Kering-keri dahil sa socmed… Paano malalaman na single na ang isang tao?

ni Mharose Almirañez | October 21, 2022

Naaalala n’yo pa ba kung paano umingay sa social media ang isyu tungkol sa hiwalayang Carla-Tom, LJ-Paolo, Kylie-Aljur at iba pang celebrity couple? Eh ang usap-usapang hiwalay na rin sina Heart Evangelista at Chiz Escudero dahil tinanggal na ng aktres ang apelyido ng senador sa kanyang Instagram?

Ganyan kabilis kumalat ang tsismis. Palibhasa, modern era na tayo, kaya high-tech na rin ang paraan ng break up. Ito ‘yung panahon kung saan puwede nang magka-access sa ‘yong private life ang kahit sino sa pamamagitan lamang ng pang-i-stalk sa ‘yong social media profile. Mapa-showbiz o non-showbiz personality ka man, mayroon kang online friends and followers na palaging nakaantabay sa bawat update sa iyong timeline. Kaya cryptic post man ‘yan, nadi-distinguish agad ng mga ‘Marites’ na tambay sa social media ang iyong pinagdadaanan—partikular sa ‘yong love life, sa pamamagitan lamang ng mga sumusunod na signs:

1. ‘PAG NAG-DEACTIVATE KA NG ACCOUNT. ‘Yung tipong, hindi ka naman low-key person, pero bigla kang naging invisible sa social media. Let’s say, Facebook friend tayo, tapos nag-deactivate ka, rito na magsisimula ‘yung mga haka-hakang nasa healing process ka.

2. ‘PAG NAGPALIT NG ITIM NA PROFILE PICTURE. Karamihan sa naka-itim na profile picture ay mga namatayan ng kamag-anak at nasa stage ng pagluluksa. Mayroon din namang ilan na gumagamit nito upang ipaalam sa kanyang friends and followers na something bad is going on.

3. ‘PAG NAGPAIKLI NG BUHOK. Very common ito sa kababaihan. ‘Yung tipong, ipe-flex pa nila ang pagpapagupit sa kanilang ‘my day’ o Instagram stories. Ginagawa ito by showing that they’re cutting ties over someone.

4. ‘PAG IN-UPDATE MO ANG IYONG PROFILE WITHOUT ANY TRACE OF HIM/HER. Halimbawa, mula sa public status na “in a relationship” ka sa kanya, tapos bigla mo itong ini-hide sa iyong profile. Puwede ring, kapag hindi mo na siya isinama sa iyong bio.

5. ‘PAG PURO MEMES O HUGOT NA ANG TIMELINE. Kung noon ay puro tag, mention or picture n’yo ng bebe mo ang laman ng iyong timeline, ngayon ay natabunan na ‘yun ng memes and cryptic posts.

6. ‘PAG BURADO NA ANG PICTURES NIYA. Kumbaga, hindi mo na siya pini-feature sa iyong story highlights. Naka-hide na rin maging ang mga picture niya at picture n’yo sa iyong account.

7. MAY PAG-UNFOLLOW/UNFRIEND NA NAGAGANAP. Madali lamang makumpirma kung friends pa n’yo ang isa’t isa sa pamamagitan ng search box, kaya mag-ingat sa mga Marites na walang ibang ginawa kundi abangan kung kailan kayo magbe-break. Typical movement ang pag-a-unfollow sa mga artista, kaya kung sinimulan mo nang i-unfollow ang iyong karelasyon, naku, gets na nila ‘yan!

8. ‘PAG MADALAS NANG MAG-CHAT SA GC. Samantalang dati, hindi mo man lang magawang mag-seen at magbasa sa inyong group chat dahil puro ka ‘bebe time’. Pero ngayon, ang ingay-ingay mo na at ikaw na itong madalas mag-open ng topic. ‘Yung tipong, nagyayaya ka na ring gumala at mag-inom, kaya obvious na hindi ka okey.

9. ‘PAG NAGSIMULA NANG MAG-SELF LOVE. Finally, pala-post ka na ulit ng selfie, travel, food at inspirational quotes with the #Selflove. ‘Yun bang, positive outlook ka, pero para kang palaging may gustong patamaan at patunayan sa mga post mo.

