Bebot, susuwertehin sa abroad kung yellow, pink o red ang isusuot na damit

ni Maestro Honorio Ong @Kapalaran ayon sa Palad | Enero 17, 2024

KATANUNGAN

1. May inaaplayan akong trabaho sa ngayon. Ano ba ang kulay ng damit na dapat kong suotin para suwertehin at matanggap kaagad ako? September 28, 1994 ang birthday ko.

2. Balak ko ring mag-abroad. Kaya sana, pakianalisa na rin kung may Travel Line sa aking mga palad at kung ano’ng mangyayari sa aking career sa future at kung okey na ba ang signature ko? 

KASAGUTAN

1. Maganda at okey na itong signature mo kung saan simpleng letrang “r” at “a” lang ang nasa unahang bahagi habang tinapos mo ang iyong lagda sa straight line o tuwid na guhit. Ibig sabihin, ituloy mo lang ang paggamit sa nasabing pirma at makikita mo, susuwertehin ka na higit lalo sa last quarter ngayong 2024 at magtutuluy-tuloy pa ang nasabing magandang kapalaran hanggang sa bumungad ang taong 2025.

2. Ang kulang na lang talaga sa iyo kaya ayaw pang ngumiti nang husto sa karanasan mo ang mabuting kapalaran ay ang paggamit at pagsusuot ng kulay pula at puwede rin ang pink at dilaw na siyang mapalad mong mga kulay. 

3. Oo, isa sa mapalad mong kulay ay ang dilaw o yellow, dahil ang birth date mong 28 ay may sumatotal na 1, nangyari ganu’n dahil ang 28 ay 2+8=10, 1+0=1. Habang ang zodiac sign mong Libra na nagsasabi namang mapalad ka rin sa mga kulay na pink at red. Ibig sabihin, kapag lagi kang gumamit at nagsuot ng kulay na dilaw, pink at red, mas mabilis kang susuwertehin at mas mabilis kang magtatamo ng magaganda at bonggang-bonggang kapalaran.

4. Samantala, halos may namataang Travel Line (Drawing A. t-t arrow c.) sa kaliwa mong palad, pero parang wala naman guhit ng paglalakbay sa kanan mong palad. Ibig sabihin, kailangang pagsikapan mo talaga ang pag-a-apply sa abroad upang magkaroon ng positibong bunga ang iyong mga pagsisipag dahil kung hindi mo ipipilit nang husto ang gusto mong mangyari sa iyong buhay, sa halip, maghihintay ka lang ng tamang pagkakataon tulad ng nasabi na, malabong mapasaiyo ang magagandang kapalaran. Kaya tandaan mo rin ang kasabihang ipinamana sa akin ni Kuya Manoling, “Sa taong buo ang loob, ang yaman at ligaya ay lubos!”

DAPAT GAWIN

Ayon sa iyong mga datos, Seina, wala kang dapat gawin ngayon kundi mag-apply kahit saang kumpanya mo maibigan dahil ngayong 2024, sa edad mong 29 pataas, tuluyan nang ngingiti sa iyong buhay ang magandang kapalaran, matatanggap ka na sa inaaplayan mong trabaho at sa susunod na taong 2025, makapangingibang-bansa ka na rin hanggang sa tuluy-tuloy na ring umunlad ang iyong career.

Magkasintahang magkapareho ng guhit ng palad

ni Maestro Honorio Ong @Kapalaran ayon sa Palad | Enero 15, 2024

KATANUNGAN

1. May boyfriend ako at napansin kong kapareho ko siya ng palad. May dalawang Fate Line sa kaliwa at kanang palad namin, ano ang ibig sabihin nito?  

2. Pareho rin kaming may Travel Line, ibig sabihin ba nito ay makapag-a-abroad kami at sa ibang bansa kami maninirahan?

3. Ang plano kasi namin ay mag-apply sa Canada. Matutupad ba ang plano at pangarap naming ito? Maestro, sa palagay n'yo rin ba kami na ang magkakatuluyan?  

