Panaginip tungkol sa demonyo at impiyerno, pahiwatig na magtiwala sa sarili

ni Seigusmundo Del Mundo - @Panaginip, salamin ng inyong buhay | November 27 , 2020

Salaminin natin ang panaginip ni Jamil na ipinadala sa Facebook Messenger.

Dear Professor,

Nanaginip ako ng bundok at bulkan. Sa bulkan, parang impiyerno na may apoy at lava na kumukulo. Nakita ko ang isang nilalang at sa tingin ko ay isang demonyo dahil may sungay at maitim na mapula ang hitsura niya, tapos kumakain siya ng puso at atay ng tao at ibinibigay niya sa akin ang kanyang kinakain.

Takot na takot ako, tapos nagdasal ako at lumitaw ang isang anghel, tapos kinuha ako at dinala sa bundok kung saan sa tingin ko naman ay langit at sabi sa akin ng anghel, “Dito, hindi ka makukuha ng demonyong ‘yun dahil hindi sya makapapasok dito!”

Napalingon ako sa impiyernong pinanggalingan ko at nakita ko na naging bulkan na nagbubuga ng lava at apoy, tapos bigla akong nagising. Sana ay maipaliwanag n’yo ang ibig sabihin ng panaginip ko. Salamat!

Naghihintay,

Jamil

Sa iyo, Jamil,

Alam mo, ang napanaginipan mong demonyo at impiyerno ay napanagnipan din ni Carl Jung. Si Carl Jung ang nagtayo ng pagamutang pang-psychology o School of Thought na kung tawagin ay Analytical Psychology.

Ganito ang naranasan ni Mr. Jung kung saan napanaginipan niya ang demonyo, may sungay at nangangain ng tao at gusto rin siyang kainin nito. Sa una, natakot din siya, pero naalala niya na ang mga hayop na may sungay at hindi naman kumakain ng karne, kaya hindi totoong kakainin siya ng demonyo.

Sabi niya sa demonyo, “Vegetarian ka, ‘no?” Kasi ang pangunahing pagkain ng mga may sungay ay mga halaman at gulay. Biniro pa nga niya ang demonyo at sabi niya, “Oo, kumakain ka ng puso, pero puso ‘yun ng saging kasi ang saging ay halaman. Oo, kumakain ka ng atay pero atay ‘yun ng malalaking katawan ng punong kahoy, kasi ‘yung pinakagitna ng punong kahoy, ang tawag du’n ay atay din.”

Tapos, ayon kay Mr. Jung, nawala na ang demonyo kasi napahiya dahil hindi tumalab ang pananakot niya.

Dahil dito, huwag kang matakot dahil ang napanaginipan mo ay demonyo na may sungay, hindi ka kakainin nito. Ibig sabihin, tinatakot ka lang ng demonyo at kaya ka tinatakot ay dahil sa mga araw na siya ay iyong napanaginipan, nawawala o nababawasan ang iyong pananampalataya.

Pero dahil ang salitang “pananampalataya” ay panrelihiyon, mas maganda na ang gamitin natin ngayon at para sa iyo ang salitang “tiwala.” Kaya ayon sa panaginip mo, mukhang nawawalan ka ng tiwala sa sarili mo, as in, naduduwag ka sa mga hamon ng iyong kapalaran.

Kaya ang payo, magtiwala ka sa sarili mo, kumbaga, ‘yung usong-uso ngayon na madalas nating marinig, “Tiwala lang,” oo, iha, tiwala lang sa sarili ang kailangan mo. Kapag may tiwala ang tao sa kanyang sarili, ang mga imposibleng bagay ay magiging posible at ang mahihirap na parang hindi niya kakayanin ay tiyak na kakayanin niya.

“Tiwala lang,” subukan mo at gaganda ang iyong kapalaran dahil kapag may tiwala ang tao sa kanyang sarili, siya ay masasabing may tapang at lakas ng loob na harapin ang anumang pagsubok at hamon ng buhay, lalo na sa panahong ito ng pandemya.

