Drayber, nakatulog... Polish bus bumagsak sa kanal, 12 patay, 47 sugatan

ni Justine Berganio @Overseas News | August 18, 2026

Photo: Makikita ang wreckage ng Polish tourist bus matapos ang aksidente at dalhin ito sa courtyard ng highway police. Ferenc Isza-AFP

Patay ang 12 Polish pilgrims habang 47 iba pa ang sugatan matapos mawalan ng kontrol ang sinasakyan nilang bus at bumagsak at tumaob sa sa Hungary nitong Linggo.

Naganap ang aksidente ala-1 ng madaling-araw sa M3 motorway, isang pangunahing highway na nag-uugnay sa Budapest at Nyíregyháza sa northeastern Hungary.

Ayon sa pulisya, posibleng nakatulog ang driver kaya lumihis ang bus sa kalsada bago tuluyang tumagilid. Kasunod nito, isinailalim sa kustodiya ang driver habang nagpapatuloy ang imbestigasyon.

May 59 katao sa bus, kabilang ang 57 pasahero at dalawang driver. 35 sa mga sakay ang unang nailigtas ng mga bumbero, habang isinagawa ang operasyon para mailabas ang mga naipit sa ilalim ng 24-toneladang sasakyan.

Sa tala ng Hungarian ambulance service, isa ang nagtamo ng life-threatening injuries, siyam ang malubhang nasugatan at 37 naman ang nagtamo ng minor injuries.

Galing Bosnia and Herzegovina ang bus at pauwi na sa Poland ang mga pilgrim mula sa Podkarpacie, ang pinakatimog na rehiyon ng bansa.

Nagpaabot ng pakikiramay ang Hungarian Prime Minister na si Péter Magyar sa mga pamilya ng nasawi at hiniling ang mabilis na paggaling ng mga sugatan.

Nagpahayag din ng pakikiramay si Polish Prime Minister Donald Tusk at nagpasya umanong magpadala ng espesyal na eroplano na may dalang mga opisyal ng foreign ministry at medical personnel upang tumulong sa mga apektadong Polish nationals.

Samantala, sinabi ng Polish Foreign Minister na si Radosław Sikorski na sinimulan na ng Hungarian police ang imbestigasyon sa driver kaugnay ng malagim na aksidente.

Stampede sa templo sa India, 7 patay, 19 sugatan

ni Justine Berganio @Overseas News | August 18, 2026

Photo: Ang stampede sa Ashok Dham Temple sa Bihar's Lakhisarai - India Today

Pito katao ang nasawi habang 19 ang sugatan matapos mauwi sa stampede ang kaguluhan sa Ashok Dham Temple sa Lakhisarai district, Bihar, India nitong Lunes.

Nagtipon ang malaking bilang ng mga deboto sa templo para sa pagdiriwang ng banal na buwan para sa mga Hindu nang kumalat ang ulat na bumagsak ang isang poste ng kuryente sa loob ng compound.

Ayon sa pulisya, pinaniniwalaang may mga taong nakuryente matapos bumagsak ang poste, dahilan upang mataranta ang mga deboto at magsimulang magsiksikan. Gayunman, patuloy pang bineberipika ng mga awtoridad ang eksaktong pinagmulan ng insidente.

Isinugod sa mga ospital ang mga biktima habang ipinakita sa mga ulat ang mga kamag-anak na nagtipon sa mga pagamutan habang inililikas ng mga rescuer ang mga nasugatan.

Sinabi ni Lakhisarai District Magistrate Shailendra Kumar na kontrolado na ang sitwasyon at patuloy ang imbestigasyon. Naglaan naman si Bihar Chief Minister Samrat Choudhary ng 400,000 rupees (P256K) na ayuda para sa pamilya ng bawat nasawi.

Matapos ang school shooting... Pa-isyu ng bagong gun permits sa Thailand, sinuspinde

ni Justine Berganio @Overseas News | August 14, 2026

Photo: Reuters

Ipinatigil muna ng pamahalaan ng Thailand ang pag-iisyu ng bagong gun permits kasunod ng pamamaril sa isang paaralan noong nakaraang linggo na ikinasawi ng walong katao at ng 14-anyos na suspek.

Inatasan ni Prime Minister Anutin Charnvirakul ang pagpapatupad ng mas mahigpit na gun control habang inihahanda ang mga bagong batas na magpapataw ng mas mabibigat na parusa sa mga lalabag.

Sa ilalim ng bagong hakbang, hindi muna tatanggapin ang mga bagong aplikasyon para sa pagbili o pagmamay-ari ng baril. Hindi rin ire-renew ang mga dating purchase permit, bagama’t hindi pa malinaw kung paano maaapektuhan ang kasalukuyang gun ownership permits.

Matagal nang ipinagbabawal sa Thailand ang pagdadala ng baril sa publiko. Simula 2023, kailangang manatili sa bahay o shooting range ang mga baril ng mga lisensiyadong may-ari.

May tinatayang 10.3 milyong baril na pagmamay-ari ng mga sibilyan sa bansa, dahilan upang kabilang ang Thailand sa mga bansang may pinakamataas na civilian gun ownership sa Southeast Asia.

Kaugnay ng insidente sa Debsirin Nonthaburi School sa labas ng Bangkok, sinabi ng pulisya na ginamit ng 14-anyos ang baril ng kanyang lolo bago naganap ang pamamaril sa paaralan. Nasawi ang kanyang dalawang lolo’t lola, limang school staff at isang 12-anyos na estudyante.

Sinisiyasat din ng mga awtoridad kung may naging epekto sa suspek ang marahas na content na napanood niya online at ang umano’y interes niya sa paggamit ng baril. Tinitingnan din ang stress sa pag-aaral at mga problema sa pamilya bilang posibleng salik sa insidente.

Isinusulong din ng gobyerno ang mga hakbang para mahikayat ang mga may-ari ng tinatayang apat na milyong unlicensed firearms na isuko ang kanilang mga armas.

Bukod dito, pinag-aaralan ang mas mahigpit na pagkontrol sa bala, habang iminungkahi naman ng education minister ang screening sa mga pasukan ng paaralan upang mapigilan ang pagdadala ng armas ng mga estudyante.

Nanawagan ang gun control advocates na isama sa proseso ng pagkuha ng permit ang mental health assessment at regular na pagsusuri sa mga lisensya ng gun owners.