Dalagang pangarap makapag-abroad, dapat nang baguhin ang pirma

ni Maestro Honorio Ong @Kapalaran Ayon Sa Palad | Nov. 1, 2024

KATANUNGAN

1. Graduate na ako ng nursing. Kaya lang, kalahating taon na akong naghihintay sa inaasahan kong pag-a-abroad sa Europe, but until now hindi pa rin ako nakakaalis.

2. Kaya gusto kong ipabasa ang guhit ng aking palad, sulat kamay at signature para malaman ko kung may dapat pa ba akong baguhin upang mabago naman ang takbo ng aking buhay.

   
   

KASAGUTAN

1. Para makapag-abroad ka at suwertehin sa lahat ng aspeto ng buhay, dapat mong lakihan ang iyong lagda, higit lalo ang lower loop o bilog na bahagi ng letrang “y”. Sa ganyang paraan, kapag nilakihan mo na ang pagkakasulat ng iyong lagda at nilagyan mo na ng bilog at magandang buntot ang letrang “y”, tiyak ang magaganap, kasunod ng pagbabago sa iyong lagda, tuluy-tuloy mo na ring matutupad lahat ng iyong pangarap.

2. Dagdag dito, bukod sa birth date mong 3, ikaw din ay nagtataglay ng destiny number na 4 (4+3+1995=2002/ 20+02=22/ 2+2=4). Ibig sabihin, may mga biglaan at hindi inaasahang suwerte ang darating para sa iyo. Bago ka ring tuluyang magtagumpay at lumigaya, kailangan mo munang makaranas ng mga pagtitiis, paghihintay at pagsubok. Sa sandaling napagtiisan mo ‘yan at nanatili kang strong o matatag, walang duda, tuluy-tuloy ka nang mananaig at magtatagumpay anuman ang pangarapin at hangarin mo.

3. Samantala, kapansin-pansing may maliit na Travel Line (Drawing A. at B. t-t arrow a.) sa kaliwa at kanan mong palad, at dahil hindi masyadong malawak at hindi masyadong malinaw, tunay ngang dapat mong paghirapan ang pangingibang-bansa. Ibig sabihin, asahan mo na hindi magiging madali sa iyo ang pag-a-abroad, pero kung magsisikap ka, tiyak na may suwerteng darating para sa iyo. Sa bandang huli, ibibigay din ng langit ang iyong inaambisyon na makapag-abroad at matutupad mo na rin lahat ng mga maluluho mong pangarap sa buhay.

   
   

DAPAT GAWIN

1. Edralyn, kung susundin mo ang lahat ng suwestyon na binanggit sa itaas, paniguradong makakapag-abroad ka at ito ay nakatakdang mangyari at maganap sa susunod na taong 2025, sa edad mong 30 pataas.

Magkasintahan, sure na liligaya at habambuhay na magsasama

ni Maestro Honorio Ong @Kapalaran Ayon Sa Palad | Oct. 29, 2024

KATANUNGAN

1. May boyfriend ako ngayon. 32-anyos na siya, pero wala pa rin siyang balak mag-settle. 

2. Hindi ko naman masabi sa kanya ang tungkol sa pagpapakasal, dahil baka isipin niyang atat na atat ako sa kanya. Pero sa totoo lang, pakiramdam ko nasa tamang edad naman na ako para mag-settle, hindi n’yo man naitatanong pero 29-anyos na ako ngayon.

3. Maestro, siya na kaya ang lalaking nakatakda kong makasama habambuhay? Kung sakaling kami ang magkatuluyan, magiging maligaya at panghabambuhay na kaya ang aming relasyon?

KASAGUTAN

1. Bagamat dalawa ang namataang Marriage Line (Drawing A. at B. 1-M arrow a. at b.) sa kaliwa at kanan mong palad, kapansin-pansing maikli at mababaw ang pagkakaguhit ng una, (arrow a.), kung ikukumpara sa mas mahaba, malalim at malinaw na ikalawang Marriage Line, (arrow b.). Ibig sabihin, kung sino ang ikalawang magiging boyfriend mo, siya na rin ang iyong makakatuluyan.

2. Kaya kung ang kasalukuyan mong boyfriend ay ang ikalawa mong nobyo, tiyak ang magaganap, siya na nga ang nakatakda mong mapangasawa at makasama habambuhay.

