Maling paraan ng pagpapapayat, pahiwatig ng panaginip na ayaw tumigil sa pagkain

ni Seigusmundo Del Mundo - @Panaginip, salamin ng inyong buhay | November 23 , 2020

Salaminin natin ang panaginip ni Cathy na ipinadala sa Facebook Messenger.

Dear Professor,

Nitong nakaraang quarantine, nagtataka ako sa panaginip ko dahil ang lakas-lakas kong kumain at parang hindi ako nagsasawa sa kakakain. Tapos, nang maubos ‘yung pagkain ko, nagluto at kumain ako ulit. Hindi ako makapaniwala sa panaginip ko dahil sa kasalukuyan ay nagda-diet ako, pero sa panaginip, lumaki ang baywang ko at nagkakabilbil din ako. Tapos, dating 26 ang waistline ko, pero naging 30 na. Ano ang kahulugan at masasabi n’yo sa panaginip ko?

Naghihintay,

Cathy

Sa iyo, Cathy,

May paalala ang panaginip mo na sana ay iyong pakinggan. Ang sabi, masama ang ginagawa mo na nagda-diet ka o hindi tama ang paraan ng pagpapapayat mo. Kapag hindi kumakain ang tao, hihina ang kanyang katawan at siya ay puwedeng magkasakit. Kapag ang tao ay kulang sa pagkain, ibig sabihin, kumakain din pero hindi maayos ang kanyang kinakain, siya rin ay puwedeng magkasakit. Kapag nasanay ang katawan sa isang regular na aktibidad, tapos biglang binago ang kanyang lifestyle, siya rin ay puwedeng magkasakit.

Marami ngayon ang nagda-diet dahil uso ang pagiging obese. Mahirap kasing iwasan ang kultura o nakagawian ng marami na kasabay ng kasiyahan o selebrasyon ay kain nang kain at walang kontrol.

Sa panahon namang ito ng pandemya, dahil nasa bahay lang, kapag walang magawa ay kain din nang kain. Kumbaga, puwede kaya na kapag magsasaya tayo, huwag na tayong maghahanda ng kung anu-anong pagkain, lalo na ng matatamis at matatabang pagkain, tulad ng sa masarap na lutuin na karne, baboy, baka at kung anu-ano pang laman-hayop?

Ang isa pang hindi maganda sa nakasanayan natin ay masarap na nga ang lutuin, dadagdagan pa ng pampagana tulad ng sili, paminta, betsin at mga sangkap na lalong nagpapasarap dito. At isa pa, hindi lang simpleng paghahaulin ang naimbento natin dahil uso rin ang isda na babalutin ng dahon ng saging at ang mga karne ay tutuhugin at kahit ang mga gulay ay lalagyan pa rin ng mga mamahaling pampasarap.

Pero hindi sa ganyan natatapos ang pagluluto dahil uso rin ang paghahain kung saan nilalagyan din ng mga dekorasyon ang pagkain na para bang mga alay sa hapag-kainan. Kaya sa panahon ngayon, mabilis tumataba, hindi lamang ang kabataan kundi pati ang matatanda.

Sa totoo lang, ang nakaugalian natin na ganyan ay hindi maganda, pero may isa pang mas hindi maganda at ito ay bigla tayong magre-reduce o magda-diet.

At dahil ayon sa panaginip mo na mali ang biglaang pagpapayat mo, mas maganda na dahan-dahan lang ang gawin mo, kumbaga, hindi puwede ang biglaan. Kunsabagay, kahit ikaw din ay sasabihin mo na sa lahat ng bagay, ang biglaan ay masama. Kahit sa pag-eehersisyo, hindi maganda na nabibigla ang katawan.

Sabi rin ng iyong panaginip, kumain ka, ibig sabihin, hindi puwedeng hindi ka kumain. Kaya ang paraan ng pagpapapayat na nagpapayo na huwag kakain ay huwag mong susundin. Sa halip, kumain ka. Muli, ito ang sabi ng panaginip mo, kumain ka ng masasarap, dahan-dahan lang o huwag sobrang marami tulad ng ginawa mo sa nagdaang mga araw bago ka pa mag-diet.

Tandaan mo rin na kapag hindi ka nakinig sa babala ng iyong panaginip, muli, puwede kang magkasakit.

Hanggang sa muli,

Professor Seigusmundo del Mundo

Berdeng ahas, simbolo ng pagyaman sa pagnenegosyo

ni Seigusmundo Del Mundo - @Panaginip, salamin ng inyong buhay | November 20 , 2020

Salaminin natin ang panaginip ni Irish na ipinadala sa Facebook Messenger.

Dear Professor,

Napanaginipan kong namamasyal ako sa isang magandang hardin na maraming bulaklak na iba’t iba ang mga kulay. Palakad-lakad ako at sa paglalakad ko, may nakita akong ahas na kulay green, tapos natakot ako at tumakbo pero bumalik ulit ako dahil naiisip ko kung bakit kulay green ang ahas, eh, ang alam ko brown ang kulay nu’n.