10. ‘PAG NAGING ACTIVE KA NA ULIT SA DATING APP. Kung dati kang suki ng online dating, heto nga’t nagsisimula ka nang magbalik-loob. Searching for bagong trauma o rebound ang bago mong peg.

Minsan, may mga relasyong hindi pa naman talaga tapos, pero tuluyan nang natatapos dahil sa pangunguna ng mga taong nakapaligid sa inyo. ‘Yung tipong, kahit gusto mo pang ayusin ay lalo lamang nasisira dahil sa pakikisali o pakikisawsaw ng mga taong palaging may sey sa inyong relasyon.

Kaya naman sa susunod na makikipagrelasyon ka, mainam kung magpaka-low-key kayo. Huwag mong i-post ang bawat ganap sa inyong relasyon upang maging clueless sila. Hindi naman kasi porke hindi mo pine-flex sa socmed ang iyong dyowa ay hindi mo siya mahal o hindi ka proud sa kanya. Magkaiba kasi ‘yung private sa secret relationship.

Okie?

Tight ang budget? Keri ‘yan! Tipid tips kung gusto ng bonggang kasal

ni Mharose Almirañez | October 2, 2022

Ready na ba kayong magpakasal, pero tight ang budget? Civil wedding ang pinaka-praktikal na paraan upang mapakasalan ang taong mahal mo, without breaking your funds.

Batay sa Article 6 of the Family Code, “There is no prescribed form or religious rites required for wedding ceremonies.” Kaya paniguradong valid ang inyong civil wedding, hindi man ‘yan ginanap sa simbahan o hindi man pari ang nagkasal sa inyo.

Ang pinakamahalaga sa kasal ay ang presensya ng dalawang taong nagmamahalan, ang magkakasal na judge o mayor at ang ilang saksi sa inyong pag-iisang dibdib.

Ngunit paano kung gusto mong magkaroon ng isang magarbo, pero ‘di mukhang tinipid na civil wedding? Narito ang pitong tips:

1. MAG-SET NG BUDGET. Natututo tayong maging resourceful kapag nag-i-stick tayo sa specific amount. Mahalagang maglaan tayo ng mas maraming budget para sa mga kakailanganin pa natin after the wedding. Huwag ubos-biyaya, tapos bukas ay tunganga. Karamihan kasi sa mga ikinakasal ay masyado silang nao-overwhelm sa mga ino-offer sa kanila ng supplier, hanggang sa tumaas nang tumaas ang kanilang expenses. Ask yourselves, “Hanggang magkano ba ang kaya namin?”

2. MAG-RESEARCH. Bago ka kumuha ng wedding organizer, mainam kung mag-research ka muna dahil napakaraming tutorials, ideas and DIY tips na puwedeng makita online. Alamin mo rin ang bawat proseso at mga dokumento na kailangan sa civil wedding. Katulad ng article na ito, paniguradong matutulungan kitang magkaroon ng isang magarbo, pero ‘di mukhang tinipid na civil wedding.

3. ‘WAG MAGPAKASAL ‘PAG HOLIDAY. Isa sa perks ng mga empleyado ang magpahinga tuwing holiday, sapagkat bayad naman ang araw nila kahit hindi sila pumasok. Eh, kung magdu-duty nang holiday ang mga staff ng supplier mo, aba’y malamang na double pay ‘yan! So, kung double pay ang pasahod ni supplier sa mga staff niya, siguradong doble rin ang presyo ng package offer niya sa inyo. Sa halip na sumabay sa peak season, mainam kung mag-set kayo ng wedding date tuwing patay na petsa. Mag-abang ng promos online.

4. SAME LOCATION ANG WEDDING CEREMONY & RECEPTION. Kumpara sa church wedding na mayroong pari— ang civil wedding ay ginaganap lamang sa loob ng munisipyo, kung saan tanging judge o mayor ang puwedeng magkasal. Since mayroon naman kayong kainan matapos ang kasal, puwedeng du’n n’yo na rin ganapin ang wedding ceremony. Halimbawa, garden set up, para pagkatapos ng seremonya ay hindi na babiyahe ang inyong guests papuntang wedding reception dahil du’n na rin sila mismo kakain at magpa-party.