Hanggang sa muli,

Professor Seigusmundo del Mundo

Pahiwatig na pagdugtungin ang nakaraan at hinaharap gamit ang mga ngiti, biro at harot

ni Seigusmundo Del Mundo - @Panaginip, salamin ng inyong buhay | November 25 , 2020

Salaminin natin ang panaginip ni Tess na ipinadala sa Facebook Messenger.

Dear Professor,

Ano ibig sabihin ng panaginip ko na tumawid ako sa hanging bridge, nakababa na ako habang hinihintay kong makababa ‘yung tatlong matandang babae?

Naghihintay,

Tess

Sa iyo, Tess,

Ang tulay ay nagdurugtong ng dalawang lugar na magkahiwalay kung saan para makapunta sa kabila, kailangang tumawid sa tulay. Kaya kapag walang tulay, hindi makakapunta sa kabila o sa susunod na pupuntahan o daraanan. Kaya ang tulay ay tagapagdugtong ng dalawang lugar.

Kapag may mga bagay na “air type” sa mga panaginip tulad ng hanging bridge, ang nanaginip ay ikokonsiderang “air type” na nilalang. Ibig sabihin, hangin o air ang udyok ng buhay na sumasakanya. Ang isa pang kahulugan, hangin ang magbibigay sa kanya ng magagandang kapalaran at magsisilbing susi para maabot niya ang kanyang mga pangarap.

Dahil dito, ayon sa panaginip mo, para mapagdugtong mo ang iyong nakaraan at hinaharap, saya ang iyong kailangan dahil ito ay para sa mga air type na nilalang.

Gayundin, ang isa pang kahulugan, kailangang lagyan nila ng saya ang bawat gagawin nila. Kahit ang pinakamahirap na trabaho ay dapat may saya sila. Kaya anuman ang iyong gusto sa buhay, huwag mong kalilimutan na saya ang magdadala sa iyo sa tagumpay.

Ito rin ay nagsasabing kahit dumadaan ka sa problema, haluan mo ng saya. Kahit pinahihirapan ka ng mga hamon ng kapalaran, ang saya ay dapat nasa iyo pa rin. Paano? Kung pagod ka, ngumiti ka dahil ito ay nakakapawi ng pagod. Kung iniinis ka ng mga tao sa paligid mo, ngitian mo lang sila dahil muli, ang ngiti ay para sa mga air type.

Kung nababagot ka, magharot ka dahil tulad ng ngiti, ang harot ay para sa mga tulad mo. Kung sa kasalukuyan ay naghihirap at nagdudusa ka sa kalungkutan at kabiguan, magbiro ka dahil ang ngiti, harot at biro ay para sa mga tulad mo.

Pero kahit wala kang kasama, ngumiti, magharot at magbiro ka sa iyong sarili. Gawin mo at huwag mong kalilimutan ang mga ito sa lahat ng sandali dahil ang mga ito ang magdurugtong ng iyong nakaraan at hinaharap.

At kung nawala ang ngiti, harot at biro sa iyong buhay, hindi ka na makakaalis sa iyong nakaraan at ang taong nabubuhay na lang sa kanyang nakaraan ay malabong makamtan ang kaligayahan.

Ang tatlong matandang babae sa panaginip mo ay ang iyong matatandang karanasan kung saan sinasabi ng panaginip mo na sa mga ito ka kumuha ng mga aral na magagamit mo sa iyong hinaharap.

Kaya sila ay matatanda na dahil ang mga karanasang ito ay nangyari noong bata ka pa. Kumbaga, sobrang bata ka pa noon at nakaranas ka ng mga pangyayari at may mapupulot kang aral sa buhay.

Kapag naunawaan ng tao ang kanyang mga panaginip, para na ring sinabing hindi na siya mabibigo sa kanyang buhay dahil nakikinig siya sa mga gabay na ibinibigay ng kanyang mga panaginip.

