Iba’t ibang kahulugan ng panaginip na naliligo sa malinis na ilog

ni Seigusmundo Del Mundo - @Panaginip, salamin ng inyong buhay | December 4 , 2020

Salaminin natin ang panaginip ni Mara na ipinadala sa Facebook Messenger.

Dear Professor,

Napanaginipan ko na naliligo ako sa ilog, tapos ‘yung ilog ay may malinis na tubig at umaagos. Sa panaginip ko, gabi na pero nasa ilog pa rin ako, tapos ayaw kong umuwi at sabi ko pa sa sarili ko, roon na lang ako titira malapit sa ilog, tapos nagising na ako. Parang totoong-totoo ang panaginip ko, ano ang ibig sabihin nito?

Naghihintay,

Mara

Sa iyo, Mara,

Sa totoo lang, sa mga araw na ito ay marami ang nananaginip na sila ay naliligo sa ilog o sapa, swimming pool at dagat. Dahil sa pandemya, nagkaroon ng mahigpit na pagpapatupad ng community quarantine sa ating bansa kung saan sa kasalukuyan, sabik na sabik ang mga tao na gumala, makapag-swimming at makapag-outing tulad ng masayang mga ginagawa natin noong wala pang pandemya.

Pero kung hindi isasama ang kasabikan mo at ng mga tao na gumala at makaligo sa batis, swimming pool o ilog, ang nanaginip na naliligo sa ilog ay nagsasabing sa tunay na buhay, malungkot ang nanaginip dahil maaaring zero ang kanyang love life o bigo siya sa pag-ibig, as in, hindi siya masaya sa kanyang kasalukuyang karelasyon.

Kung nagkataong zero ang kanyang love life, ang panaginip na naliligo sa ilog ay nagbabalita na siya ay may pag-asa pang magkaroon ng mahal o may magmamahal sa kanya.

At kung halimbawa namang may love life siya sa kasalukuyan, ang nanaginip na naliligo sa ilog na may malinis na tubig ay nagbabalita na anumang sandali ay magkakaroon siya ng bagong pag-ibig — isang pag-ibig na punumpuno ng pag-asa na magiging maligaya na siya.

Gayunman, kung nagkataong may asawa na ang nanaginip na naliligo sa ilog na may malinis na tubig, ito ay nagbabalita na siya ay mai-in love sa iba na punumpuno ng pag-asa kung saan ang kanyang malalim na kalungkutan ay mawawala at mapapalitan ng kaligayahang kanyang matagal nang inaasam-asam.

Pagtataksil man ito o hindi, hindi na mahalaga dahil sa huli, ang ganitong panaginip ay nagbabalita ng pakikipaghiwalay sa kasalukuyang asawa dahil na rin sa pag-amin sa katotohanang nahanap na niya ang kanyang ligaya.

Ngunit sa kabilang banda, kung may asawa na ang nanaginip, puwede rin namang ang naliligo sa ilog ay “paglalaro ng isip na umibig, sumiping o magmamahal ng iba, pero sa aktuwal o katotohanan, dahil pinahahalagahan niya nang labis ang kanyang pamilya, maipepreserba pa rin niya ang buo at masayang pagsasama ng kanyang pamilya habambuhay.

Hanggang sa muli,

Professor Seigusmundo del Mundo

Kahulugan ng ikinasal sa tabing dagat

ni Seigusmundo Del Mundo - @Panaginip, salamin ng inyong buhay | December 3 , 2020

Salaminin natin ang panaginip ni Camile na ipinadala sa Facebook Messenger.

Dear Professor,

Ang panaginip ko ay tungkol sa lalaking naghihintay sa akin sa tabing dagat, at nanaginip din ako na ikinakasal ako, tapos ang ganda ng wedding gown ko, at ang saya ko dahil napakaganda ng kasal ko. Tapos ‘yung groom, siya rin ‘yung nasa dagat. Nakilala ko siya sa built ng katawan niya at blurred ang mukha niya, pero in real life, may na-meet akong lalaki at niyaya akong manood ng sunset sa tabing dagat, at ‘yung built niya ay pareho ng lalaking nasa panaginip ko. Mula nang na-meet ko ang lalaking ‘yun, hindi ko na napanagipan pa ang kasalan sa tabing dagat. Ano ang ibig sabihin nito?

Napanaginipan ko rin ang tubig, naliligo ako sa swimming pool na napakalinis at napakalinaw ng tubig. Tapos kumuha ako ng bato saka nilubog ko sa tubig at pinalulutang ko pero hindi naman lumutang ‘yung bato. Makinang ang bato, medyo dark ang kulay at may pagka-gray at silver ang bato at kapag itinutok sa araw, kumikinang. Sana masagot n’yo ang kahulugan ng panaginip ko.

Naghihintay,

Camile

Sa iyo, Camile,

Napakaganda na napanaginipan mo ang tungkol sa wedding mo. Lahat ng babae, pinapangarap ang isang pagkaganda-gandang kasal, pero hindi lahat ay nagkakaroon nito.

Ang totoo nga, sa panahon ngayon, mas marami ang nag-aasawa nang hindi naikakasal. Ang iba naman ay civil wedding ang pinipili. Mayroon ding mga kasal sa simbahan, pero kaunti lang ang bilang ng bonggang kasalan at sa mga naikakasal, masasabing iilan lang ang nagkakaroon ng magagandang kasal tulad ng iyong napanaginipan na “wedding by the beach.”

