Sundalong mister, may 3 pang babae bukod sa asawa

ni Sister Isabel del Mundo - @Mga kuwento ng buhay at pag-ibig | Marso 27, 2024

Dear Sister Isabel,

Ang problema ko ay ang aking asawa, isa siyang sundalo at naa-assign siya sa iba’t ibang lugar. Kasal kami, pero nababalitaan ko na may tatlo pa siyang babae bukod sa akin. Kaya pala hindi na siya nagpapadala ng pera sa amin, at kung magpadala man siya ay kulang na kulang. Sa ngayon, wala na kaming contact. Hindi niya na sinasagot ang tawag at messages ko sa kanya. 

Ano kaya ang gagawin ko? Irereklamo ko ba siya sa pinapasukan niya sa Camp Crame? Tulungan n’yo ako.

Nagpapasalamat,

Dorothy ng Nueva Ecija

Sa iyo, Dorothy,

Ireklamo mo na siya sa Camp Crame. Sila na ang bahala magpataw ng kaukulang parusa sa kanya, pati suweldo niya ay direktang ipapadala sa iyo bilang legal na asawa niya. 

Sa ganyang paraan, tiyak ko na kokontakin ka na ng asawa mo. Mag-usap kayo, hangga’t maaari huwag mo siyang awayin o sigawan. Diplomasya ang gamitin mo, maging mahinahon upang mailagay muli sa ayos ang pagsasama n’yo. Walang perpektong pagsasama, lahat ay dumadaan sa matinding pagsubok. Lawakan mo pa ang pasensya mo para maibalik na sa normal ang relasyon n’yo at maging maligaya kayo habambuhay.

Sumasaiyo,

Sister Isabel del Mundo

Bilyonaryong Mafia ang Mahal Ko (43)

ni Maria Angela Gonzales @Kuwentong Pag-Ibig | Marso 27, 2024

“Gugustuhin mo bang maagaw si Nhel ng babaeng iyon?” Tanong ni Mariz sa kanyang sarili. 

Kahit pa sabihing hindi naman sila tunay na nagmamahalan, masakit pa rin ito lalo na iba ang natutunan nitong mahalin. Ngunit, mahal nga ba talaga ni Nhel si Via?

“Imposible,” sigaw niya sa kanyang isip. Para kasi sa kanya, napakaimposible noon. Hindi naman kasi talaga marunong magmahal si Nhel, at mahilig lang itong makipagtalik.

Alam niya iyon dahil sa tuwing nagkikita sila ay laging may nangyayari sa kanila. Kaya, hindi rin imposible na ganu’n lang din ang nararamdaman ni Nhel sa babaeng iyon.

Hindi dapat niya hayaan na magkatuluyan ang dalawa dahil paniguradong masasaktan nang husto ang kanyang pride. Gusto rin niya kasing iligtas si Nhel. 

Ang ibig naman kasi nito ay makapaghiganti sa ama niya at hindi nito magagawang maisakatuparan iyon, kung mas paiiralin niya ang kanyang puso.

“Talaga nga bang iyon ang dahilan?” Nanunuksong tanong niya sa sarili.

“Hello,” wika niya nang harangin ang babaeng kahit sa picture lang niya nakita ay kilalang-kilala na niya ito.

Kumunot ang noo nito nang makita siya. Hindi man lang siya nakakita ng pagkagulat sa aura nito. Sa tingin nga niya ay mas nakaramdam ito ng pagkairita dahil naawat niya ang paghakbang nito.

“Kilala ba kita?”

“No.”

Lumalim lalo ang kunot ng noo nito. Dahilan para makaramdam siya ng pagkairita.

“Hindi naman pala kita kilala, bakit iniistorbo mo ‘ko?”

“Kilala kasi kita.”

“Hindi ako artista.”

“Matindi ang self-confidence mo ha?.”

“May tiwala kasi ako sa sarili ko,” may kayabangan sagot nito.

“Magkakaroon ka pa ba ng tiwala sa sarili kung sasabihin kong hihiwalayan ka rin ni Nhel at magpapakasal kami?”

“Walang divorce rito sa Pilipinas.”

“Peke ang kasal n’yo,” pambubuwisit niya rito.

Itutuloy…

Bilyonaryong Mafia ang Mahal Ko (42)

ni Maria Angela Gonzales @Kuwentong Pag-Ibig | Marso 26, 2024

Kailangan maniwala ni Via sa sinasabi ni Nhel dahil kapwa naman sila nagmamahalan.

“Paano ka nakakatiyak?” Sarkastikong tanong niya sa sarili.

Hindi ba may kakaibang plano si Nhel, kaya siya pinakasalan?

Ang anumang katuwiran malibang sa salitang mahal niya si Nhel ay ayaw niyang tanggapin. Ang mahalaga ay nararamdaman niya ang pagmamahal nito. Hindi lang sa tuwing nagsisiping sila, kundi pati na rin sa pag-aasikaso nito.

“Nakakatuwa naman.”

“Ha?” Bulalas niya.

“Nakakatuwa naman na nagseselos ka.”

“Siyempre!” 

“Pero, bakit?”

“Dahil nga asawa kita!”

Umarko ang kilay ni Nhel at para bang hindi nagustuhan ang isinagot ni Via.

“Hindi ba dapat ang isagot mo ay dahil sa mahal mo ako?”

“Mahal nga kita,” wika niya nang salubungin niya ang tingin nito.

Hindi na siya nahiya dahil totoo rin naman iyon at may karapatan siyang sabihin ang mga katagang iyon. Bigla naman nawala ang ngiti nito at pakiramdam niya tuloy, hindi nito nagustuhan ang kanyang sinabi. Pagkaraan ay umiling siya nang umiling.

“Good.”

“May nararamdaman ka rin bang pagmamahal sa akin?”

Sa halip na sagutin ito ni Nhel, inangkin na naman nito ang kanyang labi. Ganu’n lagi ang ginagawa nito kaya agad na nandilat ang kanyang mga mata. Naisip niya kasi na baka hindi nito masagot ang kanyang tanong ay dahil sa ayaw nitong magsinungaling?

Itutuloy…