Hanggang sa muli,

Professor Seigusmundo del Mundo

Babala na maraming inggit sa paligid

ni Seigusmundo Del Mundo - @Panaginip, salamin ng inyong buhay | November 24 , 2020

Salaminin natin ang panaginip ni Bhea na ipinadala sa Facebook Messenger.

Dear Professor,

Ano ang ibig sabihin ng nakatakas ako sa pagkakakulong sa akin ng mga witch? Ikinulong nila ako at nu’ng nalaman ko na ako naman ang papatayin nila, hinanap ko sa pasikut-sikot ‘yung pinto palabas, pero puro pader ang nandu’n at nakita ko lang nu’ng itinuro sa ‘kin nu’ng isang witch ‘yung lihim na pinto at lock sa ilalim ng pihitan ng vault.

Kapag pinihit ‘yun, magkakaroon ng uwang ‘yung pader. Tinulungan ko kasi ‘yung anak niya na muntik kagatin ng aso, kaya itinuro niya sa akin ang daan palabas. Paglabas ko sa madamong lugar, maraming karinderya akong nadaanan na puro lalaki ang tao at masama ang tingin sa akin dahil hindi ako taga-roon. Nang may lalaking biglang lumapit sa akin at hinawakan ang kamay ko, niyaya niya ako palayo at dinala sa bahay nila, tapos nagising na ako at parang totoong-totoo ang panaginip ko.

Naghihintay,

Bhea

Sa iyo, Bhea,

Sa buhay ng tao, maraming kontrabida at sa panaginip mo, ang mga witch na nagkulong sa iyo ay ang mga taong lihim na galit sa iyo, kumbaga, itinatago nila ang tunay na damdamin nila at sila ay lihim na galit sa iyo.

Pero bakit nga pala ang mga witch ay pangit o sobrang pangit? Alam mo, iha, kaya sila mapapangit ay dahil sila ay nabubuhay sa galit, at kaya sila ay galit dahil ang kanilang kinagagalitan ay maganda hanggang o sobrang maganda.

Hindi ba ang sabi, hindi lang sa gubat may ahas dahil may ahas din sa siyudad, ganundin, hindi lang sa gubat may witches dahil nandu’n din sila sa siyudad. Kumbaga, kahit saan, may ahas at witches dahil ang galit at inggit ay walang pinipiling lugar.

Ayon sa panaginip mo, maraming witches ngayon sa paligid mo na inggit na inggit sa iyo, kaya ikaw ay binabalaan at pinag-iingat ng iyong panaginip.

Pero ano ang panlaban sa galit, ano pa nga ba kundi ang pag-ibig. Totoo kaya ito? Parang mahirap sundin dahil paano mo mamahalin ang taong walang ginawa kundi pangarapin na pumangit ang iyong kapalaran? Mahirap gawin, pero ang totoong panlaban sa galit tulad ng nasabi na ay pag-ibig.

Sa panaginip, ito ba ay totoo? Oo, dahil ang witch na tinulungan mo ay siyang tumulong din sa iyo. Sa tunay na buhay, ganundin, gawan mo ng mabuti ang kapwa mo at gagawan ka rin niya ng mabuti.

Lagi mong isabuhay ang sinasabi na mabuti ang panlaban sa masama at palaging tinatalo ng mabuti ang masama. Kaya kahit alam mong maraming naiinggit sa iyo, ipakita mo pa rin sa kapwa ang pagmamahal na nasa puso.

Dahil bukod sa pangit ang mga witches, ang isa pang kahulugan nito ay wala sa kanilang nagmamahal at sila ang kadalasang mga bigo sa love life.

At dahil sa pag-ibig na ito na ipamamalas mo sa iyong kapwa at sa mga taong naiinggit sa iyo, ang mga witches na ito ay siguradong matatalo mo.

Hanggang sa muli,

Professor Seigusmundo del Mundo