Tinitigan ko ‘yung ahas, tapos kumikislap ang balat niya at maamo ang kanyang mga mata na green din. Gumagalaw-galaw lang siya at mabait naman. Ano ang ibig sabihin ng panaginip kong ito?

Naghihintay,

Irish

Sa iyo, Irish,

Akala ng marami, ang ahas ay simbolo ng tukso. May iba naman na naniniwalang ang ahas ay isang traydor na tao. May mga naniniwala rin na ang ahas ay simbolo ng paggaling sa sakit na dinadanas.

Lahat ng ito ay mga kahulugan ng ahas, pero may isang medyo kakaiba na hindi kadalasang naipakikita at ito ay kapag ang ahas ay kulay green, ito ay ahas na tagapagbantay ng hidden treasures.

Pero ang hidden treasure na iniuugnay sa ahas na ito ay hindi ang tradisyunal na kayamanang nakabaon sa lupa kundi ang tagong pagyaman sa pamamagitan ng pagnenegosyo dahil ang green ay kulay ng pera o salapi.

Kaya, ang payo ng iyong panaginip ay magnegosyo ka dahil may tagong galing at husay ka sa pagnenegosyo. Gawin mo, dahil ito mismo ang mensahe ng iyong panaginip.

Hanggang sa muli,

Professor Seigusmundo del Mundo

Dudang may kabit, pahiwatig ng panaginip na may ibang kausap ang mister

ni Seigusmundo Del Mundo - @Panaginip, salamin ng inyong buhay | November 19 , 2020

Salaminin natin ang panaginip ni Lolit na ipinadala sa Facebook Messenger.

Dear Professor,

Napanaginipan kong nag-ring ang cellphone ng asawa ko at nang kinausap niya ay boses ng babae na maarte ang nagsalita. Kahit mahina, narinig ko ‘yun, tapos tinatanong siya kung gagawin ba niya ang pinagagawa sa kanya. Ang sagot ng asawa ko ay “Mamaya na lang.” Nagpantig ang tenga ko at inagaw ko agad ‘yung cellphone niya at pinatingnan ko sa anak kong babae kung sino ang tumawag, tapos nakita ko na sa bar nagtatrabaho ‘yung babae. Sa galit ko, ibinato ko ‘yung cellphone niya, tapos natulala siya at hindi nakakibo.

Pagkatapos nu’n ay bigla akong ginising ng anak kong babae kaya naputol ang panaginip ko. Ano ang ibig sabihin nito? Sana ay maipaliwanag n’yo. Salamat!

Naghihintay,

Lolit

Sa iyo, Lolit,

Tamang hinala ang naghahari sa iyong malalim na kamalayan. Kumbaga, sa iyong kaloob-looban, wala kang tiwala sa iyong asawa dahil tulad ng nasabi na, “sa malalim” na kamalayan, naroon ang iyong hinala. Hindi ito basta-basta lumalakas sa reyalidad, kaya kahit paano ay napipigilan mo pa ring malaman ng mga nasa paligid mo na ikaw ay may tamang hinala sa iyong mister.

Ang hinala mong ito ay nagkaroon ng pagkakataon na mailabas at ito ay nangyayari sa panaginip mo kung saan doon nagkaroon ng larawan o senaryo na nag-ring at narinig mo ‘yung tumawag sa mister mo.

Siyempre, kahit sinong misis ay sobrang magagalit dahil iniisip niya na siya ay ipinagpalit sa ganu’ng klase ng babae, pero dapat mong maunawaan na muli, ito ay nag-ugat lang sa iyong hinala.

Hindi sapat ang tamang hinala para maniwala ang sarili mo na ang iyong mister ay may “bar girl” dahil kailangan mo pa ng maraming palatandaan kung ito ay totoo.

Una, nagiging kakaiba ang amoy ng lalaking may kabit na bar girl dahil ang paborito nilang perfume ay kakapit sa kanyang damit at balat, kaya puwede mo itong maamoy.

Ang bar girl ay panggabing hanapbuhay, kaya dapat ang mister mo ay wala sa inyo tuwing gabi.

Hindi rin puwede na hindi iinom ng alak ang lalaking magba-bar, kaya malalaman mo kung totoong may babae ang mister mo kung siya ay amoy alak din. Gayundin, dahil ikaw ay tamang hinala, bakit hindi mo tingnan ang cellphone ng mister mo? Ang pagkakaroon ng tamang hinala ay katumbas ng “lisensiya” na buksan ang cellphone ng pinaghihinalaan, pero ito ay para lang sa mag-asawa.

Ibig sabihin, ang asawang lalaki ay papayag na buksan ng misis ang kanyang cellphone dahil sila ay mag-asawa, kaya kung ayaw niyang gawin mo ito, hindi ka masisisi kung tumaas ang antas ng iyong tamang hinala.

Hanggang sa muli,

Professor Seigusmundo del Mundo