VP Sara, kumalas sa Lakas-CMD

ni Mylene Alfonso | May 20, 2023

Biglang kumalas si Vice President and Education Secretary Sara Duterte bilang miyembro ng Lakas-Christian Muslim Democrats (Lakas-CMD) party.

Ayon kay Duterte, "irrevocable" ang kanyang pagbibitiw na epektibo kahapon.

Sa kabila na hindi tinukoy ni Duterte ang dahilan ng kanyang pagbibitiw, sinabi niya na hindi nito hahayaang malason ng "political toxicity" o "execrable political powerplay" ang tiwalang ipinagkaloob sa kanya ng mga Filipino.

Nangyari ang pagbibitiw ni Duterte matapos na palitan ni Pampanga Rep. Aurelio

"Dong" Gonzales, Jr. bilang Senior Deputy Speaker si Pampanga Rep. Gloria Macapagal-Arroyo at ibinaba sa Deputy Speaker ang huli.

Kasunod nito, itinanggi ni Arroyo na nagbabalak siyang patalsikin sa puwesto si Speaker Martin Romualdez.

Dagdag pa ni Duterte: "I am here today because of the trust of the Filipino people in me to lead and serve them and the country.”

"I call on all leaders to focus on the work that must be done and leave a legacy of a strong and stable homeland," saad pa ng pangalawang pangulo.

Binigyan-diin ni Duterte na ang kahalagahan na pagsilbihan ang mga Filipino sa ilalim ng pamumuno ni Pangulong Ferdinand “Bongbong” Marcos, Jr.

"Trust that my word, my commitment will be immutable," pagtatapos pa niya

Fixed term sa AFP officials, pirmado na

ni Mylene Alfonso | May 19, 2023

Aprubado na ni Pangulong Ferdinand Marcos, Jr., ang batas na nag-aamiyenda kaugnay sa pagtatakda ng fixed term sa mga matataas na opisyal ng Armed Forces of the Philippines (AFP).

Ito ay makaraang lagdaan ni Marcos ang Republic Act No. 11939, o ang An Act Further Strengthening Professionalism and Promoting the Continuity of Policies and Modernization Initiatives in the Armed Forces of the Philippines, and Amending for this Purpose Republic Act No. 11709.

Una nang nilagdaan ni dating Pangulong Rodrigo Duterte, ang Republic Act No. 11709 noong Mayo ng nakaraang taon.

Batay sa inamyendahang Republic Act 11939, mananatili pa rin sa tatlong taon ang fixed term ng tour of duty ng AFP Chief of Staff.

Sa ilalim ng bagong batas, mababawasan ang fixed term ng mga major service commanders sa dalawang taon mula sa tatlong taon.

Kabilang dito ang Commanding General ng Philippine Army; Commanding General ng Philippine Air Force; Flag Officer in Command ng Philippine Navy; at Superintendent ng Philippine Military Academy ay may maximum tour of duty na dalawang magkasunod na taon.

Lahat ng nabanggit na posisyon ay maaaring i-terminate ng Pangulo ang termino nang mas maaga kung gugustuhin niya.

Ang naturang mga opisyal din ay hindi na magiging eligible para sa anumang posisyon

sa AFP, maliban kung ma-promote bilang Chief of Staff.

Habang itinakda naman sa 57-anyos mula sa edad na 56 ang compulsory retirement age ng mga may ranggong 2nd lieutenant o ensign hanggang Lt. General o Vice Admiral at pwede rin silang magrerito kung umabot na sa 30 taong active service anuman ang mauna sa dalawa.

Itinakda naman sa 60 taong gulang ang compulsory retirement age ang mga kinomisyon sa ilalim ng P.D. No. 1908 at maging ang mga itinalaga sa Corps of Professors.

Samantala, sa ilalim din ng bagong batas, itinaas sa limang taon ang dating tatlong taon ang maximum tenure ng mga nasa ranggong Brigadier General/Commodore habang sampung taon naman mula sa dating walong taon para sa mga may ranggong Colonel/Captain.

P7.68B cash ayuda, oks na — DBM

ni Mylene Alfonso | May 19, 2023

Inaprubahan ni Department of Budget and Management (DBM) Secretary Amenah Pangandaman noong Mayo 16, ang pagpapalabas ng Special Allotment Release Orders (SARO) na may kabuuang halaga na nasa P7,684,844,352 para pondohan ang implementasyon ng Targeted Cash Transfer (TCT) Program ng Department of Social Welfare and Development (DSWD).

Nasa 7,597,546 bilang ng mga benepisyaryo ang inaasahang makikinabang mula sa TCT.

“Hindi po natin pababayaan ang mga kababayan nating nangangailangan. Alinsunod sa direktiba ni Pangulong Ferdinand R. Marcos, Jr., tutulong tayong siguruhin na ang ating mga kababayan, lalo na 'yung mga vulnerable o 'yung mga kailangang mabigyan ng kalinga at suporta,” ayon kay Pangandaman.

Ang P7.68 bilyong pondo na inaprubahan ay sasakop sa natitirang dalawang buwan ng TCT.

Nagbibigay ang programa sa mga benepisyaryo ng P500 kada buwan, kasama na rito ang administrative cost at bank charges.