Kahulugan ng na-meet si Marian Rivera

ni Estrellia de Luna @Panaginip gabay ng buhay | Marso 22, 2024

Analisahin natin ang panaginip na ipinadala ni Leony ng Bulacan.

Dear Maestra,

Napanaginipan ko na kinamayan at nakipagkuwentuhan sa akin si Marian Rivera.

Tuwang-tuwa ako dahil paborito ko siyang artista, pinupuri at pinasalamatan ko siya dahil sa kabaitang ipinakita niya sa akin. Binigyan niya rin ako ng advice tungkol sa pang-araw-araw kong pamumuhay.

Ano ang ibig sabihin ng panaginip ko?

Naghihintay,

Leony

Sa iyo, Leony,

Ang ibig sabihin ng napanaginipan mo ang paborito mong artista na si Marian Rivera ay may kaugnayan sa iyong plano sa buhay. May posibilidad na ang pinakamimithi mo ay hindi mo agad makakamit. Magkakaroon ng maraming sagabal dahil na rin sa pagiging careless o kawalan mo ng tiwala sa iyong sarili.

Ang panay ang papuri mo at pasasalamat mo sa kanya dahil sa kabaitang ipinakita niya sa iyo ay nangangahulugan na ang pinakamatalik mong kaibigan sa kasalukuyan ay mapagkakatiwalaan at maaasahan. 

Samantala, ang binigyan ka niya ng advice tungkol sa pang-araw-araw mong pamumuhay ay babala na magkakaroon ka ng mabigat na problema pero malalampasan mo rin ito sa tulong ng iyong kaibigan. Hindi ka niya pababayaan at dadamayan ka niya sa lahat ng sandali.

Matapat na sumasaiyo,

Maestra Estrellia de Luna

Kahulugan ng langgam at suka

ni Estrellia de Luna @Panaginip gabay ng buhay | Marso 21, 2024

Analisahin natin ang panaginip na ipinadala ni Lanny ng Batangas.

Dear Maestra,

Napanaginipan ko na ang daming langgam sa kusina namin, kumuha ako ng suka at binuhos ko ito sa mga langgam, pati tuloy ang kamay ko ay natapunan din ng suka. 

Ano ang ibig sabihin ng panaginip ko.

Naghihintay,

Lanny

Sa iyo, Lanny,

Ang ibig sabihin ng panaginip mo na ang daming langgam sa kusina n’yo ay makakaranas ka ng mga nakakainis na pangyayari sa lugar na kung saan ka magsisimulang magtrabaho. Dapat mong tiisin ang mga sagabal kung gusto mong tumagal sa nasabing lugar. 

Ang binuhusan mo ng suka ang mga langgam ay nagpapahiwatig na may mga masasakit kang salita na maririnig at magiging dahilan ito para magtalu-talo kayo ng mga kasamahan mo sa trabaho. Ingatan mong mapikon upang ‘di kayo mag-away-away.

Samantala, ang natapunan ng suka ang kamay mo ay senyales ng pansamantalang kabiguan sa iyong pangarap ngunit malalampasan mo rin ang mga sagabal dahil sa iyong sipag at tiyaga.

Matapat na sumasaiyo,

Maestra Estrellia de Luna

Tanda na susuwertehin at yayaman

ni Estrellia de Luna @Panaginip gabay ng buhay | Marso 20, 2024

Dear Maestra,

Biyuda ako at mag-isa lang akong kumakayod upang buhayin ang aking mga anak. Hindi naman kami naghihirap sa buhay, nakakaraos naman kami sa aming pang-araw-araw na gastusin.

Napanaginipan ko na sobrang hirap ng kalagayan namin sa buhay. Kahit anong gawin kong pagsusumikap ay ganu’n pa rin at hindi ako makaahun-ahon sa kahirapan. 

Naisipan ko umanong humingi ng tulong sa Diyos. Sa totoo lang, hindi ako nagsisimba. Pero, noong araw na iyon, nagsimba raw ako sa cathedral na malapit sa amin. Nagdasal ako ng taimtim na sana ay makaahon na kami sa kahirapan.

Ano ang ibig sabihin ng panaginip ko?

Naghihintay,

Veronica

Sa iyo, Veronica,

Ang panaginip mo na sobrang hirap ng kalagayan mo sa buhay na kahit anong gawin mong pagsusumikap ay ganu’n pa rin, ito ay nangangahulugan na magkakapera ka nang hindi mo inaasahan. May biglang suwerteng darating sa iyo na siya rin magpapayaman sa inyo.

Ang nagsimba ka sa cathedral ay maganda rin ang ipinahihiwatig, may mamanahin kang malaking halaga mula sa kamag-anak n’yo na kamamatay pa lang, at hindi mo inaasahan na isa ka pala sa pamamanahan ng malaking halaga.

Samantala, ang nagdasal ka ng taimtim at humingi ng tulong sa Diyos para makaahon ay senyales ng kalusugan, kaligayahan sa tahanan at pusong mapagmahal. Mananatili kang malusog, ligtas sa anumang karamdaman at liligaya ka na rin sa susunod na mga araw.

Matapat na sumasaiyo,

Maestra Estrellia de Luna