KASAGUTAN

1. Kapag medyo hawig o magkapareho ang guhit ng palad ng magkasintahan o mag-asawa, tama ka, ibig sabihin nito ay compatible kayo sa isa’t isa, lalo na at nagkataong tugma at compatible rin kayo sa Astro-Numerology na pag-aanalisa.

2. Samantala, kapag “doubled fate line” o “doubled career line” (Drawing A. at B. F-F arrow a.) sa kaliwa at kanang palad, ito ay nangangahulugan ng dalawang hanapbuhay o dalawang sabay na source of income sa iisang panahon. Puwede ring sabihing dalawa ang source of income o trabaho mo.

3. Kaya kung ganito ang Fate Line (arrow a.) n’yo ng boyfriend mo, maliwanag na maliwanag na magiging maalwan o produktibo ang inyong career at aspetong pampinansyal. 

4. Samantala, kapag pareho naman kayong may Travel Line (Drawing A. at B. t-t arrow b.) sa kaliwa at kanang palad, ito ay maliwanag na tanda na sa sandaling kayo ang nagkatuluyan, tulad ng inaasahan, pareho kayong makapag-a-abroad o matutupad nang kusa ang pangarap n’yong makapagtrabaho o maging immigrant sa Canada.

5. Tungkol naman sa tanong mo na kung kayo na ang magkakatuluyan ng boyfriend mo. Eksakto ang tugon, kung saan hindi mo ba napansin, bukod sa pareho kayo ng Fate Line (Drawing A. at B. F-F arrow a.) at Travel Line (Drawing A. at B. t-t arrow b.), kitang-kita rin na iisa ang Marriage Line (Drawing A. at B. 1-M arrow c.) sa kaliwa at kanan n’yong palad? Ibig sabihin, walang duda kayo na nga ang magsasama sa pagbuo ng isang maligaya at panghabambuhay na pamilya.

DAPAT GAWIN

Habang, ayon sa iyong mga datos, Chelssy, dahil magkamukha o halos magkapareho ang mga guhit sa kaliwa at kanang palad n’yo ng boyfriend mo at kung nagkataong kapwa medyo makapal o may energy ang inyong mga palad kapag sinalat, ibig sabihin ay tumatalbug-talbog, tiyak ang magaganap, hindi lang kayo magiging maligaya at compatible sa isa’t isa. Sa halip, uunlad din ang inyong pagsasama at anuman ang pangarapin n’yong dalawa, tiyak na matutupad ito tulad ng plano n’yong pag-i-immigrant sa Canada na nakatakdang mangyari sa taong 2026 at sa edad mong 33 pataas.

Bebot na wa’ work at dyowa, dapat baguhin ang pirma para umunlad

ni Maestro Honorio Ong @Kapalaran ayon sa Palad | Enero 13, 2024

 KATANUNGAN

1. Nagtataka ako sa aking sarili kung bakit lagi akong nabibigo sa buhay, lalo na pagdating sa pag-ibig at career. Napapansin ko ring tila maramot sa akin ang kapalaran dahil nagka-boyfriend na ako noon tapos naghiwalay din kami. Mula noon, parang may sumpa dahil hindi na ulit ako nagka-boyfriend at kahit nagkatrabaho ako, maliit ang suweldo at kulang pa sa pamasahe at pagkain, kaya nag-awol din ako.

2. Ngayon, wala akong boyfriend at trabaho, kaya bored na bored ako sa bahay at palagi pa akong sinasabihan ng nanay ko na maghanap na umano ako ng trabaho. Nang minsan akong nag-apply, hindi rin ako natanggap at hindi ko naman alam ang dahilan kung bakit ayaw nila sa akin.

