Kahulugan ng zoo, unggoy at langgam

ni Estrellia de Luna @Panaginip gabay ng buhay | Marso 25, 2024

Analisahin natin ang panaginip na ipinadala ni Lerma ng Camarines Sur.

Dear Maestra,

Napanaginipan ko na namasyal ako sa zoo. Ang daming hayop na nagkakagulo sa kani-kanilang kulungan. Agad ko namang napansin ang unggoy, nagkakatuwaan sila habang nakaupo sa puno. Nang biglang sumakit ang paa ko, ‘yun pala ay dahil sa langgam na kumagat sa akin.

Ano ang ibig sabihin ng panaginip ko?

Naghihintay,

Lerma

Sa iyo, Lerma,

Ang ibig sabihin ng panaginip mo na namasyal ka sa zoo, at ang daming hayop na nagkakagulo sa kanilang kulungan ay makakaranas ka ng mga paghihirap sa buhay.

Kailangan mong magtrabaho nang husto para ‘di magutom ang pamilya mo. Pero, huwag kang mag-alala dahil pansamantala lamang iyan. 

Ang unggoy ay babala na ihanda mo ang iyong sarili sa ‘di inaasahang kabiguan sa buhay dahil tiyak na mabibigo ka sa pinaplano mong gawin. 

Nakaupo sa puno ‘yung unggoy ay senyales na masasangkot ka sa gulo, kaya dapat mong isiping mabuti kung may nagawa ka bang pagkakamali sa nagdaang mga araw na dapat mong ihingi ng tawad sa iyong kapwa. Gawin mo na ito ngayon at magpakababa ka.

Samantala, ang biglang sumakit ang paa mo, at nakagat ka ng langgam ay sign na makakaramdam ka ng pagkabagot at pagkainis sa lugar na pupuntahan mo na.

Matapat na sumasaiyo,

Maestra Estrellia de Luna

Iba’t ibang kahulugan ng wagon

ni Estrellia de Luna @Panaginip gabay ng buhay | Marso 24, 2024

Analisahin natin ang panaginip na ipinadala ni Lucas ng Roxas City.

Dear Maestra,

Dati akong driver, ngunit nandito na lang ako sa bahay at tumigil na ako sa pagda-drive. Madalas kong mapanaginipan ang wagon car. Ano ang ibig sabihin nito?

Naghihintay,

Lucas 

Sa iyo, Lucas,

Depende sa wagon ang ibig ipahiwatig ng panaginip mo. Kung sa panaginip mo ay may humintong wagon sa harap ng bahay n’yo, naglalaman ito ng magagandang bagay, ito ay nagpapahiwatig na may makikilala kang bagong kaibigan na handang tumulong sa iyo. 

Kung sa panaginip mo nagda-drive ka ng wagon, ngunit hindi naman ikaw ang may-ari nito, ito ay babala na makakaranas ka ng kalungkutan sa darating na mga araw.

Samantala, kung ikaw mismo ang may-ari ng wagon na minamaneho mo, ito ay nangangahulugan na aangat na ang buhay mo. Makakaahon ka na sa kahirapan. Ito rin ay nagpapahiwatig na magkakaroon ka na ng trabaho.

Matapat na sumasaiyo,

Maestra Estrellia de Luna

Kahulugan ng bumisita sa iskul

ni Estrellia de Luna @Panaginip gabay ng buhay | Marso 23, 2024

Analisahin natin ang panaginip na ipinadala ni Fely ng Mandaluyong.

Dear Maestra,

Napanaginipan ko na pumunta ako sa dati kong university, nang may bigla akong narinig na nag-uusap-usap at nagkukuwentuhan habang ang iba naman ay nagba-violin. Napasayaw kaming lahat dahil sa musikang nanggagaling sa violin.

Ano ang ibig sabihin ng panaginip ko?

Naghihintay,

Fely

Sa iyo, Fely,

Ang ibig sabihin na pumunta ka sa dati mong university ay paparangalan ka sa inyong lugar. Magiging mataas ang tingin sa iyo ng mga ka-barangay mo. Hahangaan at igagalang ka nila. 

Ang may narinig kang nagkukuwentuhan ay nangangahulugan na may dadaluhan kang pagtitipon, magiging masaya ang nasabing pagtitipon at mage-enjoy ka sa piling ng mga kaibigan mo.

Samantala, ang violin ay senyales na magkikita-kita kayo ng mga kaibigan mo sa isang pagtitipon na kung saan magiging masaya kayong lahat. 

Ang sumayaw kayong lahat ay tanda na mapupuspos ng kaligayahan ang buhay mo dahil makakatagpo ka ng tunay na magmamahal sa iyo. At susuwertehin ka rin sa pag-ibig.

Matapat na sumasaiyo,

Maestra Estrellia de Luna