Kahit pa may mga junakis… Bebot, makakatikim na uli ng masayang pamilya

ni Maestro Honorio Ong @Kapalaran Ayon Sa Palad | Oct. 11, 2024

KATANUNGAN

1. Hiwalay ako sa asawa ko at may dalawa kaming anak. Sa ngayon ay may nanliligaw sa akin na hiwalay din sa kanyang asawa. Kahit na mahal ko siya, natatakot at nag-aalinlangan pa rin akong sagutin siya, dahil baka maulit na naman ‘yung nangyari sa una kong asawa, na naging babaero, lasinggero at ang mas masakit pa ay madalas na akong pagbuhatan ng kamay. Kaya naman, ‘yun din ang dahilan kung bakit ‘di na ko nagdalawang isip pa na layasan ang una kong asawa. 

2. Maestro, kung saka-sakaling sagutin ko na ang manliligaw ko, magiging successful na kaya ang ikalawa kong pag-aasawa? 

KASAGUTAN

1. Kung mas iisipin mo ang takot, mapait at malungkot na nakaraan mo, paano ka makaka-move on? Kung ‘yun lang lagi ang iisipin mo, paano ka magkakaroon ng masayang buhay, lalo na sa larangan ng pagpapamilya? 

2. Oo, sabihin na nating may dalawa kang anak ngayon, pero paano kapag nag-asawa na rin sila at nagkaroon ng sariling pamilya? Minsan, sa tuwing nagkakaroon tayo ng mapait na karanasan, nananatili ito sa ating memorya at ilang taon pa bago ito tuluyang mabura, idagdag mo pa na naru’n na rin ang trauma at mapait na karanasan na siyang nagdudulot sa atin ng takot para hindi na kumilos pa.

3. Kaya nga napakahalaga na marunong kang magbasa ng guhit ng palad, upang matiyak mo kung mauulit pa ba, o hindi na ang nakaraang mapait na karanasan ng isang indibidwal na tulad mo. 

4. Sa kaso mo, kapansin-pansing may malinaw at magandang ikalawang Marriage Line (Drawing A. at B. 2-M arrow b.) sa kaliwa at kanan mong palad. Ibig sabihin, tiyak na ang magaganap, ang ikalawa at magandang Marriage Line (Drawing A. at B. 1-M arrow b.) ang mananaig. Kaya naman, may pangako ng isang maligaya at panghabambuhay na pagpapamilya sa iyo na kinumpirma ng Heart Line (Drawing A. at B. h-h arrow c.) na nakatungtong sa Bundok ng Ligaya (arrow c.) sa kaliwa at kanan mong palad, na nagsasabing nabigo ka man at lumuha sa unang pag-aasawa, tiyak na sa ikalawang pag-aasawa, makakaranas ka na ng isang maligaya at panghabambuhay na pagpapamilya.

DAPAT GAWIN

Habang ayon sa iyong mga datos, Issay, mas mananaig ang ikalawang mas magandang Marriage Line (arrow b.) sa kaliwa at kanan mong palad kesa sa (arrow a.), ito ay maliwanag na tanda na sa iyong ikalawang pag-aasawa, hatid ng kasalukuyan mong manliligaw, habambuhay ka nang liligaya na nakatakdang mangyari sa susunod na taon, sa edad mong 33 pataas.

Ayon sa Astro-Numerology… Mr. Scorpio, dapat piliin para sure na lumigaya

ni Maestro Honorio Ong @Kapalaran Ayon Sa Palad | Oct. 7, 2024

KATANUNGAN

1. Dalawa ang boyfriend ko ngayon. Maestro, sino sa dalawa kong boyfriend ang makakatuluyan ko? Tawagin na lang natin sa pangalang “James” ‘yung una kong boyfriend, isinilang siya noong February 12, 1997, habang ‘yung pangalawa naman ay tawagin na lamang nating si “Ian”, na isinilang noong November 16, 1998. Sino ba ang ka-compatible ko sa kanilang dalawa? Ang birthday ko ay July 1, 1998.

2. Ayon sa aking palad at birthday, sino sa dalawang boyfriend ko ang makakatuluyan, at mapapangasawa ko?  

KASAGUTAN

1. Ayon sa Astro-Numerology, tunay ngang ang zodiac sign mong Cancer, at birth date na 1 ay nagsasabing higit mong ka-compatible si Ian na isinilang sa zodiac sign na Scorpio, at may birthday na November 16, 1998, kung ikukumpara kay James, na may zodiac sign na Aquarius, at may birthday na February 12, 1997.