5. ‘YUNG MAY AMBAG LANG SA LOVE STORY N’YO ANG MGA IMBITAHIN. Huwag n’yong papuntahin ang buong barangay sa inyong kasal dahil paniguradong masu-short kayo sa budget. Karamihan kasi sa ibang bisita, ang habol lamang sa kasal ay ‘yung pagkain at pang-IG stories, ganu’n. Pero makalipas ang ilang oras na programa, maiinip na ang mga ‘yan at magyayayang umuwi. Samantalang, ‘yung mga taong close sa bride at groom ay malamang na mag-stay hanggang matapos ang program dahil sila ‘yung may ambag sa relasyon nu’ng ikinasal. Alam nila ‘yung journey n’yo as a couple, kaya paniguradong masayang-masaya sila para sa inyo.

6. GUMAWA NG E-WEDDING INVITATION. High tech na tayo ngayon, beshies, kaya huwag na kayong magpa-print ng sandamakmak na invitation dahil puwede ka namang gumawa ng sarili mong design para sa inyong wedding invitation na maaari n’yong i-send sa inyong guest via chat o personal message. Isipin mo na lamang na kung magpapa-print ka ng marami, tapos hindi naman pala lahat ay makakapunta, sayang lang. Make sure na magko-confirm silang pupunta para masama sila sa head count. Gawin mo ring specific kung para kanino lamang ang invitation dahil baka i-forward nila kung kani-kanino ang e-invitation, at bawat isa ay magsama pa ng plus 1 na hindi naman kasama sa guest list. Aba’y yari na talaga!

7. GAMITIN ANG CONNECTIONS. Napakalaking tulong ng connections para maka-menos sa gastos. Halimbawa, may kaibigan kang photographer— na may kakilalang videographer—na member ng isang production team— na gusto mong mag-cover para sa wedding n’yo. Gayundin, kung may common friend kang may connection sa reception na puwedeng mag-cater ng food at puwedeng maging supplier ng cake, flowers, tables and chairs, atbp. Kung may friend kang marunong mag-make up, mag-ayos ng buhok o fashionista, aba’y puwedeng-puwede kayong mag-ask ng help sa kanila for collaboration para sa x-deal or special discount. Connection is the key, beshie.

Bawat kababaihan ay pinangarap na makapagsuot ng traje de boda at makapaglakad papuntang altar. ‘Yung tipong, malayo ka pa lang ay tanaw na tanaw mo na ang ngiti sa labi ng iyong mapapangasawa. ‘Yung sa iyo lamang naka-focus ang atensyon ng karamihan at pakiramdam mo’y ikaw ang pinakamagandang babae sa araw na ‘yun. I feel you, beshie.

Pero siyempre, hindi ka naman magpapakasal para lamang ipagmalaki sa iba kung gaano ka-engrande ang inyong wedding ceremony and reception, ‘di ba? Hindi ‘yan pabonggahan ng mga ninong at ninang sa kasal. Hindi rin paramihan ng bridesmaid at groomsmen. Mas lalong hindi palakihan ng nakuha sa money dance, kundi kung paano kayo pinagbuklod ng Diyos bilang mag-asawa. Nawa’y Diyos ang maging sentro ng inyong pamilya. Magmahalan kayo at piliin palagi ang isa’t isa. Congratulations, beshie!

Timing ba talaga o toxic ka? Alamin: mga dahilan kaya ‘di ka nagkaka-dyowa

ni Jersy L. Sanchez - @Life & Style| September 21, 2022

Isa ka ba sa mga nagtataka kung bakit sa tagal mo nang single ay wala ka pa ring dyowa o kaya naman, nababahala ka na dahil malapit nang lumagpas sa kalendaryo ang iyong edad, pero kahit ka-talking stage ay wala ka? Oh no!

Minsan, hindi natin alam kung ano ba talaga ang may mali — timing o tayo mismo. ‘Yun bang, isinisisi natin sa timing kung bakit zero ang love life natin, pero sa totoo lang, tayo naman pala ang dahilan kaya tayo nananatiling single.

Anu-ano ang mga bagay na nakakapigil para magka-love life ang isang tao?

