Pahiwatig na may kakayahang magbigay-babala sa mga tao kung may mangyayari sa mundo

ni Seigusmundo Del Mundo - @Panaginip, salamin ng inyong buhay | February 4, 2021

Salaminin natin ang panaginip ni Alona na ipinadala sa Facebook Messenger.

Dear Professor,

Naisipan kong sumangguni sa inyo dahil worried ako sa aking panaginip. Pagkatapos kong magdasal noong nakaraang buwan, nanaginip ako ng may malakas na bagyo at tsunami saka may tatamang bulalakaw sa mundo at kapag tumama ito, sapol na sapol ang ibabaw ng mundo.

Naghihintay,

Alona

Sa iyo, Alona,

May mga taong nabibiyayaan ng tinatawag na “apocalyptic dreams.” Sila ang mga nananaginip ng mangyayari pa lang at ang kanilang mga panaginip ay may kaugnayan sa magaganap sa mundo at sangkatauhan.

Sa biglang tingin, ikaw ay parang napabilang sa kanila. Gayunman, ang pagkakaroon ng bagyo ay natural na nangyayari sa buong mundo, lalo na sa ating bansa. Ang tsunami naman ay ganundin, hindi man kadalasan ay hindi nakapagtataka kapag nangyayari.

Ang mga bulalakaw ay araw-araw ding makikitang nahuhulog sa lupa. Marami sa kanila ay natutunaw bago sumayad sa mismong lupa, pero minsan ay hindi maiwasan na may maliliit na piraso na aktuwal na nahuhulog sa lupa.

Dahil sa maliliit hanggang sa sobrang maliit, hindi na sila nasasagap ng mga instrumento na nagbabantay sa mga bulalakaw na tatama sa lupa. Madalas, ang mga bahagi ng bulalakaw ay sa karagatan nahuhulog dahil ang dagat ay sa totoo lang, mas malawak kaysa sa kalupaan, kumbaga, dahil malawak ang tsansa na dagat ang makasapo nito.

Minsan, nahuhulog din ito sa kalupaan at ito ay parang bato sa tingin, pero sobrang tigas at may makikitang sunog na bahagi. At alam mo, iha, ang makapulot ng kahit isang maliit na piraso ng bulalakaw ay puwedeng yumaman dahil milyong piso ang halaga nito.

Muli, maaaring isa ka sa mga iilang mga tao na nabiyaan ng kakayahang makapanaginip ng mangyayari pa lang sa mundo. Gayunman, sa kuwento ng panaginip mo, walang nabanggit kung kailan o walang ipinahiwatig na palatandaan kung paano at kailan ito magaganap.

Ang mga taong ginagamit ng langit na managinip ng magaganap sa mundo ay may kalakip na responsibilidad na magbigay ng warning o babala para ang mga tao ay magbago o makapaghanda.

Dahil dito, sa kakapusan sa impormasyon ng iyong mga panaginip, hindi muna natin sasabihin na ito ay isang pabalita mula sa langit.

Huwag kang masiraan ng loob o mag-isip ng negatibo na ikaw naman pala ay hindi ginagamit ng langit para makapagbigay ng mahahalagang mensahe para sa mga tao. Kumbaga, hihintayin pa natin ang mga darating mong panaginip na maaaring mas malinaw kung kailan at paano ang mga pangyayari bago ang malakas na bagyo at tsunami at ang pagbagsak ng bulalakaw sa mundo.

Hanggang sa muli,

Professor Seigusmundo del Mundo

Sandals, pahiwatig na kailangang magpatuloy sa pagsisikap kahit pagod na

ni Seigusmundo Del Mundo - @Panaginip, salamin ng inyong buhay | February 3, 2021

Salaminin natin ang panaginip ni Stephanie na ipinadala sa Facebook Messenger.

Dear Professor,

Nais kong malaman kung ano ang ibig sabihin sinusuotan ng sapatos sa panaginip? Ganito ang nangyari, nakaupo ako at may lumapit sa akin, tapos isinuot niya sa akin ang sandals na kulay brown at itinali sa paa ko. Para siyang sandals na bukas sa bandang daliri at may tali.

Naghihintay,

Stephanie

Sa iyo, Stephanie,

Sa buhay ng tao, dumarating ang sandali na siya ay parang gusto nang huminto o huwag nang magpatuloy pa sa pagsisikap, kaya naman nais na niyang tumigil sa paghahanapbuhay. At minsan naman, siya ay parang pagod, sawa na at nawawalan ng sigla at pag-asa.

Ito ang dahilan kaya may vacation leave, day off o rest day kung saan ang tao ay tao lang na napapagod, nagsasawa at nababagot din.

Pero may mga tao na kahit pagod, sawa at bagot na bagot na, kailangan niyang

magpatuloy dahil sa iba’t ibang rason o dahilan, tulad ng mga sumusunod:

1. Hindi pa niya natutupad ang kanyang pangarap.

2. May umaasa sa kanya, maaaring ang kanyang mga magulang, kapatid at kadalasan ay ang kanyang mga anak. May mga pagkakataon pa nga na ang kanyang karelasyon o asawa ay magmumukhang kaawa-awa kapag ang nanaginip ay huminto na sa pagsisikap.

