Naudlot na pangingibang-bansa, matutuloy sa edad na 32

ni Maestro Honorio Ong @Kapalaran ayon sa Palad | Enero 30, 2024

KATANUNGAN 

1. Nag-apply akong domestic helper (DH) sa abroad, pero noong taong 2022 ay bigla akong nagkasakit, kaya hindi ako natuloy.  Aalis na sana ako noon, kaya lang kinailangan kong magpa-opera dahil mayroon akong gallstones. 

2. Pero ngayon ay magaling at malakas na ko. Kaya naisipan kong sumangguni sa inyo para itanong kung sakali bang mag-a-apply ako ngayong 2024, matutuloy at susuwertehin na kaya ako?

3. At kung sakaling makapag-abroad ako, ang isa ko pang nais malaman ay kung magiging maganda ba ang buhay ko roon? Sa Middle East kasi ako pupunta. Itatanong ko na rin sana, Maestro, kung may pag-asa pa ba akong yumaman? Balak ko kasing magnegosyo kung sakaling makapag-ipon na ako ng sapat na puhunan.

KASAGUTAN

1. Kapansin-pansing may malinaw, mahaba, at malawak kang Travel Line (Drawing A. at B. t-t arrow a.) sa kaliwa at kanan mong palad. Ito ay malinaw na sa takdang panahong inilaan ng kapalaran may isang mabunga at mabiyayang pangingibang-bansa ang itatala sa iyong kapalaran na madali naman kinumpirma at pinatunayan ng iyong lagda na umalun-alon.

2. Ibig sabihin, ngayon palang nasasagap na ng unconscious self mo, ang isang positibong pangyayari na magaganap sa iyong kapalaran patungong abroad.

3. Ang pag-a-abroad na nabanggit ay muling kinumpirma at pinatunayan ng birth date mong 5. Kung saan, sa edad mong 32 pataas, may mahalagang pangyayaring magaganap sa iyong karanasan – tulad ng nasabi na, itatala sa iyong karanasan ang isang mabunga at mabiyayang pangingibang-bansa na tinatayang magaganap ngayon taon.

4. At sa panahong makapangibang-bansa ka na, walang habas at walang tigil ka nang magpapabalik-balik sa pangingibang-bansa hanggang sa dumating ang panahong makapag-ipon ka na ng malaking halaga na maaari mong magamit na puhunan, upang lalo pang umunlad at sumagana ang inyong kabuhayan, na kinumpirma at pinatunayan ng straight Head Line (Drawing A. at B. H-H arrow b.) sa kaliwa at kanan mong palad na nagbabadya ng isang malaking pagyaman.

DAPAT GAWIN

Habang ayon sa iyong mga datos, Christine, tiyak ang magaganap kung mag-a-apply ka na ngayon, sa last quarter ng taon ding ito ng 2024, sa edad mong 32 pataas, may isang mabunga at mabiyayang pangingibang-bansa ang itatala sa iyong kapalaran na magiging simula para ang kabuhayan mo ay unti-unti na ring umunlad nang umunlad. Sa pagtuntong mo ng edad 41 pataas, mabilis na lalago ang iyong negosyo hanggang sa tuluyan ka ng yumaman (Drawing A. at B. H-H arrow b.).

Dalaga na nakatakdang mabalo, mas liligaya sa ikalawang mapapangasawa

ni Maestro Honorio Ong @Kapalaran ayon sa Palad | Enero 28, 2024

KATANUNGAN

1. May boyfriend ako ngayon at niyayaya na niya akong magpakasal. Wala namang problema dahil nasa wastong edad na kami. Kaya lang, putol at nabiyak ang Heart Line ko, habang nakabaluktot naman pababa ang unang Marriage Line sa aking palad. Sa pagkakaalam ko, ‘pag ganu’n ang guhit ay mahihiwalay sa asawa o mababalo. Tama ba ito, Maestro?

2. ‘Yun ang gumugulo sa isipan ko kaya ngayon ay natatakot akong mag-asawa. Kung totoong ganu’n ang mangyayari base sa pagkakaintindi ko, tama ba ang iniisip kong ‘wag na lang mag-asawa upang hindi ako makaranas ng kalungkutan kung sakaling mawala ang lalaking pakakasalan ko?

