Bilyonaryong Mafia ang Mahal Ko (37)

ni Maria Angela Gonzales @Kuwentong Pag-Ibig | Marso 20, 2024

“Hello there,” biglang napatingin si Nhel nang mabosesan niya ang tinig ng babae – si Mariz.

Bigla niya tuloy naalala kung sino ito sa kanyang buhay, at ito ay walang iba kundi ang kanyang fiancée. Todo-ngiti ito sa kanya na para bang gustong magbigay ng magandang balita.

Marahas na buntong hininga naman ang pinawalan ni Nhel, para kasi sa kanya problema ang dating nito. Ipinapaalala kasi nito sa kanya ang mga salitang gusto na sana niyang kalimutan, ngunit hindi niya magawa. 

“Anong ginagawa mo rito?”

Marahang tawa ang pinawalan nito. “Kung makapagtanong ka naman parang hindi na ako welcome rito.”

“May asawa na ako.”

“At pinakasalan mo talaga si Via Castro?” Hindi makapaniwalang tanong nito.

Matigas na matigas ang pagkakasabi niya sa mga salitang iyon kaya parang nakikita niyang hindi nito tanggap ang winika niya.

“Yes.”

“Iba ka talaga magalit. Gagawin mo ang lahat para lang makapaghiganti.”

Kahit gusto niyang kontrahin ang sinabi nito, nagawa pa rin niyang pinigilan ang kanyang sarili. Kasalanan din naman kasi niya ito, dahil naikuwento niya rin ang tungkol sa kanyang ama at nababanggit niya rin kay Mariz si Via.

Kaya naman nang ipayo ni Mariz sa kanya na pakasalan si Via, agad siyang pumayag.

Hindi niya alam kung bakit siya mabilis na sumang-ayon sa suggestion ni Mariz.

“Dahil nga ba sa talagang nais niyang gumanti?” At ang sagot naman ng kanyang utak ay ‘yes na yes.’ Para kasing iyon lang ang makakapagpasaya  sa kanya, pero bigla na lamang nag-iba ang ihip ng hangin.

“Kailan mo siya sasaktan?”

“Kakakasal pa lang namin.”

“Very good ka talaga.”

Hinawakan niya ang braso nito at akmang yayakap sa kanya. “Kunsabagay, mas magiging matagumpay ang paghihiganti mo kung sasaktan mo siya.”

Kahit gusto niyang sabihin na hindi na niya itutuloy ang paghihiganti, napalunok siya.

Tiyak kasi niyang masasaktan din ito kung sasabihin tinototoo na niya ang kasal nila ni Via.

Itutuloy…

Akala’y naka-jackpot sa napangasawa… Bebot, problemado sa mister na mama’s boy

ni Sister Isabel del Mundo - @Mga kuwento ng buhay at pag-ibig | Marso 20, 2024

Dear Sister Isabel,

Kumusta kayo? Nawa’y lagi kayong masaya at ligtas sa lahat ng problema. 

Sa takot kong tumandang dalaga, nag-asawa pa rin ako sa edad na 32. Maraming nanliligaw sa akin, kaya lang sobrang pihikan ko, pero pumayag din akong magpakasal sa lalaking akala ko si Mr. Right. Akala ko siya na ang karapat-dapat na mahalin. Pogi, may kaya sa buhay, mabait at mapagmahal. Subalit nang magsama kami sa iisang bubong, doon ko natuklasan na isa pala siyang batugan at mama's boy.

Nakadepende siya lagi sa mama niya at ayaw niyang magtrabaho kahit na may sarili na siyang pamilya. 

Wala rin kaming sariling bahay, kung kaya nakikitira lang kami sa bahay nila. Nang isilang ko ‘yung beybi namin, akala ko magiging responsableng ama at asawa na siya, pero hindi pa rin pala. 

Gradweyt siya ng kolehiyo at matalino. Kung tutuusin, kayang-kaya niyang makatagpo ng magandang trabaho, pero ayaw niyang gawin. Sa sobrang inis ko, iniwan ko siya at lumayas ako dala ang beybi namin. Umuwi ako sa pamilya ko, tinanggap naman ako ng mga magulang ko dahil nauunawaan nila ang buhay ko sa piling ng aking biyenan at asawang batugan. 

