Hamas, pumalag sa pagtatanggal ng armas

by Jenny Rose Albason @World News | February 10, 2026

Photo FIle: Hamas political leader Khaled Meshaal - Ilkha - Circulated

KInontra ng Hamas ang panawagan na sila ay tanggalan ng armas.

Ayon kay Hamas political leader Khaled Meshaal, kapag inalis ang kanilang mga armas ay magiging madali umano silang patayin ng Israel. Sinabi rin niya na handa ang Hamas na tumugon sa panawagan para sa isang total ceasefire, subalit iginiit na ito ay paulit-ulit na nilalabag ng Israel.

Hinihiling din ng grupo ang agarang muling pagsasaayos at rehabilitasyon ng Gaza matapos ang matinding pagkasira na dulot ng mga pag-atake ng Israel.

Magugunitang nagtulong-tulong ang ilang bansa, kabilang ang Qatar, Turkiye at Egypt, upang maisulong ang mapayapang pag-uusap sa pagitan ng Hamas at Israel.

Pinangunahan naman ng Estados Unidos ang negosasyon ng dalawang panig, na humantong sa kasunduan para sa pagpapalitan ng mga bihag at muling pagbubukas ng Rafah crossing.

Sunud-sunod na pagpapatalsik sa mga lider... Thailand, nagbukas uli ng halalan

by Jenny Rose Albason @Overseas News | February 10, 2026

Photo FIle: Thai-PBS

Muling nagbukas ang mga presinto sa Thailand nitong Linggo para sa isang krusyal na halalan, habang patuloy na sinusubukang bumangon ng bansa mula sa sunud-sunod na pagpapatalsik sa mga lider at pagbuwag sa mga partidong pulitikal sa loob lamang ng nakalipas na dalawang taon.

Kabilang sa mga pangunahing hamon na kakaharapin ng susunod na pamahalaan ang matamlay na ekonomiya, ang tensiyon sa border laban sa Cambodia, at ang lumalalang banta ng mga transnational cyberscam network sa Timog-Silangang Asya.

Sa loob ng huling dalawang taon, nasaksihan ng Thailand ang mabilis at madalas na pagpapalit ng liderato bunsod ng mga desisyon ng korte at pagbagsak ng mga koalisyon sa gobyerno.

Photo File: Lillian Suwanrumpha / AFP

Si Srettha Thavisin ng Pheu Thai Party ay naupo bilang punong ministro noong Agosto 2023 matapos ang halalan kung saan hinarang ng Senado ang panalo ng Move Forward Party. Gayunman, pinatalsik siya ng Constitutional Court noong Agosto 2024 dahil sa isyu ng etika kaugnay ng kanyang pag-appoint ng isang opisyal.

Pumalit sa kanya si Paetongtarn Shinawatra, bunsong anak ng dating punong ministro na si Thaksin Shinawatra at miyembro rin ng Pheu Thai Party. Naupo siya noong Agosto 2024 ngunit napatalsik din ng korte makalipas lamang ang ilang linggo.

Noong Setyembre 2024, si Anutin Charnvirakul ng Bhumjaithai Party ang naging kasalukuyang punong ministro matapos makuha ang suporta ng parlamento kasunod ng pagbuwag ng mga naunang alyansa. Siya ang ikatlong lider ng Thailand sa loob lamang ng dalawang taon.

Sa ilalim ng konstitusyong binuo ng militar noong 2017, nananatiling makapangyarihan ang mga hindi inihahalal na institusyon tulad ng Senado at ng Constitutional Court, na patuloy na may malaking impluwensiya sa pulitika ng bansa.

Sa kasalukuyang halalan, inaasahan ang panibagong matinding negosasyon sa pagitan ng mga partido, dahil malabo pa ring may makakuha ng ganap na mayorya sa gitna ng kontroladong sistemang pulitikal ng Thailand.

Pinagtitibay ng siyentipikong pagsusuri ang kaso para sa smoke-free products sa tobacco harm reduction

ni Chit Luna @News | February 4, 2026

Photo: File

Isang bagong toxicological review na inilathala ng US National Library of Medicine (NLM) ang nagbabala na maaaring hindi nabibigyan ng sapat na pansin sa kasalukuyang diskusyon tungkol sa smoke-free products (SFPs) ang isang mahalagang usaping pangkalusugan ng publiko.

