Russia, umatake gamit ang 100 drones at 100 missiles — Zelenskyy

ni Eli San Miguel @World News  | August 27, 2024

Kramatorsk, Ukraine - NY Times / Circulated

Kinondena ni Ukrainian President Volodymyr Zelenskyy ang pag-atake ng Russia noong hatinggabi at madaling-araw bilang kasuklam-suklam. Iniulat niya na mahigit 100 missiles at nasa 100 "Shahed" drones ang ginamit.

Nagresulta ang pag-atake sa mga pagkamatay, maraming sugatan, at malaking pinsala sa imprastruktura ng Ukraine. Hindi bababa sa apat na tao ang nasawi.

Nagsimula ang pag-atake bandang hatinggabi at nagpatuloy kahit matapos sumikat ang araw, na tila pinakamalaking pag-atake ng Russia laban sa Ukraine sa loob ng ilang mga linggo.

Ayon kay Ukrainian Prime Minister Denys Shmyhal nitong Lunes, umatake ang mga puwersa ng Russia gamit ang mga drone, cruise missile, at hypersonic ballistic Kinzhal missiles sa 15 rehiyon ng Ukraine, na higit sa kalahati ng bansa.

14 patay sa pagbaha sa Indonesia

ni Eli San Miguel @Overseas News | August 26, 2024

Photo: PBS

Inanunsiyo ng pamahalaan ng Ternate, North Maluku sa Indonesia, ang emergency response para sa mga flash floods sa loob ng susunod na dalawang linggo.

Sinalanta ng pagbaha ang Barangay Rua sa Ternate Island Sub-district noong Linggo ng umaga matapos ang ilang araw ng malakas pag-ulan.

Noong Linggo ng gabi, 14 na tao ang kumpirmadong namatay at walo ang nawawala matapos na itigil ng mga otoridad ang mga paghahanap at pagsagip.

Nagtatrabaho ang apat na excavator upang linisin ang putik, mga bato, at debris mula sa pangunahing kalsada dahil sa patuloy na pag-ulan.

Nakatanggap ang mga residente ng matutuluyan sa ilang mga lugar, kabilang ang Kastela Village Cruise Vocational High School at Rua Village Elementary School.

Suspek sa pananaksak sa Germany, umamin na

ni Eli San Miguel @Overseas News | August 25, 2024

Photo: Reuters

Kinilala bilang 26-anyos na Syrian na lalaki ang suspek na inaresto para sa pananaksak sa Solingen, Germany, na pumatay ng tatlo at nakasugat ng walo.

Sumuko siya at inamin ang krimen, ayon sa mga pulis ng Duesseldorf.

Nangyari noong Biyernes ng gabi ang pag-atake na inangkin ng Islamic State group, sa isang pista para ipagdiwang ang 650-taong kasaysayan ng lungsod.

Ayon sa mga otoridad, konektado ang suspek sa isang tirahan para sa mga refugee sa Solingen na nasalakay noong Sabado.

Inilarawan ng Islamic State ang lalaking nagsagawa ng pag-atake bilang isang "Islamic State soldier" sa isang pahayag sa kanilang Telegram account noong Sabado.