2. Nangyaring ganu’n, dahil ang Scorpio at Cancer ay may iisang elementong tinataglay, at ito ay ang elementong tubig o water. Habang ang birth date mo namang 1 na isang strong number ay tugma at compatible rin ipareha sa birth date na weak number ni Ian na 16, o (ang 16 ay 1+6=7). Ibig sabihin, kung Astro-Numerology lang tatanungin, si Ian ang dapat mong piliin, na pinatunayan pa ng ikalawang mas mahaba, makapal, at malinaw mong Marriage Line (Drawing A. at B. 2-M arrow b.) kung ikukumpara sa naunang mas maikli at hindi masyadong malinaw na Marriage Line (Drawing A. at B. 1-M arrow a.) sa kaliwa at kanan mong palad, na nangangahulugang kung sino ang ikalawang lalaking dumating sa buhay mo, ‘yun ang lalaking magseseryoso sa iyo at makakasama mo sa pagbuo ng isang maligaya at panghabambuhay na pagpapamilya. 

DAPAT GAWIN

Kaya ayon sa iyong mga datos, Daisy, tiyak na ang magaganap, kung sakaling kailanganin mong mamili, piliin mo si Ian upang mapangasawa at makasama mo sa pagbuo ng isang masaya at panghabambuhay na pamilya na nakatakdang mangyari sa taong 2026, sa buwan ng Mayo, at sa edad mong 28 pataas.

Todo-bigay ng katawan… Bebot na gusto nang magbago, takot gantihan ng kapalaran

ni Maestro Honorio Ong @Kapalaran Ayon Sa Palad | Oct. 5, 2024

KATANUNGAN

1. Seventeen years old ako nang mawala ang aking pagkababae sanhi ng pagiging mapusok namin ng boyfriend ko, pero nang lumaon ay nagkahiwalay din kami. Mula noon, nawalan na ako ng tiwala sa mga lalaki, pero kahit na ganu’n, nagka-boyfriend pa rin ako. Hindi na para umibig, kundi para maghiganti. 

2. Maraming beses ko ring naibigay ang aking pagkababae, at pagtapos nu’n ay agad ko silang nilalayuan, hinahabol nila ako, at may iba pa na umiiyak talaga dahil sobra nila akong minahal.

3. Sa ngayon, dalawa ang boyfriend ko. Naisipan kong sumangguni sa inyo upang malaman kung sino sa kanilang dalawa ang dapat kong seryosohin. Sa edad kong 23, sawa na ako sa pagkadalaga at gusto ko nang mag-asawa at magkaroon ng pamilya.

4. Subalit ang pangamba ko ay baka hindi rin ako seryosohin ng dalawa kong bf dahil hindi na ako virgin nang makuha nila ako. Sa inyong palagay, Maestro, sa panahon ngayon, may mga lalaki pa bang nagpapahalaga sa virginity ng isang babae?

5. Sa nakikita n’yo sa aking mga palad, may maligaya bang pag-aasawa na mangyayari kahit na maraming lalaki akong pinaluha at pinaglaruan?

KASAGUTAN

1. Sa totoo lang, hindi rin masasabing pinaglaruan, pinaasa at pinatikim mo ang mga lalaking nakarelasyon mo. Sa halip, hindi lang ikaw ang naglaro dahil pati sila ay ganundin. 

2. Samantala, kapansin-pansing matapos mawasak at masira nang tuluyan ang Venus Line (Drawing A. at B. V-V) na tinatawag ding Guhit ng Kamunduhan (arrow a.), kasabay nitong nagkabilog at nagkalagut-lagot ang ilang mahahalagang bahagi ng Heart Line (Drawing A. at B. h-h arrow b.) sa kaliwa at kanan mong palad.

3. Tanda na matapos mawala ang iyong virginity, tulad ng iyong ginawa at hinayaang mangyari, kasunod ng pagkasira ng puri, ang puso at damdamin mo naman ang hinayaan mong malunod sa mundo nang ka-immoralan at kawalan ng pagpapahalaga sa iyong pagkababae. 

4. Sa bandang huli, tulad ng iyong inaasahan, ang nagulo at nabiyak na kaisa-isang Marriage Line (Drawing A. at B. 1-M arrow c.) sa kaliwa at kanan mong palad ang nagsasabing may lalaki mang magpakasal at umibig sa iyo, sa pagkawasak ng pamilya at paghihiwalay din hahantong ang lahat. Ang magiging bunga ng inyong pagmamahalan o ang iyong mga magiging anak ay makararanas ng wasak o broken family.

DAPAT GAWIN

Samantala, mabuti na lang may ikalawang Marriage Line (Drawing A. at B. 2- M arrow d.) na umusbong, at namataan sa kaliwa at kanan mong palad, na nagsasabing sa bandang huli, matapos kang pagsawaan at anakan ng kung sinu-sinong lalaki, sa taong 2028, makakatagpo at makakasumpong ka rin ng isang tapat at mapa-mahal na lalaki na nagtataglay ng zodiac sign na Gemini.  Kung saan,  sa kabila ng may mga anak ka na sa pagkadalaga, mamahalin ka niya nang tapat at lubusan, upang sa nasabing panahon, sa edad mong 27 pa taas, siya na rin ang mapapangasawa at makakasama mo sa pagbuo ng isang maligaya at panghabambuhay na pagpapamilya.