3. Ang pag-aanalisang ang kasalukuyan mong boyfriend ang maaari mo na ngang makatuluyan o mapangasawa ay madali namang kinumpirma ng Astro-Numerology, kung siya ay isinilang sa petsang 2, 11, 20, 29, 7, 16, at 25, sa zodiac sign na Pisces, at ikaw naman ay isang Cancer na may birth date na 2, 11, 20, o kaya’y 29, walang mintis, siya na nga ang makakatuluyan at makakasama mo sa pagbuo ng isang simple pero maligaya at panghabambuhay na pagpapamilya.

MGA DAPAT GAWIN

1. Habang ayon sa iyong mga datos, Lara, kung ang kasalukuyan mong boyfriend ang ikalawa mong boyfriend ngayon, siya na nga ang iyong makakatuluyan at mapapangasawa. 

2. Ang pag-aasawang nabanggit ay maaaring maganap at mangyari sa susunod na taong 2026, sa buwan ng Mayo o Disyembre, sa edad mong 31 pataas.

Stress sa toxic workmates… Kelot na balk mag-resign, sa abroad uunlad

ni Maestro Honorio Ong @Kapalaran Ayon Sa Palad | Oct. 24, 2024

KATANUNGAN

1. Ang itatanong ko sa inyo ay tungkol sa Fate Line ko. Kapag ba huminto ang Fate Line, ibig sabihin ba nito ay mawawalan ako ng trabaho?

2. Nagtatrabaho ako ngayon sa isang telecommunication firm, pero dahil sa dami ng intriga, balak ko na sanang mag-resign at mag-apply na lamang sa abroad. ‘Yun iba ko kasing mga kasamahan na nag-resign ay nasa abroad na ngayon at naging maganda naman ang buhay nila roon. Pero dahil nga huminto ang Fate Line ko, kinakabahan tuloy ako na baka kapag nag-resign ako, wala na kong ibang mapasukan. 

3. Ano ba ang dapat kong gawin? Dapat bang manatili na lang ako rito sa kasalukuyan kong trabaho, o maglakas loob na mag-resign at mag-apply sa abroad? 

4. Ang isa ko pang katanungan ay may maganda bang Travel Line sa aking palad?

KASAGUTAN

1. Tama ka, Alvin, bigla ngang huminto ang Fate Line (Drawing A. at B. F-F arrow a.), at ‘di sinasadyang tumama sa Head Line (H-H arrow b.) sa kaliwa at kanan mong palad. Ito ay malinaw na tanda na dahil sa maling pagdedesisyon o pagpapasya mo, mawawalan ka ng career o hanapbuhay, ngunit ito ay pansamantala lamang, dahil ang humintong Fate Line (arrow a.) matapos mabangga ang Head Line (arrow b.) ay bahagya ring nawala. Gayunman, pagkatapos nito mawala ay muli rin naman itong lumitaw at gumuhit (arrow c.) sa tama at dati nitong tinatahak na direksyon – sa Bundok ng Pag-unlad (arrow d.), na nangangahulugan lamang na hindi na nga maiiwasang mawalan ka ng trabaho.

2. Kung saan, matapos ang isa, dalawa o tatlong taon, muli kang makakasumpong ng isang maunlad at asensadong trabaho, na maaaring maganap sa ibang bansa na kinumpirma ng pagsulpot ng malawak at mahaba-haba mong Travel Line (Drawing A. at B. t-t arrow e.) sa kaliwa at kanan mong palad. Ito ay malinaw na tanda na matapos kang mawalan ng trabaho, malaki ang tsansa na sa ibang bansa ka na makakapagtrabaho, at du’n ka na rin aasenso at tuluy-tuloy na uunlad. 

MGA DAPAT GAWIN

1. Kapag ang Fate Line (Drawing A. at B. F-F arrow a.) ay huminto matapos mabangga ang Head Line (Drawing A. at B. H-H arrow b.) sa kaliwa at kanang palad, ang ibig sabihin nito ay mawawalan ng trabaho o hanapbuhay ang nasabing indibidwal.     

2. Sa kaso mo, Alvin, ayon sa iyong mga datos, mapalad ka sapagkat matapos na huminto ang iyong Fate Line (arrow a.) at mabangga sa Head Line (arrow b.), ito ay muling nagpatuloy at nakarating sa Bundok ng Pag-unlad (arrow d.) na nangangahulugan lamang na pansamantala ka lang mawawalan ng trabaho. Subalit makalipas ang isa, dalawa hanggang tatlong taong pagkabakante, muli kang makakapagtrabaho sa ibang bansa (t-t arrow e.) at ang pagtatrabahong ito sa ibang bansa ang siya na ring magiging simula para lalo pang umunlad at umasenso ang buhay ng iyong pamilya, lalo na sa larangan ng materyal na bagay na nakatakdang mangyari sa taong 2025 o 2026.