 KASAGUTAN

1. Wala namang buhay na permanenteng masaya o palaging maligaya. Kahit saang lugar sa mundo at kahit ano’ng sitwasyon, palaging may kalungkutan at problema. Kung meron mang lugar o bagay na “laging masaya”, ito ay sa mga kuwento lamang ng pag-ibig na nababasa natin sa mga fairy tale at pocket book. 

2. Pero sa totoong buhay, tama ang ateistang pilosopo na si Arthur Schopenhauer. Sabi niya, “Kung itutuloy lang ang istorya sa natapos na nobela, tiyak na ang bida o prinsipe at ang prinsesa ay hindi naman magiging maligaya habambuhay. Siguradong kapag itinuloy ang kuwento, daranas din sila ng magulong buhay at sari-saring mga problema.” Posibleng maubusan ng pambili ng bigas ang mag-asawa at maaari ring magkasakit ang kanilang mga anak. Posible ring mambabae si mister o manlalaki si misis at maaaring mawalan ng trabaho si mister o magkasakit si misis. At sa bandang huli ay magkakasakit ang prinsesa at prinsipe, tatanda at mamamatay. 

3. Ang mga senaryong nabanggit sa itaas ay ang katotohanan ng buhay na isinulat ni Schopenhauer sa kanyang aklat na The World as Will and Idea. Sabi niya, “As in popular fiction, the story must be ended when after interminable vicissitudes, the hero and heroine are happily wedded, for if the narrative continued, the reality of repeated misfortune would eventually prove, that life must be some kind of mistakes and that it is a sin to be born.” Ibig sabihin, hindi masarap ang buhay, sa halip ang buhay ay punumpuno ng pagdurusa. 

4. Buti na lang, iba ang pananaw ng dakilang pintor na si Leonardo Da Vinci hinggil sa mga dinaranas nating pagdurusa, problema at kasawian sa buhay. Sabi Da Vinci, “There is no perfect gift without great suffering.” Ibig sabihin, bahagi ng buhay ang pagdurusa upang pagkatapos nito, ikaw naman ay lumigaya.

5. Kaya nga kung ang itinakda sa iyo ng kapalaran ay mawalan ng asawa, ‘wag kang matakot na danasin ito dahil hindi porke nawala ang iyong asawa ay tapos na ang istorya ng iyong buhay. 

6. Sa totoo lang, kabaligtaran ng sinasabi ni Schopenhauer, “Hindi natatapos ang kuwento ng trahedya at drama sa kalungkutan. Bagkus, kahit mamatay ang bida, kapag itinuloy ang istorya, ang pagkawala ng bida ay siya namang magiging simula upang lumabas ang ikalawang bida, na siyang magbibigay ng panibagong sigla at pag-asa sa mga manonood at mambabasa.” Sa termino ng mga nasyonalismo, “Kahit mamatay ang mga bayani, may mga bagong bayani na muling isisilang.”

7. Kaya Trishia, maaaring tama ka, negatibo nga ang nais ipahiwatig ng nabiyak o naputol na Heart Line (Drawing A. at B. h-h arrow a.) na sinuportahan pa ng unang Marriage Line (Drawing A. at B. 1-M arrow b.) sa kaliwa at kanan mong palad, na nagsasabing may tendency na sa iyong pag-aasawa, ikaw ay mabalo. 

8. Subalit tulad ng naipaliwanag na, hindi naman sa pagkawala ng iyong asawa natatapos ang kuwento at drama ng iyong buhay. Sa halip, kapag itinuloy ang kuwento, simula palang ‘yun ng susunod na senaryo sa pagpihit ng maningning na camera kung saan ayon sa ikalawang mas malinaw, tuwid at mas magandang Marriage Line (Drawing A. at B. 2-M arrow c.), sa ikalawang pag-aasawa, walang duda, habambuhay ka nang liligaya.  

