Bagyo, simbolo ng pagbuhos ng magagandang kapalaran

ni Seigusmundo Del Mundo - @Panaginip, salamin ng inyong buhay | November 12, 2020

Salaminin natin ang panaginip ni Totsie na ipinadala sa Facebook Messenger.

Dear Professor,

Inabutan ako ng malakas na hangin ng bagyong Rolly sa gitna ng highway.‘Yung sasakyan ko ay tinatangay na ng malakas na hangin pero hindi naman napunta sa malayo.

Takot na takot ako at hanggang sa magising ako ay takot pa rin ako. Palaging laman ng isip ko ang panaginip kong ito.

Naghihintay,

Totsie

Sa iyo, Totsie,

Sa panaginip, makikitang hindi ka nakinig sa mga babala ng awtoridad. Malayo pa lang ang bagyo, sila ay nagbabala na at habang lumalapit ang bagyo, dumadalas pa ang pagsasabi ng babala.

May mga taong kahit alam na may paparating na malakas na bagyo ay lumalabas pa rin ng bahay dahil siguro sa mas mahalagang layunnin kaysa sa sariling kapakanan.

May mga tao namang likas na mahilig makipagsapalaran dahil nabuhay na yata sa pakikipaglaro sa kapalaran.

Anuman ang naging dahilan kung bakit ka nasa labas ng bahay at nagda-drive sa iyong panaginip, next time, sa tunay na buhay ay makinig ka sa babala at payo ng mga awtoridad.

Gayunman, sinasabi ng panaginip mo na dumating na ang takdang panahon na ang takbo ng kapalaran mo ay parang binabagyo, pero huwag kang mabahala dahil ang nakasakay sa sasakyan habang may malakas na bagyo ay tumutukoy sa binabagyo ng magagandang kapalaran para sa nanaginip.

Hanggang sa muli,

Professor Seigusmundo del Mundo

Kahulugan ng nagtitinda sa palengke

ni Seigusmundo Del Mundo - @Panaginip, salamin ng inyong buhay | November 11, 2020

Salaminin natin ang panaginip ni Loida na ipinadala sa Facebook Messenger.

Dear Professor,

Napanaginipan ko na nasa palengke ako at nagtitinda ng kung anu-ano, ‘yun bang mga plastic items na mura lang na gamit sa bahay. Masaya ako at tulad ng mga nagtitinda, kumita ako ng malaki. Pero may nanghuhuli sa amin, hindi naman siya pulis, pero nahuli na niya ‘yung iba sa amin, tapos hiningan niya ng pera kaya pinakawalan din. Ano ang kahulugan nito?

Naghihintay,

Loida

Sa iyo Loida,

Panahon na para ikaw ay magnegosyo o magkaroon ng pagkakakitaan. Ibig sabihin, hindi na puwedeng palagi ka lang nasa bahay. Kung ikaw naman ay namamasukan, ang panagiinip mo ay nagsasabing maliit lang din ang iyong kinikita.

Kaya muli, panahon na para ikonsidera mong magkaroon ka ng sarili mong pagkakakitaan na nasa klase ng isang negosyo at ikaw mismo ang mag-aasikaso.

Huwag ka nang magdalawang-isip pa dahil ang payo mismo ng iyong panaginip ay muli, magnegosyo kahit maliit lang.

Sa ngayon, marami ang namamasukan, lalo na sa hanay ng kababaihan bilang saleslady, pero ang kita ay masasabing sapat lang sa kanila kung saan ang iba pa nga ay umaangal dahil ang suweldo ay kulang para sa gastusin nila.

Gayunman, may ilang may trabaho pero dahil sa pandemya, hindi naman sila sumasahod nang buo o kumpleto, kaya maganda lang ang porma nila pero sa maniwala ka o hindi, hihinto na sila sa pamamasukan at maghahanap ng ibang pagkakakitaan.

Kaya kung susundin mo ang payo ng iyong panaginip, mapapabuti ang buhay mo.

Hanggang sa muli,

Professor Seigusmundo del Mundo

Paalala na iingatan ni Mama Mary ang mga mahal sa buhay habang magulo ang mundo

ni Seigusmundo Del Mundo - @Panaginip, salamin ng inyong buhay | November 10, 2020

Salaminin natin ang panaginip ni Vangie na ipinadala sa Facebook Messenger.

Dear Professor,

Napanaginipan ko si Mama Mary. Nakaputi at blue siya, tapos tinawag niya ako at namasyal kami sa isang hardin na maraming mababangong bulaklak. Nakakita rin ako ng maliliit na anghel na sanggol at may mga pakpak, tapos sumasabay sila sa paglakad namin ni Mama Mary.

Sabi ni Mama Mary, kumusta na ang mommy at daddy ko, tapos kinumusta rin niya ‘yung best friend ko na si Che-che. Sabi ko, okey naman sila. Sabi ko pa nga, mabait si Che-che at palagi ko siyang kasama. Ano ang ibig sabihin ng panaginip kong tungkol kay Mama Mary?

Naghihintay,

Vangie

Sa iyo, Vangie,

Kapag ang panahon ay batbat ng kaguluhan at mga pangyayaring hindi magaganda at hindi kontrolado ng mga tao, kapag ang mga tao mismo ay nag-aaway tulad ng nangyayari sa mga giyera, kapag pagkagahaman at pansariling kapakanan lang ang iniisip ng mga tao, ang kadiliman ay sinasabing naghahari sa buong mundo.

Sa ganitong larawan ng sanlibutan, marami ang mananaginip kay Mama Mary at sa iba pang mga banal na personalidad at ikaw ay isa sa mga napanaginipan si Mama Mary.

Alam mo, kung babalikan natin ang kasaysayan, si Mama Mary ay nagpapakita lang sa mga taong may malinis na puso at wagas na kalooban. Kaya masasabing ikaw ay ganu’n— may malinis na puso at wagas na kalooban.

Ang isa pa sa katotohanan na makukuha natin sa kasaysayan ni Mama Mary at Sanlibutan ay ito – kaya nagpapakita si Mama Mary sa iba’t ibang paaran, kabilang na ang mga panaginip ay dahil mahal niya ang mga tao kung saan ayaw niyang mapahamak ang marami.

Tulad mo, mahal ka ni Mama Mary at mahal din niya ang mommy at daddy mo. Ang nakakatuwa ay mahal din niya si Che-che na best friend mo.

Ito rin ay nagsasabing bagama’t ang mundo ay magulo, ang mga mahal mo sa buhay ay iingatan ni Mama Mary at ito ay ginagarantiyahan ng iyong panaginip.

Bilang panghuli, manatili kang may malinis na puso at wagas na kalooban dahil ito ang pinakapayo ng iyong panaginip.

Hanggang sa muli,

Professor Seigusmundo del Mundo