3. Maestro, ano ba ang dapat kong gawin at kailan ba “sisikat ang araw” sa aking kapalaran? Sa pagkakaalam ko, ako ay Taong Uno at sabi n’yo noon, mapalad ang mga taong isinilang sa impluwensya ng Sun.

KASAGUTAN

1. Noong unang araw mo sa mundo o noong iniluwal ka ng nanay mo sa eksaktong petsang August 13, 1998, hindi ba’t tuwang-tuwa ang mga magulang mo? Alalahanin mong isa kang magandang sanggol na nakatapos ng pag-aaral at naka-gradweyt ng college. Hindi ba’t noong tinanggap mo ang iyong diploma ay tuwang-tuwa ulit ang mga magulang mo at pati ikaw?

2. Ang mga aktuwal na tala na binanggit ay larawan lamang na hindi madamot ang kapalaran – dahil ikaw mismo at ang iyong mga accomplishment ay buhay na sukli at handog sa mga magulang mo ng kapalaran. Kaya kung hindi ka makakatagpo ng magandang trabaho at masayang pakikipagrelasyon, lumalabas na ikaw mismo ang nanloloko o nagpapahina sa magagandang kapalarang nasa iyo na sa kasalukuyan.

3. Nar’yan ka, buhay, malakas, maganda at nakatapos ng pag-aaral, wala ka namang sakit o kapansanan, kaya gamitin mo ang nasabing mga talento upang ika’y lumigaya at magtagumpay.

4. Ang birth date mo kasing 13 ay magulo at minsan ay sobrang layo sa katotohanan ng mga iniisip mo. Kaya sa simula palang ng pagtatangka ay nabibigo ka na agad, na madali namang kinumpirma ng very sloping Head Line (Drawing A. at B. H-H arrow a.) sa kaliwa at kanan mong palad. Tanda na mayaman ka sa imahinasyon at ideya, pero kulang ka sa pagkilos at praktikal na pagpapasya, kaya sa tuwing may gagawin ka, mas madalas na nabibigo ka kaysa sa nagtatagumpay.

5. Subalit kung magbabasa ka ng mga positive thinking na libro o mga librong may temang pagkukumbinsi sa mga readers na siya ay magaling at may malaking potensyal, kapag binasa mo nang binasa ang mga ganu’ng aklat, kasabay ng bahagyang inobasyon sa iyong lagda, na sobrang dami at malalaki ang bilog sa itaas na bahagi sa partikular ng letrang “A” at “t”, alisin mo ang nasabing bilog, sa halip simpleng “A”, habang ang “t” ay lagyan ng mahabang krokes sa tuktok. Kapag nagawa mo ‘yan, makikita mo na unti-unti nang magbabago ang iyong kapalaran, kusa kang magiging praktikal, tatalas ang iyong isip na kumilos imbes na mangarap, at mag-isip ng mga simple at nasa reyalidad na diskarte. Sa ganyang paraan, walang duda na magkakaroon ka na ng regular na trabaho at kasabay nito, isang lalaking kayumanggi ang kulay ng balat ang biglang susulpot, liligawan ka niya hanggang sa tuluyan mo siyang maging boyfriend.

DAPAT GAWIN

Ang nasabing positibong pagtaya sa itaas, ayon sa iyong mga datos, Alexa, at ayon din sa magandang Fate Line na tinatawag ding Career Line (F-F arrow b.), maganda at maayos ding Marriage Line 1-M arrow c.) sa kaliwa at kanan mong palad ay magsisimulang mangyari at maganap sa taong kasalukuyan 2024, sa buwan ng Marso sa edad mong 25 pataas – magkakaroon ka na ng regular na trabaho sa isang kumpanyang may kaugnayan sa communication, habang sa nasabing kumpanya roon mo na rin makikilala ang isang lalaking isinilang naman sa zodiac sign na Sagittarius na siya nang magiging boyfriend mo hanggang sa tuluyan mong makasama sa pagbuo ng isang maunlad at maligayang pamilya habambuhay.