DAPAT GAWIN

Kaya hindi ka dapat matakot na harapin ang hamon ng tadhana. Mawala man ang una mong asawa, okey lang ‘yun sapagkat kapag itinuloy ang istorya ng iyong buhay, hindi ito matatapos sa pagkawala ng iyong asawa. Bagkus, sa ikalawang pag-aasawa, sigurado na ang magaganap — may pangako ng mas maligaya at panghabambuhay na pagsasama, (Drawing A. at B. 2-M arrow c.), upang minsan pa, muli na namang mapatunayan ang katotohanan sa sinasabi ng dakilang pintor na si Leonardo Da Vinci, “There is no perfect gift without great suffering.”

Lalaking 2 beses mabibigo sa pag-ibig

ni Maestro Honorio Ong @Kapalaran ayon sa Palad | Enero 26, 2024

KATANUNGAN

1. Hindi pa ako nagkaka-girlfriend, kaya nais ko malaman kung sino sa dalawang babaeng nililigawan ko ang magiging nobya ko? ‘Yung una ay si Ms. Leo, isinilang noong August 19, 2002 habang ‘yung pangalawa ay si Ms. Libra, isinilang noong September 30, 2004. Sino sa kanila ang magiging first girlfriend ko? Ang birthday ko ay September 16, 1999. 

2. Maestro, ngayong taon kaya ako susuwertehin sa pag-ibig?

KASAGUTAN

1. Ayon sa iyong mga datos, Jeric, dalawang kabiguan sa pag-ibig ang nakatakda sa iyong harapan na inilarawan ng dalawang bilog na hugis o island sa kaliwa at kanan mong Heart Line (Drawing A. at B. h-h arrow a. at b.).

2. Ibig sabihin, ang unang kabiguan ay mild lang ang sakit na mararamdaman mo. Kung saan, masasabing mabibigo ka pero hindi naman gaano katindi o kalakas ang impact ng kalungkutan. At ito ang nakatakdang mangyari sa 2 dalagang nililigawan mo. Ano pa’t safe nating sabihing magiging girlfriend mo sila, lalo na siyang may birthday na September 30, 2004, subalit dahil hindi mo naman siya tunay na katugma o ka-compatible, pagkatapos ng mga ilang buwan,  magugulat ka dahil biglang magbabago ang damdamin niya para sa iyo at ang dating mainit na suyuan ay mauuwi rin sa wala. Puwede rin nating sabihing panandalian lang, pero matapos ang isang buwan, maglalaho at matutunaw na rin ang nabuong ugnayan.

3. Gayunman, pagkatapos ng mga ilang buwang kalungkutan, madali ka namang makaka-recover, pagkalipas ng ilang buwan si Ms. Leo naman na isinilang noong August 19, 2002 ang magiging girlfriend mo, pero tulad ng naranasan mo kay Ms. Libra hindi rin magtatagal ang inyong relasyon na inirepresenta ng ikalawang maliit na bilog o island sa Heart Line (Drawing A. at B. h-h arrow b.) sa kaliwa at kanan mong palad.

MGA DAPAT GAWIN

1. Matapos mong mabigo kina Ms. Libra at Ms. Leo, sino ang susunod mong magiging girlfriend? Malinaw ang sagot d’yan, ayon sa iyong mga datos, Jeric, matapos kang mabigo sa dalawang nabanggit na babae, magkaka-girlfriend ka ng isang babaeng may zodiac sign na Cancer, kung saan ang inyong relasyon ay medyo magtatagal, pero hindi rin siya ang iguguhit ng kapalaran sa kaisa-isa at magandang mong Marriage Line (Drawing A. at B. 1-M arrow c.).

2. Bagkus ang sakto at pangmatagalan mong magiging girlfriend hanggang sa tuluyang mapangasawa na inilarawan ng kaisa-isa mong Marriage Line (Drawing A. at B. 1-M arrow c.) ay ang babaeng may zodiac sign na Taurus, na nakatakdang mangyari at maganap sa taong 2027, sa edad mong 28 pataas. Kung saan sa panahong iyon, makakapag-asawa ka na at tulad ng nasabi na, sa piling ng babaeng may zodiac sign na Taurus, makakabuo kayo ng isang maunlad, maligaya at panghabambuhay na pamilya.