Meant to be, but not meant to last? Mga dahilan kung bakit may pinagtagpo pero 'di itinadhana

ni Mabel Vieron @Life, Love and Relationship | June 8, 2024

Minsan, may mga taong dumarating sa buhay natin para mahalin, pero hindi para makasama habambuhay. Ouch, ‘di ba? Pero aminin mo, relate ka ‘no?

Nakilala mo siya sa pinaka-unexpected na panahon. Isang simpleng chat, isang random na comment sa post mo, o ‘di kaya’y isang tinginan sa gitna ng crowd na parang sinadya ng langit. Subalit bakit parang laging may hadlang?

Bakit parang lahat na lang ng signs, nagsasabing hindi kayo sa dulo?

Ang sakit, besh. Kasi kahit ano’ng pilit mong isalba, may mga relasyong sadyang hindi itinadhana—kahit pa pinagdikit na kayo ng pagkakataon.‘Ika nga nila, “Pinagtagpo pero hindi itinadhana” ang isa sa pinakamasakit na love story. Yung akala mo siya na, pero hindi pala. ‘Yung binuhos mo lahat ng oras, effort, pagmamahal, pero sa huli, wala ka ring napala kundi luha at tanong na, “Bakit hindi naging kami?”

Pero don’t worry, besh. Hindi ka nag-iisa. At para mas maintindihan mo pa ang mga “bakit” ng puso mo, narito ang 5 dahilan kung bakit may mga taong kahit gaano mo pa kamahal, ay hindi mo rin makakatuluyan.

1. TUTOL ANG PAMILYA. Ipagpalagay nating mayaman ang pamilya nila, samantalang simpleng pamumuhay lamang ang meron kayo. Kadalasan, estado sa buhay ang pinakamalaking hadlang kaya hindi nagkakatuluyan ang dalawang nagmamahalan. 

‘Yung tipong, mamatain ka ng buong angkan niya to the point na sila pa mismo ang magpe-pressure sa iyo. So, beshie, what if, offer-an ka ng mga magulang niya ng P1M para lamang lubayan ang anak nila, tatanggapin mo ba?

2. HINDI PA READY MAG-COMMIT. ‘Yung tipong same vibes kayo at aminado kayong pareho n’yong gusto ang isa’t isa, subalit hindi puwedeng maging kayo, sapagkat hindi pa siya handang pumasok sa panibagong relasyon. Aniya, self-love raw muna. Kunsabagay, paano niya mamahalin ang iba, kung mismong sarili niya ay hindi niya alam kung paano mahalin? Ipagpalagay nating sumugal nga siya sa relasyong hindi pa siya handa, ang ending ay magsusumbatan at mag-aaway lamang kayo hanggang mauwi sa hiwalayan.

3. HINDI PA NAKAKA-MOVE ON SA EX. Kahit pa sabihing ex na ‘yun, ano’ng laban mo kung mas matagal ang pinagsamahan nila? Hindi ka naman siguro masokista para pumayag maging panakip-butas, ‘di ba? Siguro nga, may taong pinagtagpo lamang para i-comfort ang isa’t isa. 

4. MAY DYOWA O ASAWA NA SIYA. ‘Yung akala mo, single kaya agad mo siyang pinatulan, pero kalaunan ay nalaman mong may sabit pala siya at muntik ka pang maging kabet. Naku, beshie, ‘wag mong i-romanticize ang salitang, “You and I against the world,” sapagkat hindi mo deserve maging third party. Siguro, may mga taong pinagtagpo para magkaroon ng thrill ang boring nilang love life, pero hindi para makuntento sa kung ano lamang ang puwede nitong ibigay sa ‘yo

5. MAY IBANG NABUNTIS. Kapag alam mong may batang involve, sumuko ka na. Huwag kang magpamanipula sa sasabihin niyang, “Paninindigan ko lang ‘yung bata, pero ikaw pa rin ang mahal ko.” Sapagkat kung talagang mahal ka niya ay hindi siya mambubuntis ng iba. Isipin mo na lamang na kung ipagpapatuloy n’yo ang inyong relasyon ay may isa na namang inosenteng sanggol ang madadagdag sa listahan ng mga broken family. Sabihin n’yo mang, “True love conquers all,” ngunit may mga tao talagang pinagtagpo lang, pero hindi itinadhana. Huwag mong ipilit kung hindi puwede lalo’t may batang involve.

