Babala na mauuwi sa hiwalayan ang relasyon

ni Estrellia de Luna @Panaginip gabay ng buhay | October 31, 2023

Analisahin natin ang panaginip na ipinadala ni Raymond ng Pampanga.

Dear Maestra,

Napanaginipan ko na malabo umano ‘yung eyeglasses ko, hindi ko napansin ‘yung baso sa lamesa, kung kaya’t natabig at nabasag ko ito. Sa katunayan, wala akong suot na salamin nu’n, pero ang buong akala ko ay suot ko na ito. Samantala, lumuwag umano ‘yung garter ng pajama ko, at muntik na itong mapigtas.

Ano’ng ibig sabihin ng panaginip ko?

Naghihintay,

Raymond

Sa iyo, Raymond,

Ang panaginip mo na malabo ang suot mong salamin kaya natabig mo ‘yung baso sa lamesa, ito ay nangangahulugang makakaranas ka ng kabiguan sa buhay pero hindi naman ito gaanong grabe dahil malalagpasan mo rin ito. Ang wala ka palang suot na salamin, ito ay nagpapahiwatig ng paghihiwalay. Mauuwi sa hiwalayan ang inyong relasyon dahil sa hindi pagkakaunawaan.

Samantala, ang lumuwag ang iyong garter, muntik na itong mapigtas, ay babala na madadamay ka sa gulo, kaya ngayon palang umiwas ka na sa mga kaibigan mong walang mabuting maidudulot sa iyo. Hindi naman ito grabe, konting gulo lang pero mabuti na rin ‘yung nag-iingat bago pa lumala ang lahat.

Matapat na sumasaiyo,

Maestra Estrellia de Luna

Iba’t ibang kahulugan ng buhok

ni Estrellia de Luna @Panaginip gabay ng buhay | October 30, 2023

Analisahin natin ang panaginip na ipinadala ni Dorry ng Naic, Cavite.

Dear Maestra,

Madalas kong mapanaginipan ang tungkol sa aking buhok, at minsan naman ay ang maduming kamay. Ano ang ibig sabihin ng panaginip ko?

Naghihintay,

Dorry

Sa iyo, Dorry,

Depende sa buhok ang ibig sabihin ng iyong panaginip. Kung sinusuklay mo ang iyong buhok, ito ay pahiwatig na hindi tapat sa iyo ang iyong dyowa, at may mahal na siyang iba. Kung sa panaginip mo ay naging gray ang kulay ng iyong buhok, ito naman ay nangangahulugan na mabibigo ka sa iyong mga pinapangarap. Kung gusut-gusot naman ang iyong buhok, ito ay paalala na iwasan mo ang pagsasalita ng kung anu-ano.

Sa madaling salita, iwasan mong maging tsismosa para 'di ka mapahamak.

Samantala, ang dumi ng iyong kamay mo, ito ay paalala na mag-ingat ka sa mga kaibigan mo.

May posibilidad na idamay ka nila sa mga maling kanilang ginagawa.

Matapat na sumasaiyo,

Maestra Estrellia de Luna

Kahulugan ng malagong repolyo at hinabol ng baka

ni Estrellia de Luna @Panaginip gabay ng buhay | October 29, 2023

Analisahin natin ang panaginip na ipinadala ni Gio ng Zambales.

Dear Maestra,

Napanaginipan ko na pumunta ako sa gulayan namin, may makita akong malagong repolyo, pinitas at niluto ko ito. Agad ko itong kinain dahil mukhang masarap ang aking pagkakaluto.

Kinabukasan, bumalik ako para mamitas uli ng repolyo pero may baka akong nakita, hinabol ako nito kaya umuwi na lamang ako.

Ano ang ibig sabihin ng panaginip ko?

Naghihintay,

Gio

Sa iyo, Gio,

Ang panaginip mo na nagpunta ka sa gulayan, may nakita kang malagong repolyo, ito ay nangangahulugan na mawawalan ka ng pera, kaya ingatan mo ang iyong wallet, huwag mo ito ilagay kung saan-saan, huwag ka rin masyadong magtiwala sa iyong mga kasambahay, at i-lock mo palagi ang kabinet na pinaglalagyan mo ng iyong salapi.

Ang kinain mo agad ang niluto mong repolyo dahil mukha itong masarap, ito ay nagpapahiwatig na may lihim kang kaaway, handa niyang gawin ang lahat upang sirain ang iyong reputasyong pinakaiingat-ingatan.

Samantala, ang bumalik ka kinabukasan pero may nakita kang baka at hinabol ka nito, ay babala na may darating na gulo sa buhay mo. Pero, ‘wag kang mag-alala dahil malalampasan mo rin ito.

Matapat na sumasaiyo,

Maestra Estrellia de Luna