Tama ba ang ginawa ko, Sister Isabel? Mahal ko siya, pero kung ganyan ang magiging attitude niya habambuhay, baka tuluyang mawala ang pagmamahal ko sa kanya. Nawa’y mapayuhan n’yo ako.

Nagpapasalamat,

Glenda ng Calamba, Laguna

Sa iyo, Glenda,

Dapat lagi kayong nag-uusap ng husband mo. Sabihin mo sa kanya lahat ng hinanakit mo. Maging honest ka sa kanya, baka kasi akala niya kuntento ka na sa buhay mo.

Mainam na ‘yung malinaw kesa malabo. Sabihin mo sa kanya hangga’t ‘di siya naghahanap ng trabaho para sa inyong mag-iina at hindi ka niya ibinubukod ng bahay, hindi ka babalik sa kanya. Hayaan mong maisip niya na ngayong may asawa na siya, alisin na niya ang pagiging mama's boy, at maging responsable ama at asawa na siya. Hindi na siya bata, nagkakaedad na siya at may anak na kayo na naghahanap ng kalinga at pagmamahal ng isang ama. Ipakita niya sa parents niya na kaya niyang mamuhay nang hindi nakadepende sa kayamanan nila.

Sa palagay ko, matatauhan siya kapag kinausap mo siya. Kung talagang mahal ka niya, susundin niya ang gusto mong mangyari. 

Kung hindi naman, mananatili pa rin siya sa bahay nila kapiling ng kanyang pamilya. 

Mas makakabuting d’yan ka na lang muna sa parents mo at ipagdasal na sana matauhan na ang asawa mo. Hanggang dito na lang, pagpalain ka nawa ng Dakilang Kataas-taasan, gayundin ang husband mo at ang inyong kaisa-isang anak. Malagay nawa sa ayos ang pagsasama n’yo.

Sumasaiyo,

Sister Isabel del Mundo

Bilyonaryong Mafia ang Mahal Ko (37)

ni Maria Angela Gonzales @Kuwentong Pag-Ibig | Marso 20, 2024

Mahal ako ni Nhel!” Paulit-ulit na sinabi ni Via sa kanyang sarili. Ramdam niya kasi ang pag-ibig nito sa kanya. 

Sa palagay naman kasi niya hindi madali ang magpanggap at kung tunay ngang wala itong gusto sa kanya, hindi siya nito aangkinin ng paulit-ulit. 

“Mahal ko ba talaga si Nhel Zamora?” Paulit-ulit din niyang tanong sa kanyang sarili. Sa palagay niya ay ‘oo’ dahil tumutugon naman siya sa ginagawa nito sa kanya. 

“Sumama ka sa akin,” wika sa kanya ni Nhel. 

Kumunot ang kanyang noo at sabay sabing, “Saan naman tayo pupunta?”

Matagal bago ito sumagot na para bang pinag-isipan muna ang sasabihin. “Sa opisina.”

“At ano ang gagawin ko roon?”

“Wala.”

“Eh, bakit ako sasama?” Nagtataka niyang tanong. 

“Gusto ko kasing nakikita ka.”

“Para namang ang ganda-ganda ko.” 

“Talaga namang maganda ka.” 

“Dahil d’yan, may kiss ka sa akin,” biro niya kay Nhel. 

“Game,” wika nito sabay nguso. 

Hinalikan nga niya ito dahil na-miss din naman talaga niya ang labi nito. Nang mapatingin siya rito, may takot siyang naramdaman. Para kasing mahihirapan na siyang alisin ito sa kanyang buhay. 

“Paano kapag isang araw ay nawala ito sa kanyang buhay?” Kabadong tanong niya sa sarili. 

Pagkaraan ay ipinilig niya ang kanyang ulo. Kailangan niyang alisin sa kanyang isipan ang ganu’ng senaryo. Kasal na sila ni Nhel, kaya ipaglalaban niya ang kanilang pag-iibigan.

Itutuloy…