3. Minsan naman, ang pangit na sitwasyon sa place of work ang nagtutulak sa kanya para huminto na.

May iba pang dahilan, pero kapag bata pa naman ang isang tao, hindi papayag ang langit na huwag siyang magpatuloy. Sa ganitong katotohanan, sa iyong panaginip, ang nangyari nga ay lumitaw ang isang tao at isinuot sa iyo ang sandals na simbolo na kailangan mong magpatuloy.

Alam mo, iha, ang mahiwagang tao sa iyong panaginip ay walang iba kundi si Lord, siya ang may gusto na magpatuloy ka pa. Tatanggi ka ba? Siyempre, hindi!

Kaya anuman ang iyong sitwasyon ngayon sa buhay, huwag kang huminto at susuko. Sa halip, magpatuloy ka dahil si Lord mismo ang gagabay at papatnubay sa iyo, anuman ang iyong ginagawa at pinagkakaabalahan ngayon.

Hanggang sa muli,

Professor Seigusmundo del Mundo

Paalala na muling mag-rosaryo araw-araw kasama ang mga kapatid

ni Seigusmundo Del Mundo - @Panaginip, salamin ng inyong buhay | February 2, 2021

Salaminin natin ang panaginip ni Arlene na ipinadala sa Facebook Messenger.

Dear Professor,

Gusto kong malaman ang ibig sabihin ng mga panaginip ko tungkol kay Mama Mary. Sa panaginip ko, pumunta ako sa isang grotto at nandu’n ang malaking rebulto ni Mama Mary. Habang nakaluhod ako, narinig kong may sinasabi Siya, pero hindi ko maintindihan dahil maingay ang mga tao na nagse-selfie. Bawal sa lugar na ‘yun ang mag-ingay, kaya naisip ko bakit kaya maiingay sila? At nang matahimik na, narinig ko na rin si Mama Mary, sabi Niya, magdasal ako ng rosary tuwing bago ako matulog. Paulit-ulit ‘yun, halos every day, napanaginipan ko ‘yung ganu’ng sitwasyon, kasi noon, nagdarasal kaming magkakapatid bago matulog dahil ‘yun ang itinuro sa amin ng lola namin. Wala na kaming nanay dahil nagkasakit siya at namatay, 16-anyos ako noong namatay si mama at tatlong magkakapatid kami, dalawang babae at isang lalaki.

Ano ang mensahe ni Mama Mary sa panaginip ko?

Naghihintay,

Arlene

Sa iyo, Arlene,

Tama ka, may mensahe nga para sa iyo si Mama Mary at ito ay nagsasabing magdasal ka ng rosary bago matulog. May dahilan ang lahat ng bagay at kaya pinagdadasal ka ni Mama Mary ay dahil sa panahon ngayon o sa mundo ng mga millennial, halos wala nang nagdarasal bago matulog.

Sabi nga, ang mundo sa panahon ng mga millennial ay sobrang maunlad, kumbaga, malayo na ang narating ng tao kaya ayon sa kanila, ngayon ang panahon ng “Golden Age of Knowledge.”

Pero sa totoo lang, ito ay sa biglang tingin lang, kumbaga, sa malalim na pagsusuri, ang mga tao sa panahon ngayon ay hindi naman naging sobrang engot, pero humina nang husto ang kanilang pag-iisip. Noong hindi pa uso ang mga gadgets, lalo na ang mga cellphone, ang mga tao ay matalas ang memorya kumpara ngayon na nakaasa na lang sa gadgets.

Kapag matalas ang memorya ng tao, siya ay masasabing matalino. Noon, ang mga number ng phone ay kabisado ng mga tao kahit gaano pa karami ang kanilang contacts. Ngayon sa totoo lang, kahit ang sariling number ay hindi na minememorya dahil naka-save naman sa cellphone.

Kaya ang mga makabagong gamit ngayon ay malungkot mang sabihin, pero they retard the memory process. Dahil dito, sa bandang huli, darating ang panahon wala nang magmememorya o magkakabisa dahil ang lahat ay naka-save na sa dala-dalang gadget.

Gayunman, mahirap nga lang paniwalaan, pero ito ay alam ng mga siyentista na ang utak ng tao liliit nang liliit dahil ang bahagi na ginagamit sa pagmemorya ay hindi na gagana at tuluyan na ring mawawala.

Ang isa pang mahirap paniwalaan, pero isang katotohanan ay bibihira na rin ang nagdarasal. Marami ang aangal dahil sasabihin nilang nagdarasal sila, pero ang totoo, ang dasal ng mga tao ngayon ay hindi naman talaga prayers kundi ang totoo nito ay mga sari-saring request lang. Oo, mga hiling na pangkatawan o makamundong bagay.

Ang nakatutuwa pa sa tao, nagre-request o nagdarasal lang kapag sila ay may problema at pangangailangan o kapag may sakit na iniinda at kapag sila ay iniwan ng kanilang mga karelasyon.

Kaya sabi ni Mama Mary sa iyong panaginip at ayon din naman sa iyo ay paulit-ulit na almost every day ay napapanaginipan mo, simulan mo na ulit ngayon ang pagdarasal kay Mama Mary.

At sa panahong ito ng pandemya, tunay ngang mas maganda kung hikayatin mo ang mga kakilala mo, lalo na ang mga ulila na tulad n’yong magkakapatid na mag-alay ng mga panalangin kay Mama Mary.

Mas maganda at magiging epektibo kung magsasama-sama kayo sa isasagawa n’yong sabayang pagdarasal ng Santo Rosario.

Hanggang sa muli,

Professor Seigusmundo del Mundo