Senyales na kayang pagalingin ang mahal sa buhay na may sakit at paalala na ...

Laging mag-rosaryo at magsimba

ni Seigusmundo Del Mundo - @Panaginip, salamin ng inyong buhay | February 7, 2021

Salaminin natin ang panaginip ni Bhea na ipinadala sa Facebook Messenger.

Dear Professor,

Ano ang nais iparating sa akin ng Mahal na Birhen? Napanaginipan ko kagabi ang Mahal na Birhen ng Rosaryo. Nakarating ako sa isang simbahan at may isang matandang babae na manggagamot, pero sa hindi ko maipaliwanag dahilan, madilim ang aking paningin. Sinusubukan kong aninagin ang gusto kong makita, pero nang balikan ko ng tingin ang matandang manggagamot, wala na siya. Tapos paglabas ko ng simbahan, saka ko lang naintindihan na ang pinasok ko ay simbahan ng Mahal na Birhen ng Rosaryo at napapalibutan siya ng maraming anghel. Sana ay masagot n’yo ako. Salamat!

Naghihintay,

Bhea

Sa iyo, Bhea,

Ayon sa iyong panaginip, ikaw ay may tinatawag na “gift of healing,” ibig sabihin, puwede mong mapagaling ang may sakit at ang kakayahan mong ito ay kaloob sa iyo ni Virgin Mary.

Gayundin, ayon sa panaginip mo, may mahal ka sa buhay na may sakit o ang isang malapit sa puso mo ay may dinaranas na karamdaman ngayon. Dahil dito, kailangan ka niya at may kakayahan kang pagalingin siya sa sandaling dalawin mo siya. Dagdag pa rito, gaganda ang kanyang kalusugan kung ikaw ay nasa tabi niya o kaya naman, kapag nahawakan mo ang kanyang kamay, siya ay unti-unting lalakas.

At dahil mula kay Virgin Mary ang iyong gift of healing, ikaw ay pinapayuhan na palaging magdasal ng rosary at palagi kang magsisimba sa mga simbahang nakasentro ang pananalig at debosyon kay Virgin Mary.

Hanggang sa muli,

Professor Seigusmundo del Mundo

Senyales na bagot sa buhay dahil oks na oks ang married life

ni Seigusmundo Del Mundo - @Panaginip, salamin ng inyong buhay | February 6, 2021

Salaminin natin ang panaginip ni Lannie na ipinadala sa Facebook Messenger.

Dear Professor,

Magkasama kaming lumabas ng bahay ng aking asawa. Noong nasa labas na kami, bigla niya akong iniwan at akala ko ay binibiro lang niya ako, pero habang hinahabol ko siya, lalo niyang binilisan ang kanyang takbo at hindi natinag kahit tawagin ko siya.

Hindi ko kinaya dahil sobrang pagod ako sa katatakbo para habulin siya. Napapaiyak na ako sa sama ng loob sa ginawa ng asawa ko. Tapos, nu'ng nasa malayo na siya, kitang-kita ko na pinagtatawanan niya pa ako, tapos ipinagpatuloy niya ang pagtakbo.

Ano ang kahulugan ng panaginip kong ito?

Naghihintay,

Lannie

Sa iyo, Lannie,

Alam mo, iha, nakakasawa ang matatamis na pagkain, kumbaga, sabi nga nila, nakakaumay ang paulit-ulit na pagkain ng masasarap na pagkain. Ganyan mismo ang nararanasan mo ngayon, kung saan sa aminin mo man o hindi, sawa ka na sa masayang buhay na inyong pinagsasaluhan ng iyong asawa.

Ang isa pang masasalamin sa panaginip mo ay ang katotohanan na may katagalan na ang panahon nang ikaw ay huling naiyak, as in, hindi ka naiiyak ngayon at ang nakikitang dahilan ay ang matamis na pagsasama n'yo ng mister mo.

Ganito ang katotohanan sa likod ng mga panaginip na kapag naiyak sa panaginip, ibig sabihin ay matagal ka nang hindi naiiyak sa walking life mo. Kaya kapag nanaginip ng hindi maganda, ang pagsasama sa pagitan ng nanaginip at kanyang asawa, ibig sabihin ay matagal nang hindi nagkakasamaan ng loob ang dalawa.

Kaya ang kabuuan ng iyong panaginip ay nagsasabing, ang buhay mo ay boring, as in, bagot na bagot ka na sa araw-araw na galaw at takbo ng iyong buhay.

