Bulalakaw, pahiwatig na dadagsa ang suwerte sa nanaginip kahit ‘di humiling

ni Seigusmundo Del Mundo - @Panaginip, salamin ng inyong buhay | December 17, 2020

Salaminin natin ang panaginip ni Catherine ng Meycauyan, Bulacan

Dear Professor,

Ang panaginip ko ay biglang may dumaang bulalakaw sa langit at agad naman akong nag-wish. Ano ang ibig sabihin ng panaginip kong ito?

Naghihintay,

Catherine

Sa iyo, Catherine,

Tayong mga Pinoy ay may paniniwala na kapag humiling sa bulalakaw, ang nag-wish ay susuwertehin na matupad ang kanyang wish. Pero sa totoo lang, sa buong mundo ay may paniniwala ring ganito, kaya mahirap balewalain ang nasabing paniniwala ng mga tao.

May mga nagpatunay na nagkatotoo ang wish nila. ‘Yung isang kaibigan ko, ang hiling ay bumalik ang boyfriend niya dahil naagaw ng iba. Laking-gulat niya dahil tatlong araw pagkatapos niyang humiling, nagkabalikan na sila.

At ang kuwento niya ay mahirap paniwalaan dahil sabi niya, may binayaran siyang manghuhula, pero wala namang nangyari sa gusto niya na magkabalikan sila ng kanyang boyfriend. Dagdag pa niya, tatlong beses siyang hiningan ng pera, pero wala rin siyang napala.

Tapos, may isang nagsabi na sa pamamagitan ng gayuma, puwedeng bumalik sa kanya ang boyfriend niya, kaya lang, magbabayad siya ng P2,000 para sa gayuma. Bumili naman siya dahil talagang mahal na mahal niya ang boyfriend niya, pero ganundin, hindi epektibo ang gayuma na nakalagay sa boteng maliit.

Nasiraan na siya ng loob at sobrang lungkot na niya. Sabi niya, wala na kasing pag-asa na magkabalikan pa sila ng boyfriend niya. Gayundin, sabi pa niya, ikinunsidera na niyang magpaligaw sa iba at handa na siyang magmahal ng iba. Saka sabi pa niya, ‘pag nagka-boyfriend ulit siya, kahit paano ay sasaya na siya.

Nakipag-date na siya sa iba, pero nandu’n pa rin sa puso niya ang kanyang boyfriend. Nang malaman ng boyfriend niya na nakikipag-date na siya sa iba, laking-gulat niya dahil nagbalik ang boyfriend niya. Ngayon, sila na ulit!

Ayon sa kuwento niya, noong mga gabing hindi siya makatulog, nakatitig lang siya sa langit na parang nakatulala dahil sa sobrang lungkot, tapos may nakita siyang bulalakaw na nagdaan. Nang makita niya ang bulalakaw, naalala niya na kapag humiling dito, ang wish ay magkakatotoo.

Kaya lang, wala na ‘yung bulalakaw na nakita niya nang maisip niyang humiling. Pero kakaibang sigla ang bigla niyang nadama, nakatitig pa rin siya sa langit pero hindi na kasing lungkot nu’ng una dahil bigla siyang sumigla.

Bago mag-madaling-araw, nakatitig pa rin siya sa kalangitan nang may isang bulalakaw na nagdaan ulit at sinabi niya ang kanyang hiling. Umaga na ngunit gising pa siya, pero nakalimutan na rin niya ang tungkol sa bulalakaw.

Mga tatlong araw ang lumipas, nag-message sa kanya ang lalaking mahal na mahal niya. Hindi niya alam kung magre-reply siya o hindi, pero biglang naalala niya ang bulalakaw na nakita niya noong madaling-araw. Hindi pa rin siya makag-reply, pero sa huli, sinabi niya, “Kumusta ka rin?” Simula noon, mga love notes na ang isinesend ng boyfriend niya at nagkabalikan na sila.

Hindi lang ‘yan ang kuwento ng nagkatotoo ang hiling sa mga bulalakaw dahil ang mga nagkaproblema na may kaugnayan sa pampinasyal ay natulungan din ng mga bulalakaw. May mga kuwento rin na dahil sa bulalakaw ay nakahanap ng trabaho ang isang hindi matanggap-tangap sa kumpanya.

Sa panaginip ay ganundin ang kahulugan kung saan ang bulalakaw ay may dalang suwerte sa tao. Ang kaibahan lang ay sa panaginip, hindi na kailangang humiling dahil ang nakapanaginip ng bulalakaw ay makararanas ng pagdagsa ng mga buwenas o magagandang kapalaran na tiyak na magaganap sa susunod na mga araw, lalo na sa panahong ngayong nalalapit na ang Kapaskuhan.

Hanggang sa muli,

Professor Seigusmundo del Mundo

Paalalang makinig sa babala para ‘di mapahamak

ni Seigusmundo Del Mundo - @Panaginip, salamin ng inyong buhay | December 16, 2020

Salaminin natin ang panaginip ni Maricris na ipinadala sa Facebook Messenger.

Dear Professor,

Ang tanong ko ay tungkol sa panaginip ng asawa ko. May kaibigan siya na namayapa na noong November 14. Nasa ibang bansa ang asawa ko ngayon, tapos napaniginpan niya ‘yung kaibigan niya na niyakap siya at sinabing sa January 22, babalian siya ng buto. Bumaba lang daw siya para sabihin sa kanya ‘yun.

Ano ang ipinapahiwatig ng panaginip niyang ito? Sana ay masagot n’yo ako dahil nag-aalala ako kasi nasa ibang bansa ang asawa ko.