1. YOU DATE UNAVAILABLE PEOPLE. Marahil, hooked ka sa mga taong ‘unavailable’ — ‘yung taong makakasakit lang sa ‘yo. Hindi lang ito isang beses nangyari kundi paulit-ulit na, kumbaga, naging pattern na at siguro, nagsisimula ka nang maniwala na wala talagang para sa iyo. Pero sa totoo lang, ang mga ganitong uri ng tao ang pinipili mo unconsciously dahil ayon sa mga eksperto, ang mga ‘unavailable people’ ay daan para makaiwas ka sa totoong intimacy. Dahil dito, hindi ka talaga makakabuo o makakahanap ng serious relationship.

2. YOU DON’T LET PEOPLE IN. Kung gusto mong pumasok sa isang relasyon, common sense na hindi puwedeng mag-isa ka lang. Sabi nga nila, hindi mo mapipili ang tao na iyong mamahalin, pero hindi ‘yan applicable sa lahat dahil may mga tao na kayang itago ang kanilang feelings at mag-isolate. Sey ng experts, isa itong defense mechanism para sa mga taong palaging nadi-disappoint ng kanilang pamilya, kaibigan, partner atbp. Gayunman, kung struggling ka sa aspetong ito, kailangan mong mag-heal muna sa past relationship na nagdulot sa iyo ng trauma.

3. ADDICTED TO ‘BUTTERFLIES’. For sure, may mga pagkakataong nadadala ka every time na may nakikilala kang bago. ‘Yun bang, lahat ng ginagawa niya ay ikinakakilig mo, pero take note, hindi ito senyales na siya na ang para sa iyo. Ayon sa mga eksperto, ang paghahanap ng “butterfly feeling” sa bagong connection ay maaaring makaapekto sa pagbuo ng genuine at pangmatagalang relationship sa iba.

4. YOU DON’T TRUST. Hindi kasalanan ng bago mong partner kung wala kang tiwala sa kanya dahil sa hindi mo magandang past. Dahil d’yan, kailangan mong maunawaan na unfair para sa partner mo kung hindi ka magtitiwala sa kanya dahil sa pagkakamali ng ibang tao.

5. LOW SELF-ESTEEM. Ayon sa mga eksperto, ang iyong self-esteem ay kritikal sa isang relasyon. Kapag mababa umano ang self-esteem, malaki ang posibilidad na ma-self sabotage ng happy relationship dahil pakiramdam nila ay wala silang “K” na magkaroon ng karelasyon. Paliwanag ng mga eksperto, kapag hindi mataas ang self-esteem ng isang tao, hindi siya nag-e-expect o nagde-demand ng klase ng treatment na deserve niya.

6. UNREALISTIC EXPECTATIONS. Minsan, ang mga expectation natin ang nagiging dahilan kaya hindi tayo nagkaka-love life. Halimbawa, in-assume mo agad na hindi magwo-work ang inyong relasyon o nag-e-expect ka ng grand gestures kahit hindi mo naman sinasabi kung ano talaga ang mga gusto mo. Sey ng experts, kung masyadong malayo sa katotohanan ang expectations mo, posibleng ma-miss out mo ang iyong potential partner.

7. YOU DON’T COMMUNICATE. Sabi nga, ang komunikasyon ay isa sa mga sangkap ng isang healthy relationship. Kung may gumugulo sa isip mo, ang the best na solusyon ay sabihin ito sa partner mo upang mapag-usapan n’yo ito. Pero kung hindi ganito ang nakasanayan mong paraan ng pagresolba ng mga problema, isa pang problema ‘yan, besh.

Bakit ka nga ba single — dahil ba wala pa sa timing o dahil mismo sa iyo?

Well, kung sapul ka sa mga nabanggit na dahilan sa itaas, galaw-galaw na, besh. Hindi naman sa minamadali kita, pero what if kailangan mong mag-adjust o kumilos at hindi maghintay lamang ng tamang tao para sa ‘yo?

Malay mo, nar’yan na pala siya sa harap mo, pero dahil sobrang taas ng expectations at ibang toxic traits mo ay nababalewala siya? Isip-isip ka na, besh!