niya, wala pa ‘yung taong hinahanap namin at hintayin na lang namin. Habang naghihintay, sabi ko sa sarili ko, masyado nang luma ang motorsiklo namin, mas maganda kung bibili ng bago, kaso wala naman kaming pera.

Naghihintay,

Winne Rose

Sa iyo, Winne Rose,

Masasalamin sa panaginip mo na ang bahay n’yo ngayon ay hindi na maganda, maaaring masikip, maliit at sa totoo lang, ayaw mo na rin ditong tumira. Kaya ang palasyo sa panaginip mo ay kabaligtaran ng inyong bahay.

Gayundin, masasalamin na maninirahan ka isang bahay na mala-palasyo. Mangyari kaya ito sa tunay na buhay? Ang sagot ay oo, dahil ayon sa mga pag-aaral, ang panaginip na kabaligtaran sa reyalidad ay mas nagkakatotoo. Kumbaga, sa future, sa mala-palasyong bahay ka maninirahan.

Ang panaginip na ipagagwa n’yo ang motor na sira at luma na ay nagbabalitang maaari kang ma-in love o magkagusto sa isang lalaking marunong mag-repair ng motor.

Maaaring hindi ka maniwala o ikaw ay mabigla, dumilat ang mga mata mo sabay taas ng kilay at nagulat ka na ikaw pala ay posibleng ma-in love sa “repair man.”

Dito sa mundo, iha, ang isa sa “hinihintay” ng mga dalaga ay ang kanilang dream boy, lover boy, soul mate o si Mr. Right.

Kaya muli, ang “hinihintay” sa panaginip mo ay ang iyong makakarelasyon sa malapit na hinaharap.

Hanggang sa muli,

Professor Seigusmundo del Mundo

Sinundo ang mister sa kabit, pahiwatig na dapat tapusin ang usapan kahit magkagalit

ni Seigusmundo Del Mundo - @Panaginip, salamin ng inyong buhay | October 13, 2020

Salaminin natin ang panaginip ni Talen na ipinadala sa Facebook Messenger.

Dear Professor,

Nag-away kami ng mister ko, tapos napanaginipan kong lumayas siya at pumunta sa kabit niya. Sinundo ko siya at sumama sa akin pauwi.

Sa ngayon, nag-aalala ako na baka nga may kabit ang asawa ko, pero mabait siya at hindi naman babaero. Ano ang masasabi n’yo sa panaginip ko?

Naghihintay,

Talen

Sa iyo, Talen,

Alam mo, kapag bitin ang pag-aaway ng mag-asawa, sa gabi ay mapapanaginipan ng isa sa kanila ang maaaring posibleng karugtong, pero mula lang sa kanyang kathang-isip.

‘Yan mismo ang nangyari sa iyo, nag-away kayo ng mister mo, pero sa pag-aaway n’yo, puro away lang at walang pinag-awayan o hindi n’yo napag-awayan ang dahilan kung bakit kayo nagkagalit. Kaya minsan, maganda ang pag-aaway na hindi bitin dahil pagkatapos ng away, maaaring maresolba ang isyu.

Huwag kang magkakamali na ang away na hindi bitin ay ‘yung masasaktan nang pisikal ang isa sa kanila o pareho silang magkakasakitan. Kumbaga, sa pag-aaway, dapat may isyu o pag-uusapan na uubos ng mahabang oras sa pagdedebate o pagtatalo na para bang ang paliwanagan ay tila wala nang katapusan.

Muli, likhang-isip mo lang ang may kabit ang asawa mo. Ipanatag mo ang iyong kalooban. Mayroong higit na maganda kaysa sa away na hindi bitin at ito ay ang huwag na kayong mag-aaway. Puwede namang pag-usapan ang mga hindi pinagkakasunduan at habang nag-uusap, dapat din ay lawakan ang pang-unawa.

Hanggang sa muli,

Professor Seigusmundo del Mundo