Ngayong alam mo na ang ilang struggles na pinagdaraanan ng bawat nagmamahal— ang tanong, gugustuhin mo pa rin kayang ma-in love?Kaya bes, kung nasaktan ka man, okey lang ‘yan! Hindi ka nag-iisa. Minsan, hindi sapat ang pagmamahal lang. Minsan, kahit gaano mo pa siya kamahal, may mga puwersang mas malakas pa sa “kayo.

”At kung dumating man ang panahong mapagtanto mong hindi talaga kayo itinadhana, huwag mong ikahiya o ikalungkot. Isipin mo na lang, baka may mas magandang plot twist pa sa’yo si Lord. ‘Yung tipo ng pag-ibig na hindi mo kailangang ipaglaban araw-araw, dahil kusa kayong ipaglalaban ng tadhana para sa isa’t isa.Love smart, bes.

Huwag lang puso, gamitin din ang utak. ‘Wag mong hayaang masayang ang luha mo sa taong hindi naman kayang pahalagahan ang lahat ng ibinuhos mong pagmamahal.Sa huli, tandaan n’yo na may mga taong dadaan lang para turuan tayong magmahal ng tama, pero hindi ibig sabihin nu’n ay sila na ang para sa atin. 

At huwag kayong mag-alala, dahil tiyak na may darating pa na mas deserving, ‘yung hindi mo na kailangang habulin, kasi siya mismo ang mananatili. Oki?

Ginawang katuwaan ang pag-ibig… Bebot, tuwang-tuwa sa mga lalaking nasasaktan at nabibiktima

ni Sis. Isabel del Mundo @Mga Kuwento ng Buhay at Pag-ibig | Sep. 30, 2024

Dear Sister Isabel, 

Magandang araw, nawa’y patuloy kayong gabayan ng Diyos sa inyong buhay upang patuloy kayong makatulong sa inyong kapwa. 

Ang isasangguni ko ay tungkol sa lovelife ko. Hindi ko na maintindihan ang sarili ko kung bakit sa umpisa lang ako nai-in love. Mabilis na nawawala ang pagmamahal ko, kahit na mababait at mapagmahal naman ang mga naging nobyo ko. 

Sa katunayan, masasabi kong isa akong play girl. Sister, paano ko kaya mababago ang ugali kong ito? Hindi ko alam, pero kapag nasasaktan ko ang damdamin ng mga nagiging nobyo ko, iba ‘yung tuwang nararamdaman ko. Nasisiyahan din ako sa tuwing nakikita ko silang patay na patay sa akin. Bakit kaya ako ganito? 

Sana ay mabigyan n’yo ako ng payo at maipaliwanag kung bakit may ugali akong ganito. Nawa’y sa pamamagitan ng malawak n’yong pag-uunawa ay maliwanagan ako kung bakit ganito ang ginagawa ko at dalangin ko rin na sana magbago na ang ganito kong pagkatao. 

Umaasa, 

Thelma ng La Union

---

Sa iyo, Thelma,

Masasabi kong isa kang sadista. Medyo abnormal ang takbo ng isip mo, lalo na sa larangan ng pag-ibig. Alalahanin mo, ang pag-ibig ay hindi isang laro, ito ay sagrado at banal. Nagmumula ito sa kaibuturan ng puso, kaya hindi mo dapat ito dedmahin. Hindi ka dapat nananakit at nakikipaglaro sa iyong mga nagiging nobyo.

Ang makapangyarihang Diyos ang nagpunla ng pag-ibig sa puso natin. Kaya ang sinumang maging mapaglaro ay may kaparusahan. Ngayon pa lang, magbago ka na. Gawin mong seryoso ang nararamdaman mo at huwag kang pabagu-bago ng karelasyon, dahil may balik din sa iyo ‘yan. 

Kapag pinagpatuloy mo pa ‘yang ganyang pag-uugali, bahala ka baka wala na ring sumeryoso sa iyo at hindi ka na muli pang makatagpo ng mabuti at mapagmahal na lalaki. 

Thelma, kung ako sa iyo, umibig ka ng tapat upang katapatan din ang isukli sa iyo ng lalaking napupusuan mo. Iwasan mo na ring paglaruan ang pag-ibig, kung ayaw mong ikaw ang paglaruan sa bandang huli. Kung ano ang ginawa mo sa iyong kapwa, ang siya ring mangyayari sa iyo. Tandaan mo ‘yan, Thelma. 

