Balak na pagtatanan, dapat ituloy dahil sure na liligaya

ni Maestro Honorio Ong @Kapalaran ayon sa Palad | October 20, 2023

KATANUNGAN

1. May girlfriend ako sa ngayon, Maestro. Ang problema ko ay inilayo siya sa akin ng kanyang kamag-anak, at iniuwi siya sa probinsya. Ang buong akala nila ay wala na kaming komunikasyon. Pero, alam ko ang buong detalye ng nangyari at alam ko rin kung saan siya itinago ng mga kamag-anak niya. Nasa probinsya raw siya at sabi niya sa akin ay puntahan ko raw siya at magtanan na kami.

2. Wala nang mga magulang ang girlfriend ko at ang nag-aalaga na lang sa kanya ay ang mga tiyahin at tiyuhin niya na pinagmamalupitan siya. Mula nang inilayo siya sa akin, pinagmamalupitan at ikinukulong na siya.

3. Sabi ng girlfriend ko, sunduin ko siya at sasama na umano siya sa akin dahil may stable work na ako at nasa tamang edad na kami. Ang gusto kong malaman ay tama ba ang gagawin ko?

4. Nalilito kasi ako, kung dapat na ba akong mag-asawa o hindi pa. Maestro, nais ko rin malaman kung compatible ba talaga kami? Ang zodiac sign ko ay Virgo habang Pisces naman ang nobya ko.

KASAGUTAN

1. Tutal nasa legal age o nasa tamang edad na kayo upang mag-asawa at gumawa ng mga bagay sa sarili n’yong pagpapasya. Kaya kung mahal mo talaga ang girlfriend mo at siya na ang gusto mong mapangasawa, walang dahilan upang hindi mo sunduin ang girlfriend mo, saan man siyang lupalop o probinsya naroroon.

2. Samantala, kayo na nga ang magkakatuluyan ng kasalukuyan mong girlfriend anuman ang mangyaring aberya o problema sa inyong pagmamahalan. Ito ang nais sabihin ng maganda at maayos na kaisa-isang Marriage Line (Drawing A. at B. 1-M arrow a.) sa kaliwa at kanan mong palad. Kaya tulad ng nasabi na, puwede mo na siyang puntahan sa probinsya o kung saan lugar man siya itinago ng kanyang mga kamag-anak. Sapagkat, tiyak ang magaganap, hindi na nga maaawat pa ang pagmamahalan n’yo na madali namang kinumpirma ng maayos at magandang Heart Line (Drawing A. at B. h-h arrow b.) na nagsimula sa Bundok ng Kaligayahan (arrow c.) sa kaliwa at kanan mong palad. Ngayon lang magkakaroon ng problema sa relasyon n’yo, pero kapag nakasal at nagsama na kayo, tiyak na ang isang maligaya at panghabambuhay na pagpapamilya.

DAPAT GAWIN

Habang ayon sa iyong mga datos, Carl, anuman ang mangyari, sa bandang huli tiyak pa rin ang magaganap, kayo na nga ng kasalukuyan mong girlfriend ang nakatakdang magsama at bumuo ng isang maligaya at panghabambuhay na pagpapamilya na nakatakdang mangyari at maganap sa taon ding ito ng 2023 sa buwan ng Nobyembre sa edad mong 28 pataas habang 25 pataas naman ang girlfriend mo.

1 month nang hiwalay… Mag-asawa, sure na magkakabalikan ngayong buwan

ni Maestro Honorio Ong @Kapalaran ayon sa Palad | October 16, 2023

KATANUNGAN

1. Mag-iisang buwan na kaming hiwalay ng aking asawa. Mula nang umuwi siya galing abroad, halos ubusin niya na ang kanyang pera sa pagpapainom. Pinagsabihan ko siya pero ako pa ang naging masama. Bakit ko raw siya pinapakialaman? Samantalang pinaghirapan umano niya sa abroad ang perang inuubos niya, muntik na kaming magkasakitan, mabuti na lang ay inawat kami ng mga anak namin.

2. Mula noon, hindi na siya umuwi ng bahay at ang balita ko ay nakikituloy siya sa kanyang mga kaibigan. Natatakot ako, Maestro, baka tuluyan kaming maghiwalay. Kung sakaling mangyari 'yun, nakakaawa naman ang mga anak namin dahil mga bata pa sila. Naguguluhan na ako ngayon sa sitwasyon namin. Kaya sana maanalisa mo ang kapalaran ko.

KASAGUTAN

1. Sadyang napakalaki pa ng pag-asa na kayo ay magkabalikan, basta ang mahalaga, hanapin mo ang mister mo kung saang lupalop siya nagsuot at kausapin mo siya nang masinsinan.

2. Nangyaring ganu’n, sapagkat ayon sa guhit ng iyong palad, nagtataglay ka ng isang malinaw, makapal at mahabang Marriage Line (Drawing A. at B. 1-M arrow a.) sa kaliwa at kanan mong palad. Ito ay malinaw na tanda, na kung sino ang lalaking una mong inibig at pinakasalan, ang lalaki ring ito ang nakatakda mong makasama habambuhay.

3. Ang iyong lagda na medyo magulo sa gitna ay nagsasabi namang marahil sa kasalukuyan ay dinadaan lang sa mabigat na pagsubok ang inyong relasyon, pero dahil gumanda at naayos din naman ang iyong lagda, ito ay malinaw na mahahawi rin ang makapal na ulap sa kalangitan at sa pagmulat ng iyong mata makikita mo ang isang maaliwalas at mas positibong bagong araw sa relasyon n’yo.

