Sign na magtatagumpay sa trabaho at negosyo

ni Estrellia de Luna @Panaginip gabay ng buhay | October 22, 2023

Analisahin natin ang panaginip na ipinadala ni Rosita ng Malabon.

Dear Maestra,

Napanaginipan ko na pumayat ako ng sobra at para bang galing ako sa malubhang sakit. Umiyak ako nang umiyak dahil naawa ako sa sarili ko.

Ang daming luha sa mata ko, hanggang sa nakaramdam ako ng pagkauhaw. Kaya agad akong kumuha ng tubig sa refrigerator at uminom nang uminom.

Ano’ng ibig sabihin ng panaginip ko?

Naghihintay, Rosita

Sa iyo, Rosita,

Ang ibig sabihin ng panaginip mo na pumayat ka na para bang may malubha kang sakit, ay susuwertehin ka sa mga pinaplano mo sa buhay. Magtatagumpay ka sa kasalukuyan mong pinagkakaabalahan mapa-trabaho o negosyo man ito.

Ang umiyak ka nang umiyak, ay nangangahulugang matatapos na ang iyong mga paghihirap, at yayaman ka na. Magse-celebrate kayo ng mga kaibigan mo, at iimbitahan mo sila sa isang simpleng salu-salo.

Samantala, ang nakaramdam ka ng pagkauhaw, agad ka kumuha ng tubig sa refrigerator para uminom, ay halos pareho rin ang kahulugan, ito ay tanda nang kasaganaan, pagpapala at mga biyaya na malapit nang mapasaiyo. Gaganda na ang iyong buhay, at ‘di ka na maghihirap pa.

Matapat na sumasaiyo,

Maestra Estrellia de Luna

Sign na malapit na muling mag-asawa

ni Estrellia de Luna @Panaginip gabay ng buhay | October 21, 2023

Analisahin natin ang panaginip na ipinadala ni Emma ng Taguig.

Dear Maestra,

Mahigit tatlong taon na akong biyuda. Napanaginipan ko na nag-asawa akong muli, at pinatulan ko ‘yung asawa ng kapitbahay namin.

Nakaraan naman, napanaginipan ko na bumalik ako sa pagkabata, at iniinsulto ako ng mga kalaro ko.

Ano’ng ibig sabihin ng mga panaginip ko?

Naghihintay,

Emma

Sa iyo, Emma,

Kapag ang isang babae ay walang asawa, hindi na ito muli pang makakapag-asawa, at tatanda na itong dalaga na walang kaagapay sa buhay. Pero, dahil ang sabi mo ay biyuda ka na, ang ibig sabihin nito ay malapit ka nang makapag-asawa. Pakakasalan ka ng lalaking napupusuan mo.

Ang pinatulan mo ‘yung asawa ng kapitbahay mo, ito ay nagpapahiwatig na hindi mo papansinin ang mga lalaking nagpaparamdam sa iyo, at dededmahin mo lang ang mga pambobola nila sa iyo.

Samantala, ang bumalik ka sa pagkabata mo, ay senyales na magtatagumpay ka sa negosyo at liligaya ka sa larangan ng pag-ibig. Magiging masaya ang lovelife mo kung papansinin mo ang mga manliligaw mo.

Ang ininsulto ka ng mga kalaro mo, ay tanda na mag-aaway kayo ng mahal mo.

Maaaring mauwi ito sa hiwalayan, magpapatuloy ito kung hindi mo babaguhin ang iyong pag-uugali.

Matapat na sumasaiyo,

Maestra Estrellia de Luna

Kahulugan ng pinasok ng magnanakaw ang bahay

ni Estrellia de Luna @Panaginip gabay ng buhay | October 20, 2023

Analisahin natin ang panaginip na ipinadala ni Jomarth ng Laguna.

Dear Maestra,

Napanaginipan ko na pinasok kami ng magnanakaw, giniba nila ‘yung gate namin, at dahil luma na ito madali nila itong nasira, kaya agad silang nakapasok.

Kinabukasan, bumili ako ng bakal para magawa ‘yung gate. Nagpunta ako sa hardware, at nadumihan ang damit ko nang buhatin ko ‘yung bakal.

Ano ang ibig sabihin ng panaginip ko?

Naghihintay,

Jomarth

Sa iyo, Jomarth,

Ang panaginip mo na nanakawan kayo, pinasok ang bahay n’yo ay babala na may mawawala sa iyong ari-arian. Sa madaling salita, posibleng magkatotoo ang panaginip mo kaya dapat mong ingatan ang iyong mga gamit lalo na kung ito ay mahalaga at mamahalin.

Ang bumili ka ng bakal sa hardware para magawa ‘yung gate, ay nangangahulugang kakailanganin mo ang ibayong lakas ng iyong katawan upang magampanan mo ang mga gawaing nakaatang sa iyo. Iwasan mong magkasakit, laging kang mag-exercise upang lumakas ang iyong katawan para makayanan mo ang mabibigat na gawaing dapat mong tapusin.

Samantala, ang nadumihan ang damit mo, ay nagpapahiwatig na may lihim kang kaaway na magiging sanhi ng kalungkutan mo sa buhay. Gagawin niya ang lahat para hindi ka lumigaya sa piling ng iyong minamahal.

Matapat na sumasaiyo,

Maestra Estrellia de Luna