Para magamot mo ang pagkabagot na ito, narito ang ilang rekomendasyon:

• Pagdating ng iyong mister, huwag mo munang kibuin, pero maya-maya ay kibuin mo na rin.

• Ipagluto mo siya ng hindi masarap, mas maganda kung mas maalat. Sa kape naman, kunwari ay nakalimutan mong lagyan ng asukal.

• Sa gabi, matulog ka nang nakatalikod sa kanya.

• Huwag mo rin siyang gisingin sa umaga. Hayaan mong magising siya nang kusa at huwag mo ring ipaghanda ng agahan.

• Wala ring kiss bago siya umalis.

• Huwag mong kumustahin o kunwari ay nakalimutan mong magtext dahil hindi mo makita ang cellphone mo.

Gawin mo 'yan, iha, dahil ang mga ito ang kailangan mo nang sa gayun ay magkaroon ng gap ang maganda n'yong pagsasama.

Ito rin ang magsisilbing daan upang pagkatapos ng lahat ay maging mas sweet as ever ang iyong marriage life.

Hanggang sa muli,

Professor Seigusmundo del Mundo

Babala na maii-scam ‘pag naniwala sa mabilisang pagpapayaman

ni Seigusmundo Del Mundo - @Panaginip, salamin ng inyong buhay | February 5, 2021

Salaminin natin ang panaginip na ipinadala ni Emma sa Facebook Messenger.

Dear Professor,

Sa panaginip ng asawa ko, nakauwi na siya rito sa ‘Pinas. Nang pupuntahan niya kami, tinawag siya ng kaklase niya noong elementary na pulis na ngayon at nagpabunot siya at sinabing, “May mapapanalunan ka. Puwede kang manalo ng white gold.” Sumagot siya ng, “Sige, P100, ibibigay ko sa iyo ang panalo ko.” Inabot ng mister ko ang P100 at sabi niya, nanalo kami. Sa 5 bunot, 4 ang nakuha namin.

Nagulat siya dahil ang napanalunan niya ay mga ipit na pambabae, tapos hindi niya na ‘yun kinuha dahil pakiramdam niya ay niloko siya dahil ang usapan ay gold ang mapapanalunan. Tapos may lumapit sa kanyang 2 Chinese na babae na bumibili ng pampasuwerte sa nagtitinda raw ng ginto at ‘yung isa ay parang bling-bling na korona at may dragon na design ‘yung kuwitas. ‘Yung isa ay pulseras na dragon ang design. Biglang lumapit ‘yung matandang Chinese, kinuha niya ang tatlong pampasuwerte at pinagdikit-dikit niya at naging maliit na tigre, kasing-laki ng aso na bagong panganak, pero tigre siya dahil orange, black at white ang kulay. Nagulat ang mister ko dahil ibinigay ‘yun sa kanya. Ano ang ibig sabihin nito?

Naghihintay,

Emma

Sa iyo, Emma,

Masasalamin sa kanyang panaginip na nananabik ang asawa mo na makauwi. Kumbaga, gustung-gusto na niyang makapiling ka. Para siyang nagmamadali at hindi makapaghihintay pa na muli kang makita.

Kitang-kita rin na ang pangunahing pangarap niya ay umasenso kayo, as in, gumanda ang buhay n’yo. Gayunman, ang babala ng kanyang panaginip ay nagsasabing huwag na huwag kayong matutukso sa mabilisang pagpapayaman dahil puwede kayong mai-scam o maloko ng malaking halaga.

Kaya ingatan n’yong makipagsapalaran sa mga nag-aalok ngayon kung saan sinasabing madali lang kumita o yumaman, pero sa huli ay scam pala.

Muli, gustung-gusto ng mister mo na kayo ay umasenso. Nasa kanyang panaginip ang susi ng inyong pagyaman. Oo, iha, wala sa mabilisang pagpapayaman kundi nasa maliit na negosyo hanggang sa lumaki ito nang lumaki. Ito rin ang simbolo ng maliit na tiger sa kanyang panaginip

Dagdag pa rito, alam mo, Emma, sa mga Tsino, ang simbolo ng business empire ay tiger kaya muli, mula sa maliit ay magiging malaking-malaking negosyo ang tiyak na maitatayo n’yong mag-asawa.

Hanggang sa muli,

Professor Seigusmundo del Mundo