Death penalty sa taga-Customs, AFP at PNP na sangkot sa smuggling — Sen. Robin

ni Mylene Alfonso | May 19, 2023

Isinusulong ni Senador Robinhood "Robin" Padilla ang parusang kamatayan para sa mga taga-Bureau of Customs, Armed Forces of the Philippines at maging sa Philippine National Police na sangkot sa smuggling partikular ang agricultural smuggling, na aniya'y nakaapekto nang masama sa kabuhayan ng mga magsasakang Pilipino.

Sa pamamagitan ng kanyang Senate Bill 2214, nais ni Padilla na amyendahan ang Section 4 ng Republic Act 10845 o ang Anti-Agricultural Smuggling Act of 2016, kung saan papatawan ng parusang kamatayan ang naturang krimen.

Sa pagdinig ng Senate Committee on Agriculture, Food and Agrarian Reform nitong Huwebes, iginiit ni Padilla na masakit isipin na ang nakakapahamak sa mga Pilipino ay ang mga inatasang magpapatupad ng batas.

"Magsasaka ang mga nahihirapan dito, kabuhayan ng mahihirap na tao. Agricultural country tayo, sinasabing agricultural country tayo pero nag-i-import tayo, di ba nakakahiya yan? Law enforcement kayo. Pinamumugaran tayo ng smuggling. Sa tingin n'yo ba masaya ako na life imprisonment lang kayo?" aniya sa taga-BOC na dumalo sa pagdinig.

Binanggit pa ni Padilla na naghain na siya ng Senate Bill 2042 na papataw ng parusang kamatayan sa security personnel na sangkot sa murder, balak niyang maghain ng panukalang batas na ang mga taga-BOC na mapapatunayang involved sa smuggling ay "dapat kamatayan din" ang parusa.

Ipinunto ng senador na kung hindi malulutas ang nasabing problema, hindi matatapos ang problema ng pagkakaroon ng rebelde.

"Meron tayong pag-uusap sa kapayapaan para mawala ang rebelde. Paano naman mawawala ang rebelde kung pinapahirapan naman natin ang magsasaka? Para tayong naglolokohan sa bansa na ito. Kaya po sana mga mahal kong kababayan magtulung-tulong tayo sa usaping ito," dagdag pa niya.

Sangkot sa droga.. Mga pulis, balik-training

ni Mylene Alfonso | May 17, 2023

Inihahanda na ni PNP drug enforcement group Chief PBGen. Faro Olaguera ang pag-recall sa mga tauhan ng special operations unit ng kanilang hanay mula sa 17 police regional offices ng Philippine National Police.

Ito ay sa gitna ng isinasagawang talakayan ng liderato ng pambansang pulisya hinggil sa desisyon kung bubuwagin o hindi ang special operations unit ng PDEG.

Ayon kay PNP Spokesperson PCol. Jean Fajardo, nakatakdang ipa-recall ang nasa mahigit 700 tauhan ng nasabing hanay upang isailalim sa values formation at moral recovery

program.

Ito ay matapos na masangkot ang ilan sa mga miyembro nito sa maanomalyang operasyon ng 990 kilos biggest drug haul sa Tondo, Maynila noong nakaraang taon.

Kasunod na rin ito ng ipinag-utos ni PNP Chief PGen. Benjamin Acorda, Jr. na disarmahan ang nasa 40 tauhan ng PDEG at isailalim ang mga ito sa imbestigasyon nang dahil sa umano’y pagkakasangkot sa drug protection racket, pagnanakaw, at pagre-recycle ng mga droga.

Sa ngayon, isinasaayos na ang transportasyon ng naturang mga pulis patungo sa national headquarters ng PNP at gayundin ang kanilang pansamantalang tutuluyan habang sumasailalim sa naturang re-training.

Slogan na "It's more fun in the Philippines", babaguhin

ni Mylene Alfonso | May 17, 2023

Nakatakdang baguhin ng Department of Tourism ang campaign slogan ng Pilipinas.

Ayon kay Tourism Sec. Christina Frasco, inaprubahan na ni Pangulong Ferdinand Marcos, Jr. ang National Tourism Development Plan para sa taong 2023 hanggang 2028.

Sa kasalukuyan, ginagamit ng Pilipinas ang campaign slogan na “It’s more fun in the Philippines.”

Gayunman, hindi na muna tinukoy ni Frasco ang bagong campaign slogan.

Binanggit niya na target ng pamahalaan na gawing tourism powerhouse ang Pilipinas.