Ang ibig sabihin ng panaginip na umaasa ka na ang lalaking nagyaya sa iyong manood ng sunset sa tabing dagat ay ang pangarap mong mapangasawa. At simula nang makilala mo siya ay hindi mo na napanaginipan ang kasalan sa tabing dagat ay nagsasabing, mas magugustuhan mong mapangasawa ang lalaking binabanggit kahit hindi na sa tabing dagat ang kasal ninyo.

Kumbaga, kuntento ka kahit simpleng kasal dahil ang sabi ng sarili mo, ang totoong kaligayahan mo ay mapangasawa ang lalaking nagyaya sa iyo.

Kaya lang ngayon, ayon sa ikalawang panaginip mo, hindi masaya ang iyong love life. Kumbaga, hanggang ngayon ay nangangarap ka na sana’y magkaroon ka ng maligayang love life. Ibig sabihin, ‘yung lalaki na nagyaya sa iyo sa tunay na buhay na manood ng sunset sa tabing dagat ay hindi mo pa boyfriend o karelasyon.

Gayunman, sa ganda ng iyong naranasan na kayong dalawa ay nanood ng sunset, kayo ay talagang puwedeng magkatuluyan bilang mag-asawa.

Para mangyari ito, ikaw ay pinapayuhang magpakita sa kanya ng kakaibang pagtingin, kumbaga, ikaw ay may gusto sa kanya. Huwag kang mahiya dahil may isa pa akong ibabalita sa iyo kung saan sa panahon ngayon, talagang nangyayari na babae ang mas agresibo o mas ipinakikita at ipinadarama ng babae sa lalaki na siya ay in love rito.

Oo, iha, iba na ngayon at hindi tulad sa mga nagdaang panahon na naghihintay lang ang babae sa lalaki.

Hanggang sa muli,

Professor Seigusmundo del Mundo

Mala-bangungot na panaginip, babala na may sakit sa puso o walang ganang mabuhay

ni Seigusmundo Del Mundo - @Panaginip, salamin ng inyong buhay | December 1 , 2020

Salaminin natin ang panaginip ni Aurora na ipinadala sa Facebook Messenger.

Dear Professor,

Gusto kong malaman ang kahulugan ng panaginip ko dahil palaging ganu’n ang napapanaginipan ko. Sa panaginip ko, gusto akong patayin ng asawa ko, tapos gusto niya akong itulak sa isang bangin, ngunit bago niya pa ako naitulak, may isang tao na tumulong sa akin at hindi ako nahulog.

Pagtingin ko sa asawa ko, nakita ko siyang patay at nasusunog siya, tapos nakita ko na siyang nasa kabaong, pero hindi naman sunog ang katawan. Nang matapos siyang ilibing at nang matutulog na kami ng anak ko, may nakitang sulat ang anak ko at dali-dali kong kinuha at itinago ‘yung sulat. Tapos binuhat ko ang anak ko at pumunta kami sa bahay ng biyenan ko, tapos nakita ko ang bahay namin ng asawa ko na maliwanag pero walang tao.

Nang magising ako, habol ko ang hininga ko at parang totoo ang panaginip ko. Sa totoong buhay, buhay pa ang asawa ko pero hiwalay na kami. Sana ay masagot n’yo ako. Maraming salamat!

Naghihintay,

Aurora

Sa iyo, Aurora,

Una, dahil mahalaga ang kalusugan ng isang tao kaysa sa anumang bagay dito sa mundo, mas magandang pagtuunan natin ng pansin ay kapag ang nanaginip ay nagising at ang hininga ay hinahabol na parang totoo ang napanaginipan, ang payo ay magpatingin sa tunay na doktor dahil ang paghingal ay babala ng mahinang heart o puso.

Minsan, may pagkakataon na wala namang sakit ang nanaginip, kaya lang, mali ang kanyang sleep position o istayl ng pagtulog. Kapag nakatulog na sa gawing kanan nakahilig, madalas na siya ay makararanas ng mga panaginip na tulad ng sa iyo na parang nakakatakot na pangyayari at siya rin ay magigising na hinahabol ang hininga. Ito rin, iha, ay puwedeng palatandaan ng sakit sa digestive system.

Kapag naman nakatulog nang may katagalan na nakahiga, as in, diretso ang katawan, mananaginip din ng mala-bangungot at nahihirapang huminga. Puwedeng wala siyang sakit, pero sa ganu’ng klase ng pagtulog, lumiliit ang daluyan ng hangin papalabas at papasok sa lungs kaya hindi makahinga.

Ang pinakamagandang paraan o istayl ng pagtulog ay sanayin ang sarili na pabiling-biling o paiba-iba ang puwesto dahil kapag matagal sa iisang puwesto sa pagtulog, ang tao ay puwedeng bangungutin.

Ang isa pa sa inirerekomenda ay ang pagtulog na nakahilig sa kaliwa dahil sa ganitong paraan, hindi nahihirapan ang puso o heart kaya hindi makakapanaginip na siya ay parang dinadaganan o may dumadagan sa kanya.

Pagkatapos mong malaman ang ilang mahahalagang isyu tungkol sa iba’t ibang posisyon ng pagtulog, ang panaginip mo sa kanyang kabuuan ay nagsasabing kulang na kulang ka sa pagkilos o nawawalan ka ng sigla na mabuhay. Kumbaga, nananamlay ka at ganundin ang iyong kapalaran.

Dahil dito, ikaw ay pinapayuhan na gumawa ng mga bagay na makabuluhan tulad ng pagsisikap na paunlarin pa ang iyong buhay sa pamamagitan ng mga bago at kakaibang proyekto na hindi mo pa nasusubukan.

Hanggang sa muli,

Professor Seigusmundo del Mundo