Bilyonaryong Mafia ang Mahal Ko (41)

ni Maria Angela Gonzales @Kuwentong Pag-Ibig | Marso 25, 2024

“Sino si Mariz?”  Walang anumang tanong ni Via. Ayaw sana niyang ipahalata kay Nhel na nagseselos siya, kaya nga lang hindi niya ito mapigilan. 

“My ex-fiancée,” wika nito habang nakatitig kay Via, at sabay sabing, “Jealous?”

“Hindi, ah,” pagsisinungaling niya.

Bahagyang tawa naman ang pinawalan ni Nhel habang uminit naman ang ulo ni Via dahil pansin niyang inaasar lang siya nito. 

“Masama bang magselos? Eh, asawa mo naman na ako.”

Lumapad ang ngiti ni Nhel at sabay sabing, “Siyempre hindi.”

“Bakit hindi natuloy ang kasal n’yo?” Pag-uusisa ni Via.

“Dahil hindi ko siya mahal.”

“At sino naman ang mahal mo?” 

Sa halip na sagutin ni Nhel ang kanyang tanong. Hinila siya nito palapit sa kanyan at sabay angkin sa labi ni Via. 

“Hindi mo naman sinagot ang tanong ko.” 

“Hindi naman kasi lahat dapat ay sabihin pa. Nagagawa ko namang iparamdam sa iyo, hindi ba?” 

Marahan siyang tumango, pero hindi niya magawang alisin ang disappointment na kanyang nararamdaman. Mas gusto niya kasing marinig na siya ang mahal ni Nhel. 

“Just trust me,”

Iyon naman talaga ang gusto niyang ibigay at gawin. Ang pagkatiwalaan upang hindi na maghirap pa ang kanyang puso. Kaya nga lang, parang may nagsasabi sa kanya na kung ganu’n ang kanyang gagawin niya, baka masaktan lang siya. 

“Kailan kayo maghihiwalay?”

“Bago tayo ikasal.”

Bigla siyang natigilan. Pakiramdam niya ay ginawa lang siya nitong panakip butas. Ngunit, ang sabi naman ng kanyang isip, ‘OA lang ang kanyang nararamdaman.’ May tiwala naman siya kay Nhel.   

“Basta ayoko na makikipagkita ka sa Mariz na ‘yan.”

“Okey, wifey,” malambing nitong sabi sa kanya. 

Pero, parang may kakaiba sa tono nito, para kasi itong kaplastikan lang.

Itutuloy…

Minura na ng mga junakis…Madir, gustong ipaglaban ang bagong asawa

ni Sister Isabel del Mundo - @Mga kuwento ng buhay at pag-ibig | Marso 25, 2024

Dear Sister Isabel,

Ako ay biyuda na at 55-anyos na ako.  Gusto ko sana muli mag-asawa, pero tutol ang tatlo kong anak. Gayunman, itinuloy ko rin ang pag-aasawa. 

Driver siya, mabait at nagmamahalan kami. Mayroon kaming apartment ng mga anak ko, at nagkataong bakante sa itaas, kaya napagdesisyunan ko naroon na rin patuluyin ang asawa ko. Nagalit ang mga anak ko, minura at kung anu-anong masasakit na salita ang sinabi sa akin na para bang hindi nila ko ina. Kung hindi ko raw hihiwalayan ang asawa ko, itatakwil nila ako bilang ina, at huwag na raw akong tumira sa apartment namin. 

Ano ang gagawin ko? Hirap na hirap na ang kalooban ko sa inaasal ng mga anak ko sa akin. Wala na ba akong karapatang lumigaya? Bakit hindi nila maintindihan ang pasya ko sa buhay? 

Nagpapasalamat,

Nanay Imelda ng Caloocan

Sa iyo, Nanay Imelda,

May karapatan kang lumigaya at sundin ang itinitibok ng puso mo. ‘Yun nga lang ay tutol ang mga anak mo dahil sa apartment mo itinira ang bago mong asawa. 

Sa palagay ko, mas makakabuti kung bumukod kayo ng asawa mo para walang masabi ang mga anak mo. Nasasaktan siguro sila dahil ang apartment na iyon ay pundar ng tatay nilang yumao na ipinamana sa kanila at sa iyo bilang naulila ng ama nila, bakit nga naman doon mo pa ititira ang lalaking ipapalit mo sa ama nila? 

Ngayon din ay humanap na kayo ng sarili n’yong bahay. Pagtulungan n’yo ang gastos, yaman din lamang driver pala ang asawa mo sa kasalukuyan. ‘Yan ang pinakamaganda mong gawin, ‘yung share mo sa upa ng apartment n’yo, itulong mo sa asawa mong driver. Mag-isip ka rin ng pagkakakitaan upang lumago ang kabuhayan n’yo. 

Gawin mo na ngayon ang payo ko. Lumipat na kayo ng bahay ng asawa mo. Huwag kang malungkot kung napagsalitaan ka man ng masasakit na salita ng mga anak mo dahil lilipas din ‘yun. Hanggang dito na lang, hangad ko ang kaligayahan mo sa edad mo ngayon.

Sumasaiyo,

Sister Isabel del Mundo

Bilyonaryong Mafia ang Mahal Ko (40)

ni Maria Angela Gonzales @Kuwentong Pag-Ibig | Marso 24, 2024

“Gagawin ko ang lahat upang makuha lamang ang tunay na pag-ibig ni Nhel.” Sabi ni Via sa kanyang sarili.  

Oo nga’t nararamdaman niya na kailangan siya nito dahil lagi rin naman nilang pinaparamdam ito sa isa’t isa. At para sa kanya, alam niyang may pag-ibig doon. Eh, sa parte kaya ni Nhel? 

Mahal ba talaga siya nito o dahil naibibigay lang niya ang pangangailangan nito bilang lalaki? Gusto niya sanang isipin na mahal din siya nito, Pero, talaga bang iyon ang nararamdaman nito?

Nagsa-shower si Nhel at siya ay naiwan sa kanilang silid, nagtitiklop siya ng kanilang damit na kanyang nilabhan. Kahit na mayroon silang mga katulong hindi niya gustong ipaubaya sa mga ito ang lahat ng gawain. Sabi nga ng mama niya noon, mas mararamdam ng lalaki ang kanyang pagmamahal, kapag inaasikaso niya ito.

Bigla siyang natigilan nang may marinig siyang tunog ng cellphone.

Kumunot ang kanyang noo dahil alam niyang tunog ng sirena ng bumbero ang ringtone niya, pero katok sa pintuan ang narinig niya. Umangat lamang ang kanyang kilay nang mapagtanto niyang kay Nhel pala ang cp.

Ayaw sana niyang usyosohin kung sino ang tumawag, ngunit hindi niya napigilan ang kanyang sarili. Napahawak lang siya sa kanyang dibdib nang makita niya ang pangalan, at ito ay walang iba kundi si Mariz.

Marahas na buntong hininga ang kanyang pinawalan. Hindi pa man siya nakakasigurado kung sino ang babae na iyon, nakaramdam naman siya ng sobrang selos. Sa palagay naman niya ay natural lang iyon, dahil siya ang asawa ni Nhel.

Pero, hindi napigilan ng mata niya na maningkit. Hindi niya hahayaan na may sinuman na hahadlang sa relasyon nila. Mahal niya si Nhel, kaya sa kanya lang ito, at paniguradong yari ang sinumang mang-aagaw kay Nhel.

Itutuloy…