Pahiwatig na walang kalayaan at babala na made-depress

ni Seigusmundo Del Mundo - @Panaginip, salamin ng inyong buhay | November 08, 2020

Salaminin natin ang panaginip ni Crystalene na ipinadala sa Facebook Messenger.

Dear Professor,

Nakapagtataka ang panaginip ko dahil umulan nang malakas, tapos lumabas ako ng bahay at naligo ako sa ulan. Kahit basang-basa at giniginaw na ako, ayaw ko pa ring pumasok sa bahay namin. Wala namang mga tao sa panaginip ko, ako lang mag-isa sa kalsada.

Ano ang ibig sabihin nito?

Naghihintay,

Crystalene

Sa iyo, Crystalene,

Hangad mo ang kalayaan. Kumbaga, gusto mong lumaya at ang kalayaan na binabanggit sa panaginip mo ay personal na kalayaan dahil ikaw ay naliligo sa ulan.

Napapanaginipan ito ng mga babae kapag hindi maganda ang kanilang love life kung saan siya ay tagasunod lang at walang karapatang tumutol dahil ‘pag ginawa niya ito, hindi maganda ang kanyang mararanasan.

Gayundin, kapag ang mga babae ay hindi nakakapagpasya kung ano ang maganda para sa kanya, lihim niyang hahangarin na siya ay lumaya sa ganu’ng sitwasyon. Kaya ang mga babae na umaasa lang sa kanyang asawa o karelasyon pagdating sa pinansiyal, hindi rin niya maiiwasan na mapanaginipan na siya ay naliligo sa labas ng bahay.

Hindi maganda ang ganitong panaginip dahil kapag nagtagal pa ang ganitong klase ng buhay, ang nanaginip ay magkakasakit ng depression at makikitang ayaw na niyang kumain, ayusin ang kanyang sarili at palagi siyang nakatingin sa malayo. Minsan, nakatingin din siya sa isang bagay at makikitang napakatagal niyang nakatitig sa bagay na ito.

Makikitang halos hindi na siya kumukurap at parang napakalalim ng kanyang iniisip. Ayaw na rin niyang makipag-usap sa kahit na sino at hindi na rin siya gaanong natutulog.

Kaya bago pa mangyari sa iyo ang mga ito, ang payo ay layuan mo ang sinumang umaalipin sa iyo.

Hanggang sa muli,

Professor Seigusmundo del Mundo

Iba’t ibang kahulugan ng nakalutang ang sarili

ni Seigusmundo Del Mundo - @Panaginip, salamin ng inyong buhay | November 7, 2020

Salaminin natin ang panaginip ni Kim na ipinadala sa Facebook Messenger.

Dear Professor,

Nakita ko ang aking sarili na lumulutang sa hangin sa tapat ng katawan ko na nakahiga. Natakot ako at sa takot ko, bumagsak ‘yung nakalutang kong katawan. Bigla akong nagising at hindi na ako nakatulog hanggang umaga na.

Sa ngayon, iniisip ko pa rin ang panaginnip ko, ano ang ibig sabihin nito?

Naghihintay,

Kim

Sa iyo, Kim,

Ang tawag sa nakalutang ang sarili habang natutulog ay levitation, pero hindi ito ang nakalutang ang sarili sa panaginip. Dahil sa panaginip, ang nakalutang na sarili ay maaaring pasimula pa lang ng paghihiwalay ng katawang pisikal at katawang hindi pisikal, na madalas maranasan ng mga sumusunod:

1. Nagkakahiwalay ang katawang pisikal at katawang hindi pisikal kapag ang isang tao ay may mabibigat na problema sa buhay.

2. Nararanasan din ito ng mga may sakit na tumaas nang todo ang temperatura ng katawan.

3. Ganundin ng mga taong may sakit na hindi na nila kayang dalhin ang kanyang karamdaman.

4. Hindi rin maiiwasan ng mga taong sobrang palaisip ang matulog at sa kanyang pagtulog, hihiwalay ang isa niyang sarili.

5. Nangyayari rin ito sa mga taong walang kalayaan. Sila na inaalipin ng mahal nila sa buhay, na ayaw bigyan ng kalayaan, hindi pinalalabas ng bahay at masasabing nakakulong lang.

6. Puwedeng-puwede rin itong maranasan ng mga taong labis na nag-aalala sa mahal nila na nasa malayong lugar.

7. May pagkakataon na ang taong mahilig sa karunungang lihim na may kaugnayan sa the third eye ay maranasan din ang ganito.

Wala namang masama sa iyong panaginip. Ang totoo, nangyayari rin ito sa lahat, pero kapag madalas mong maranasan ang ganito, ibig sabihin, ikaw ay mapabibilang sa mga taong kung tawagin ay “mystics” o may espesyal na kakayahang magawa ang hindi nagagawa ng mga pangkaraniwan.

Hanggang sa muli,

Professor Seigusmundo del Mundo

Babala na magkakasakit ang OFW na ina kung ‘di iingatan ang sarili

ni Seigusmundo Del Mundo - @Panaginip, salamin ng inyong buhay | November 6, 2020

Salaminin natin ang panaginip ni Normita na ipinadala sa Facebook Messenger.

Dear Professor,

Natakot ako sa panaginip ko. Napanaginipan ko si mama na nagkasakit, nakahiga sa kama at may nurse sa tabi niya.

Ang mama ko ay nasa Hong Kong dahil isa siyang OFW. Sa huling chat namin, okey naman siya, nagvi-video call din kami at malakas naman siya, as in, wala siyang sakit o anumang karamdaman, masaya siya at masigla. Ano ang masasabi n’yo sa panaginip kong ito?

Naghihintay,

Normita

Sa iyo, Normita,

Ang mga panaginip ay pangyayaring may kaugnayan sa kasalukuyan pero ang panaginip ay may pagkakataong may kaugnayan sa nakaraan at hindi rin maiiwasan na ang mga panaginip ay ang mga mangyayari pa lang sa hinaharap.

Sa ganitong katotohanan, mas magandang ipayo mo sa iyong mama na ingatan niya ang kanyang kalusugan at katawan. Hindi naman masama ang mag-ingat dahil ang masama ay ang hindi nag-iingat.

Ang mga panaginip din ay nagbababala, at kapag nakinig sa babala ay hindi na mangyayari hindi magandang bagay na maaaring maganap.

Kaya ang panaginip mo ay napabibilang sa mga panaginip na nagbababala kaya muli, mas magandang payuhan mo ang iyong ina na ingatan ang kanyang kalusugan at katawan.

Hanggang sa muli,

Professor Seigusmundo del Mundo