Magbago at magseryoso ka na, upang hindi ka gantihan ng tadhana. Kapag patuloy kang nagbago, tiyak na makakasumpong ka rin ng lalaking makakasama mo habambuhay. 

Sumasaiyo,

Sister Isabel del Mundo

‘Di na keri pa pakisamahan… Misis, umay na sa mister na mama’s boy

ni Sis. Isabel del Mundo @Mga Kuwento ng Buhay at Pag-ibig | September 17, 2024

Dear Sister Isabel,

Magandang araw sa inyong lahat d’yan sa Bulgar. 

Pinilit akong ipakasal ng magulang ko sa lalaking hindi ko naman tunay na mahal.

Kaya naman kalbaryo lang ang inabot ko. Napakatamad niya at ang masaklap pa ay napaka-mama's boy niya. Nakaasa lang siya sa kanyang magulang, kaya naman naisipan kong mangibang-bansa. Sa awa ng Diyos, pumayag naman siya. Kaysa na matuwa ako, nakita ko kung paano siya mas naging batugan dahil sa tuwing sumusuweldo ako, sa kanya ko dinederetso.

May dalawa na kaming anak. Mabuti na lang ay nagpapakatatay siya sa mga anak namin. Kuntento na ang mga anak namin sa kanya, dahil ramdam na ramdam daw nila ang pagmamahal ng kanilang ama. 

Wala pa ‘kong balak umuwi nu’n sa ‘Pinas, dahil gusto ko bago ako umuwi ay makapagtapos muna ng kolehiyo ang mga anak ko.

Makalipas ang ilang taon, naka-graduate na rin sa wakas ang dalawa kong anak. Kaya naman agad akong nagpasyang umuwi sa ‘Pinas, at doon na muling manirahan. 

Mas tumabang ang pagsasama namin ng asawa ko. Mas naramdaman ko talaga na walang namamagitang pagmamahal sa amin. Sa katunayan, nagsasama lang kami dahil sa mga anak namin. Gusto ko na sana muling mag-asawa, wala namang problema sa asawa ko, dahil wala rin naman siyang feelings sa akin, subalit tutol ang mga anak ko. Ayaw pumayag ng mga anak namin na maghiwalay kami, at magkani-kanyang buhay sa piling ng aming napupusuan. 

Nagbanta pa ang isang kong anak na mas pipiliin na lamang umano niyang mawala sa mundo kaysa na magkahiwalay kami ng ama niya. 

Nawa ay mapayuhan n’yo ako sa dapat kong gawin. Hihintayin ko ang payo n’yo.

Nagpapasalamat, 

Dolores ng Batangas

---

Sa iyo, Dolores,

Mag-isip-isip muna kayo. Unang-una, kasal kayo, at hindi ka na puwede pang ikasal sa iba. Kabit lang ang magiging status kung papatol ka pa sa iba, maliban na lang kung magpa-file ka ng annulment. May katwiran ang anak mo na tutol sa iniisip n’yo na magkani-kanya. 

Sa palagay ko naman, puwede pang maibalik ang pagmamahalan n’yo alang-alang na lamang sa mga anak n’yo. Ipakita mo sa mga anak mo na ginagawa mo ang tungkulin mo bilang ilaw ng tahanan. Kapag naramdam ng asawa mo ‘yun, tiyak na susuklian din niya ang pagmamahal na ipinapakita mo. 

Hindi ka man niya pinigilan mag-abroad, naging mabuti naman siyang ama sa mga anak mo. Ngayon na ang tamang panahon para iparamdam sa asawa mo ang iyong pagmamahal, natitiyak kong susuklian din niya ng pagmamahal ang effort mo para maging buo at masaya ang inyong pamilya. 

Nakakasiguro din ako na hindi na siya maghahanap pa ng iba, dahil para lang kayong kumuha ng bato na ipupukpok sa ulo n’yo kung itutuloy n’yo ang balak n’yo na magkani-kanya. 

Nawa'y maunawaan mo ang sinasabi ko. Hanggang dito na lang, hangad ko ang kaligayahan n’yo. Sana ‘di na rin mawasak pa ang inyong pamilya. Dalangin ko na maging matibay at matatag pa kayo alang-alang sa inyong mga anak. 

Sumasaiyo,

Sister Isabel del Mundo