Naghihintay,

Maricris

Sa iyo, Maricris,

Una, dapat mag-ingat ang asawa mo, lalo na sa araw na sinabi ng kaibigan niya sa kanyang panaginip at huwag kang gaanong mag-alala dahil ang ilang panaginip tulad ng tinutukoy mo ay isang babala.

Pero talaga rin namang hindi maiiwasang ikaw ay mag-alala dahil siya ay iyong asawa at nasa malayong lugar. Gayunman, muli, ang panaginip na ito ay isang babala. May mga nag-aakala na dahil napanaginipan ay agad-agad na magkakatotoo dahil ang panaginip minsan ay napagkakamalang hula.

Ano ba ang kaibahan ng babala sa hula?

Ang babala ay puwedeng hindi mangyayari dahil ito ay isang babala lamang, pero ang hula ay tiyak na mangyayari. Minsan, ang babala ay magiging katuparan ng hula dahil kung hindi pakikinggan ng tao ang babala, tiyak na mangyayari ito.

Napansin mo ba ang mga nakalagay na babala sa mga kalsada, “Mag-ingat! Marami na ang namatay dito” o kaya “Bawal tumawid! Gamitin ang footbridge!”

Kung hindi makikinig ang tao, mapabibilang siya sa mga naaksidente, pero kung susundin niya ang babala, ‘di ba, hindi naman siya mapapahamak?

Dahil dito, bukod sa mismong petsa na January 22, ang iyong asawa ay pinag-iingat din sa mga petsang kung tawagin ay “Numero Kuwatro” tulad ng ika-4, 13, 22, at 31 at siya rin ay pinag-iingat sa mga petsang ika-8, 16 at 26 o mga “Numerong Otso”.

Minsan, ang mga numero ay nag-aanyong tao. Oo, iha, kahit hindi aktuwal na petsa o numero, may tinatawag na Taong Kuwatro at Taong Otso, kaya dapat ding pag-ingatan ng asawa mo ang mga ganu’ng klaseng mga tao.

Muli, iha, ang hindi nakikinig sa mga babala ay maaaring mapahamak at ang babala, kapag binalewala, ito rin ay magiging isang hula na anumang sandali ay maaaring matupad at magkatotoo.

Hanggang sa muli,

Professor Seigusmundo del Mundo

Nakita ang yumaong lolo, senyales na pinaghaharian ng negatibong pananaw

ni Seigusmundo Del Mundo - @Panaginip, salamin ng inyong buhay | December 15, 2020

Salaminin natin ang panaginip ni Doris na ipinadala sa Facebook Messenger.

Dear Professor,

Nakita ko ‘yung lolo ko, pero matagal na siyang patay, nakita ko siya na kulay gray. Tapos ‘yung sa dating lugar namin sa likod ng casino sa Clark, may malalaking usok na paparating at kulay itim. Kapag nakalapit, parang naging insekto, tapos napapatay naman, tapos natulog kami kasama ang mister ko at lumindol ng palakas nang palakas at nawala rin.

Masama ba ‘yun? Noon kasi, nakapanginip ako ng kabaong, tapos nagkasunud-sunod ang patay dito malapit sa lugar namin. Salamat!

Naghihintay,

Doris

Sa iyo, Doris,

Alam mo, pangkaraniwan lang naman, lalo na ngayong marami ang namamatay. Pero walang kinalaman ang mga patayan at namatay sa iyong panaginip kahit minsan ay nakapanaginip ka ng kabaong ay nagkasunud-sunod ang patay sa inyo. Gayunman, ang iyong panaginip tungkol sa lolo mo na patay na ay nagsasabing ngayon ay pinaghaharian ka ng negatibong pananaw.

Masasabing sobrang lungkot kung saan ang maaaring dahilan ay iniisip mo na parang walang pag-asa na matupad o gumanda pa ang iyong buhay. Dahil dito, narito ang ilang pananaw na maaaring makatulong sa iyo.

Dapat panatilihin mong buhay na buhay ang ningas ng iyong pag-asa kahit gaano pa kaliit ang ningas na ‘yun. Mangarap ka dahil mahalaga sa tao ang nangangarap o may pangarap. Subukan mo at makikita mong hindi ka na makakapanaginip ng kabaong at mga patay na.

Ang mga napapanaginipan mo na ay ang magagandang bagay na may kaugnayan sa iyong mga pangarap na nagsasabing ipinauuna ng mapapanaginipan na malaki ang tsansa na maabot mo ang iyong mga pangarap.

Samantala, ang taong walang pangarap ay wala ring mararating, kumbaga, mabubuhay na lang siya sa kasalukuyan kung saan magtitiis siya sa kahirapan at kalungkutan. Hindi ito magandang mangyari sa tao dahil tao lamang sa lahat ng may buhay sa mundo ang binigyan ng pagkakataon na iguhit sa kanyang mundo ang kanyang kinabukasan.

Pagmasdan mo ang mga hayop, hindi ba, kain-tulog lang sila? Ang mga halaman, kahit pa may magagandang bulaklak, masasabing hanggang doon na lang sila. Ibang-iba ang tao dahil sila ay may tinatawag na “Gift of Dreaming” —sila lang ang may pangarap.

Huwag mong sayangin ang regalong ito ng Dakilang Manlilikha, kaya mangarap ka nang mangarap. Ikaw ay tao at hindi ka hayop o halaman at sa mga pangarap mong ito magsisimula ang napakaganda at maligayang buhay.

Hanggang sa muli,

Professor Seigusmundo del Mundo