Babala na sunud-sunod na problema ang darating

ni Estrellia de Luna @Panaginip gabay ng buhay | Ika-8 Araw ng Abril, 2024

Analisahin natin ang panaginip na ipinadala ni Marie ng La Union.

Dear Maestra,

Napanaginipan ko na umulan ng snow dito sa amin, at kalaunan ay naging snow storm. May nakita akong mga snail sa paligid, dinampot at itinaboy ko ito.

Pagkatapos, hinugasan ko ng sabon ang mga kamay ko para ‘di mangati.

Ano ang ibig sabihin ng panaginip ko?

Naghihintay,

Marie

Sa iyo, Marie,

Ang ibig sabihin ng panaginip mo na umulan ng snow d’yan sa inyo ay makakaranas ka ng pagsubok sa buhay, ngunit malalampasan mo rin ito. Ang nakakita ka ng mga snail ay nangangahulugan na hindi ka mapakali. Magiging problematic ka dahil sa kagagawan ng isa mong kaibigan na naiinggit sa iyo.

Samantala, ang hinugasan mo ng sabon ang mga kamay mo ay babala ng mga problema na sunud-sunod darating sa buhay mo. Pero, kung gagamitin mo iyong ang isip at talino, malalampasan mo rin ito. Dapat kang maging handa sa mga ‘di inaasahang problema. Maging matatag at huwag agad panghinaan ng loob.

Matapat na sumasaiyo,

Maestra Estrellia de Luna

Kahulugan na nag-apply sa Camp Crame

ni Estrellia de Luna @Panaginip gabay ng buhay | Ika-7 Araw ng Abril, 2024

Analisahin natin ang panaginip na ipinadala ni Jomart ng Pasig City.

Dear Maestra,

Napanaginipan ko na nag-apply akong sundalo sa Camp Crame, at agad naman ako natanggap, nang may biglang lumapit sa akin na isang sundalo, may ibinulong siya na dapat kong gawin. Sinunod ko iyon kahit alam kong isang malaking kasalanan ang gagawin ko. Sa sobrang depress ko, pakiramdam ko ay magkakasakit na ako.

Ano ang ibig sabihin ng panaginip ko?

Naghihintay, Jomart

Sa iyo, Jomart,

Ang ibig sabihin ng panaginip mo na nag-apply kang sundalo at natanggap ka naman ay sunud-sunod na pagbabago ang mararanasan mo sa susunod na mga araw.

Ang nilapitan ka ng isang sundalo, may binulong siya sa iyo at sinunod mo ito kahit na alam mong ito’y malaking kasalanan ay babala na may paparating na gulo sa buhay mo. Masasangkot ka sa isang kaguluhan.

Samantala, ang pakiramdam mong magkakasakit ka dahil sa sobrang pagka-depress ay nagpapahiwatig na may paparating sa iyong tukso. Maguguluhan ka kung iiwas ka ba rito o hindi. Pero, mas makakabuting umiwas ka, dahil wala rin naman itong mabuting maidudulot sa buhay mo.

Matapat na sumasaiyo,

Maestra Estrellia de Luna

Sign na gaganda ang future

ni Estrellia de Luna @Panaginip gabay ng buhay | Ika-6 Araw ng Abril, 2024

Analisahin natin ang panaginip na ipinadala ni Jonathan ng Samar.

Dear Maestra,

Napanaginipan ko na naligaw ako sa isang isla. May nakita akong hagdan papunta sa kabilang side. Umakyat ako roon, ngunit nang malapit na ako sa dulo, bigla akong nahilo. 

Ano ang ibig sabihin ng panaginip ko?

Naghihintay,

Jonathan

Sa iyo, Jonathan,

Ang ibig sabihin ng naligaw ka sa isang isla ay depende kung ang isla ay maganda o hindi. Kung maganda ang isla, maraming malalaking puno na kulay berde ay nangangahulugan na fickle minded ang dyowa mo. Pabagu-bago ang isip niya, pero huwag kang mag-alala dahil may makikilala ka pa rin na mas hihigit sa kanya. Siya ang makakatuluyan mo at magiging masaya ka sa piling niya.

Kung ang isla naman ay pangit, tuyot at lanta na ang mga dahon sa puno ay nagpapahiwatig na mawawala na sa landas mo ang dyowa mo. Papanaw na siya at doon na sa kabilang buhay maninirahan.

Samantala, ang umakyat ka sa hagdan upang makarating sa kabilang side ay sign na aaliwalas na pamumuhay mo. Magiging maganda na ang future mo, at matutupad na ang mga pangarap mo sa buhay. Kung may kasintahan ka sa kasalukuyan, magkakatuluyan kayo. Magtatagumpay ka rin sa negosyo. Subalit, ang sabi mo ay nahilo ka pagdating mo sa dulo ay paalala na mapapabayaan mo ang iyong kabuhayan.

Posible ring sumobra ang tiwala mo sa iyong sarili, magiging mapagmataas ka at darating sa punto na hindi mo na maitatama ang gagawin mo. Ito rin ay babala na babalik ka sa dati mong kalagayan na kung saan mahihirapan ka na namang makaangat sa buhay.

Matapat na sumasaiyo,

Maestra Estrellia de Luna