Bibili rin ng submarine.. 2 bagong barko, bantay sa WPS — Marcos

ni Mylene Alfonso | May 27, 2023

Gagamitin ni Pangulong Ferdinand Marcos, Jr., ang dalawang bagong barko ng Philippine Navy para magpatrolya sa West Philippine Sea (WPS).

Ani Marcos, ito ay para maipakita na patuloy na nagpapalakas ang Pilipinas sa kapabilidad sa usapin ng seguridad at depensa.

Gagamitin din aniya ang mga barko sa search and rescue operation pati na sa relief operations.

Sa pagdalo ng Pangulo sa ika-125 anibersaryo ng Philippine Navy, sinaksihan ng nito ang commissioning sa dalawang bagong Israeli made fast attack interdiction gun boat.

Ito ay ang BRP Gener Tinangag at BRP Domingo Deluana.

Nakikipagsabayan na aniya ang Pilipinas sa mga kapitbahay na bansa sa Asya sa pagpapalakas ng naval assets.

Samantala, balak din ni Marcos na bumili ng submarine para sa Philippine Navy.

Maraming bansa umano ang nag-aalok ng submarine sa Pilipinas.

"Marami tayong offer from different countries not only to acquire submarines but also to build them here in the Philippines. So, iyon ang tinitignan natin ngayon dahil malaking bagay 'yun if they are built here and we can actually build submarines here and provide those submarines to other countries and then that’s another source of jobs and of income and increase capability for our navy,” dagdag pa ng Pangulo.

Total deployment ban ng OFW sa Kuwait, tablado kay P-BBM

ni Mylene Alfonso | May 27, 2023

Kinontra ni Pangulong Ferdinand Marcos, Jr., na magpatupad ng total deployment ban ng overseas Filipino worker (OFW) sa Kuwait.

Ginawa ni Marcos ang pahayag kasunod ng panawagan ni Pangasinan 3rd District Rep. Rachel Arenas na itigil na ang pagpapadala sa mga bansa sa Middle East dahil sa pang-aabuso ng mga employer.

"I’m never very comfortable ‘yung nagba-ban na ganun dahil parang ang pag-ban sinasabi mo forever na 'yan, hindi na puwede," wika ni Marcos sa isang panayam matapos pangunahan ang ika-125 anibersaryo ng Philippine Navy sa Maynila.

"I don't know, 'yung sometimes overreaction 'yun na, basta't ban lang tayo ng ban, hindi naman tama," aniya pa.

Ayon sa Pangulo, magpapatuloy ang gobyerno ng Pilipinas sa pakikipagnegosasyon sa gobyerno ng Kuwait kaugnay sa pansamantalang suspensiyon nila sa pagbibigay ng visa sa mga Pilipino.

"Ang naging problema natin, tayo ang binan ng Kuwait, at ayaw na magpa-issue ng mga bagong visa. Hindi kami nagkakasundo dahil sinasabi nila may paglabag daw tayo sa kanilang mga rules, wala naman kaming nakikita, kaya’t 'yan ang naging situation,”

paliwanag ni Marcos.

"But you know I don’t want to burn any bridges… We have to react to the situation as it is and I think the proper reaction is to take the decision of the Kuwaiti government to no longer issue new visas," hirit ni Marcos.

P1.8B tax evasion case vs. 69 illegal cigarette traders — BIR

ni Mylene Alfonso / Jeff Tumbado | May 26, 2023

Naghain ng kasong kriminal ang Bureau of Internal Revenue (BIR) sa Department of Justice (DOJ) laban sa mga mangangalakal ng sigarilyo dahil sa ilegal na pagbebenta ng produkto na siyang dahilan ng pagkalugi ng gobyerno sa P1.8 bilyon buwis.

Ang mismong hepe ng ahensya na si Jun Lumagui, Jr., ang nagsampa ng nasa 69 reklamo sa DOJ kahapon kung saan sinabi nito na nagmula ito sa nangyaring sunud-sunod na pagsalakay ng mga awtoridad sa iba't ibang lugar sa bansa simula noong Enero 25, 2023.

“Ang sigarilyo kasi ay dapat niyan, bago kayo makapagbenta niyan dapat bayad ang excise tax n'yan, so dapat bayad ang buwis n'yan. May stamp na nakadikit d'yan sa mga sigarilyo, doon sa pakete ng sigarilyo," paliwanag ni Lumagui.

“Ngayon, itong mga nahuli natin noong nakaraang January 25 na raid ay ‘yung iba dito walang stamp, ‘yung iba dito ay peke 'yung stamps na kunwari na pinapalabas na bayad ang tax,” dagdag pa ng opisyal.

Napag-alaman kay Lumagui na ilan sa mga traders na kasama sa mga inireklamo ay nagbebenta ng mga pekeng sigarilyo.

Ang 69 kaso ay kinasasangkutan ng 15 revenue regions kung saan tinukoy ng opisyal na karamihan ay malalaking sindikato.

Ayon kay Lumagui, nasa pagitan ng P50 bilyon hanggang P100 bilyon ang nalulugi sa gobyerno kada taon dahil sa ilegal na pagbebenta ng sigarilyo sa bansa.