MGA DAPAT GAWIN

1. Wala namang buhay sa mundong ito na walang problema. Katulad din ng mag-asawa, hindi talaga maiiwasan na dumaan sa mga suliranin at mabibigat na pagsubok ang relasyon. Sa sandaling malampasan nila ang mga pagsubok na ito, magkakaroon ng maturity sa kanilang pagkatao na magiging daan upang muli silang magkasundo at magmahalan habambuhay.

2. Habang ayon sa iyong mga datos, Elora, nakatakda na ang muling pagkakasundo n’yong mag-asawa sa taon ding ito ng 2023 sa buwan ng Oktubre, magiging okey na muli ang lahat, at magkakasama-sama na muli ang isang buo at maligayang pamilya habambuhay, (Drawing A. at B. h-h arrow b. at 1-M arrow a.).

Alamin: Mga Dos and Don’ts ng mag-asawang gustong umunlad

ni Maestro Honorio Ong @Kapalaran ayon sa Palad | October 14, 2023

KATANUNGAN

1. Matagal na akong sumusubaybay sa kolum n’yo, kaya naisipan ko ngayong magpaanalisa.

2. May sloping Head Line ako, o medyo nakakurbang pabilog ang dulo ng guhit ng aking palad. Sabi n’yo kasi dati, dapat straight ang Head Line dahil sila ang mga taong yumayaman. Kung hindi yayaman ang may sloping o pakurbang pabilog na Head Line, ano’ng mangyayari sa kanyang kapalaran, lalo na pagdating sa career?

3. Sa ngayon, nag-a-apply ako sa abroad. Ang pinoproblema ko, kapag natuloy ako, sino ang mag-aasikaso sa mga bata? Ngayon kasi, nagtatrabaho rin ang misis ko bilang guro at sabi niya, kahit nasa abroad na ako, hindi pa rin siya magre-resign sa pagtuturo dahil sayang ang benepisyo na matatanggap niya kapag nasa retirement age na siya.

4. Kaya ngayon, kahit may aplikasyon ako sa abroad, nagdadawalang-isip pa rin ako kung tutuloy ako o hindi?

5. Sa palagay n’yo, may maganda bang pag-a-abroad ang nakalaan para sa akin? At kahit sloping ang aking Head Line, puwede rin ba kaming yumaman?

KASAGUTAN

1. Tulad ng kasalukuyan mong attitude sa buhay ang nais ihayag ng sloping Head Line (Drawing A. at B. H-H arrow a.) sa kaliwa at kanan mong palad. Mas nauuna ang negatibong pag-iisip kaysa ang magandang mangyayari sa hinaharap.

2. Isang kongkretong halimbawa ang iniisip mong pag-a-abroad dahil hindi ka pa man natutuloy, sari-saring negatibong bagay at pag-aalinlangan na agad ang pumapasok sa iyong isipan kung saan dahil sloping ang iyong Head Line (H-H arrow a.), na ang ibig sabihin ay imbes na lumawak ay unti-unting dumidikit o lumalapit sa Life Line (arrow b.) ay nangangahulugang malayo na sana ang narating at naabot mo kundi lamang masyado kang “self-conscious” sa mga binabalak, iniisip at ginagawa mo.

3. Dagdag pa rito, hindi lang masyadong “self-conscious”, bagkus, ang mas masaklap pa nito ay katitingin at kapapansin mo sa maaaring mangyari, mas nauuna mong nakikita at pumapasok sa isipan mo ay mga negatibong senaryo. At ang pagiging metikolosong ito ay pinalala pa ng zodiac sign mong Virgo. Tanda na dahil sa pagiging perpeksiyonista, mas nakikita nila ang maliit na mantsa sa kulay puting damit kaysa ang kabuuang kulay at ganda ng nasabing kasuotan.

4. Sa madaling salita, kapag hindi ka nagbago ng pananaw o attitude sa buhay, tulad ng nasabi na, malayo na ang nararating ng mga kasabayan mo at mga kaibigan mo, kayo naman ni misis ay isang kahig at isang tuka pa rin o kaya naman mayayaman na ang mga kasabayan mo. Pero, kahit dalawa pa kayo ni misis na nagtatrabaho mahirap pa rin kayo at maraming utang. Paano nga kasi, masyadong negatibo ang pananaw mo sa halos lahat ng sitwasyon at pangyayaring dumarating sa inyo.

MGA DAPAT GAWIN

1. Habang, ayon sa iyong mga datos, Allan, kapag hindi mo naiwaksi sa iyong isipan ang pag-aalala at alinlangan sa iyong sariling kakayahan kahit patuloy na magturo sa public school si misis at makapag-abroad ka rin, hindi pa rin kayo yayaman.

2. Sa kabilang banda, tandaan mo na magsisimula lamang kayong yumaman sa sandaling naging positibo at praktikal ang laman ng iyong isipan at kapag mas tinitingnan mo nang mas maganda ang bawat pangyayari sa inyong buhay, unti-unti na ring dumiretso ang sloping Head Line (Drawing A. at B. H-H arrow a.) sa kaliwa at kanan mong palad, hanggang sa unti-unting magbalik sa tamang direksyon — ang pagiging tuwid na Head Line (arrow c.) na nagbabadya ng walang dudang pag-unlad hanggang sa tuluyan na ring yumaman ang inyong pamilya na nakatakdang mangyari at maganap sa taong 2025 sa edad mong 32 pataas.