Ang NLM ang pinakamalaking biomedical library sa mundo at nagsisilbing pambansang sanggunian para sa mga propesyonal sa kalusugan, mga siyentipiko, at publiko.

Ang pagsusuring pinamagatang, “The potential of smoke-free products to reduce harm for smokers: What does the toxicological evidence say?”, ay nagbigay-diin na napakaraming siyentipikong datos ang nagpapakitang ang e-cigarettes, heated tobacco products, at nicotine pouches ay nagdudulot ng mas mababang panganib kumpara sa tradisyunal na paninigarilyo.

Ang pag-aaral ay isinulat ni Reinhard Niessner ng Technical University of Munich at inilathala noong Agosto 2025, kasabay ng pagbabago ng mga polisiya sa tabako sa Europa.

Binigyang-diin ni Niessner na sa iba’t ibang bansa, napatunayang epektibo ang mga SFP gaya ng e-cigarettes, heated tobacco, at nicotine pouches sa pagtulong sa mga naninigarilyo na tuluyang tumigil sa sigarilyo.

Aniya, ang SFPs ay lumilikha lamang ng maliit na bahagi ng mga toxin na nalilikha sa pagsusunog ng tabako, kaya nag-aalok ito sa mga naninigarilyo ng praktikal na paraan upang lumipat sa mas ligtas na paggamit ng nikotina.

Ipinunto rin ni Niessner na sa United Kingdom, ang pagsusulong sa smoke-free products bilang mas ligtas na alternatibo ay nakatulong upang bumaba ang smoking rate ng mga adulto mula 20.3% noong 2010 tungo sa 11.9% noong 2023. Sa Sweden naman, naging sentral ang snus sa pagbaba ng antas ng paninigarilyo sa makasaysayang pinakamababang antas. Sa Estados Unidos, ang pagtaas ng paggamit ng e-cigarettes ng mga adulto ay naging mahalagang salik sa pagbawas ng smoking prevalence.

Batay sa kanyang kadalubhasaan bilang aerosol chemist, ipinaliwanag ni Niessner na hindi nikotina ang pangunahing sanhi ng mga sakit na may kaugnayan sa paninigarilyo; kundi ang mapanganib na halo ng mga kemikal na nalilikha kapag sinusunog ang tabako.

“When tobacco is ignited, cigarettes emit approximately 6,500 components, of which about 100 are of major toxicological concern,” Niessner said.

Binigyang-diin ni Niessner na iniiwasan ng smoke-free products ang combustion, kaya naaalis ang pinakanakakapinsalang reaksiyong kemikal. Idinagdag niya na ang e-cigarettes, heated tobacco, at oral nicotine products ay smoke-free, hindi nagsusunog ng tabako, at naglalabas ng mas mababang antas ng harmful and potentially harmful constituents (HPHCs) kumpara sa sigarilyo.

“It is the nature of science that the evidence will never be complete, but the totality of data should be considered when discussing the correct handling of SFPs. At present, these data suggest that SFPs can play a useful role in curbing the individual and societal risks associated with smoking,” Niessner said.

Binanggit din niya na ang e-cigarettes ay nagdudulot ng 80% hanggang 99.9% na pagbawas sa mga nakalalasong compound kumpara sa paninigarilyo, habang ang heated tobacco products naman ay nakakabawas ng higit sa 90% ng emissions ng mapanganib na carcinogens gaya ng tobacco-specific nitrosamines.

Samantala, ipinapakita ng pagsusuri na ang nicotine pouches ay may antas ng toxicants na kahalintulad ng makikita sa nicotine patches at chewing gum, na nagpapakita na kabilang ito sa mga pinakaligtas na nicotine products na kasalukuyang available.

Iginiit ni Niessner na ang hindi pagbibigay-diin sa nabawasang panganib ng mga produktong ito ay nagkakait sa mga adult smokers ng mga opsyon na maaaring makapagligtas ng buhay. “Raising concerns alone does not sufficiently inform the 20 million smokers about the comparative health risks,” he said.

Bagama’t hindi ganap na walang panganib ang smoke-free products dahil sa nakaaadik na katangian ng nikotina, binibigyang-diin ng pagsusuri na may ginagampanan silang “useful role in curbing individual and societal risks.”

Binibigyang-diin din ng review na kailangang protektahan ng mga regulator ang kabataan at mga hindi naninigarilyo, ngunit dapat ding tiyakin na ang mga adult smokers ay may karapatan sa malinaw na impormasyon at mas ligtas na mga alternatibo.