Quezon sports power palalakasin sa MPVA

ni MC/VA @Sports | June 26, 2024

Target ng Quezon Province na palakasin hindi lamang ang turismo bagkus ang grassroots sports program tungo sa pagiging sentro ng ‘sports power’ sa Southern Luzon. 

Ang minimithi na mapatibay ang isang koponan sa women’s volleyball na binuo at isasabak ng lalawigan sa ikalawang Season ng Maharlika Pilipinas Volleyball Association (MPVA) – na isang semi-propesyonal na home and away tournament.

Tinaguriang ‘The Quezon Tangerines’, ang team na pag-aari ni Quezon 4th District Rep. Mike Tan ay tiwalang malakas ayon kay Quezon Province Gov. Dr. Helen Tan at team manager Atty. Donn Ron Kapunan dahil binubuo ng NCAA three-peat champion St. Benilde College ang mga ito sa pangunguna nina Most Valuable Player Mycah Go at Jessa Dorog.

Head coach ang beteranong coach na si Jerry Yee. Alinsunod sa mga regulasyon sa torneo, idinagdag sa koponan ang 8 homegrown players at ang mga napili sa isinagawang tryouts ay sina Lenie Sapallo, Jasmine Dapal, Christine Joy Lubiano, Louann Latigay, at Jillian Nicole Quiambao mula sa Lucena City; Paola Alban ng Lucban, Kamille Josephine Amaka Tan ng Tayabas, at Geraldine Rae Palacio ng Pagbilao.

Kinilala ni Tan ang kahalagahan ng sports sa pagyabong at kaunlaran sa aspeto ng turismo at socio-economic, higit sa paghubog ng character ng mga bagong henerasyon ng Quezonians. 

“After basketball (Quezon Huskers), nagbuo kami ngayon ng team sa volleyball para sa MPVA. Ang volleyball ay mabilis na tumataas sa mga tuntunin ng katanyagan sa mga kabataan," sabi ni Tan. 

Kasama rin sa koponan sina Zamantha Nolasco, Chenae Basarte, Clydel Mae Catarig, Fiona Naomi Getigan, Weilyn Estoque, Corrine Allyson Apostol, Cristy Ondagan, Aya Densing, Kim Alison Estenzo, Zen Basilio, Fiona Inocentes, Marygrace Borromeo, Sofia Badion, Shekaina Lleses at Shahana Lleses. Ang MPVA ay magbubukas sa unang linggo ng Hulyo.

Lumutang sa Panagoc's Swimfest ang pinakamalulupit na tankers

ni MC @Sports | June 23, 2024

Photo: G. Villota

Patuloy na nagningning ang pinakamatikas na junior swimmers sa bansa kahit na lumitaw ang mga bagong swimming star sa podium nitong Sabado sa penultimate day ng Philippine Aquatics, Inc. (PAI) National Age Group Championships sa Teofilo Yldefonso Swimming Pool sa loob ng  Rizal Memorial Sports Center (RMSC) sa Malate, Maynila. Ang mga beteranong internationalists na sina Jamesrey Mishael Ajido at Micaela Jasmine Mojdeh ang nangibabaw sa kanilang kapwa miyembro ng National Team sa napagwagiang gold medal sa kani-kanilang mga klase, ngunit ang araw na iyon ay para rin kina Pia Severina Magat, Pia Ato, Nicola Diamante at mga nakababatang kapatid ni Jasmine na sina Behrouz Mohammad at Mikhael Jasper Mojdeh. 

Ang 15-anyos na si Ajido, na may hawak ng Asian junior record sa boys 12-14 100m butterfly (55.98), ay nagwagi sa ikaapat na gold medal matapos manguna sa boys 15 Class A 50-m backstroke (28.50), 100-m freestyle (53.97) at 100-m butterfly. Nanalo ng unang gold sa 200-m freestyle (2:00.42) sa opening noong Biyernes sa torneo na suportado ng PSC at POC. 

Tinalo sina Elijah Ebayan ng South Warriors (30.24) at John Jeremy Villanueva ng Pasig (30.42).  Sa butterfly, tinalo sina Rodevic Gonzalvo (1:00.12) at Elijah Ebayen (1:01.77). “Maganda na po 'yung pakiramdam ko, sana po, mag-heal na 'yung balikat ko before the National tryouts in August,” ayon sa multi-titled international swimmer. 

Tinaguriang 'The Water Beast', si Mojdeh, ang two-time World Junior Championship campaigner, ay nanguna sa girls' 17-over Class A 100-m breaststroke na nagtala ng 1:16.62 laban kina Dee Vianne Catedrilla ng Nautilus (1:20.73) at Gerice Oyaman ng FTW Royals (1:21.64).  Siya ang pumangalawa kay Camille Buico (29.01) sa 50-m butterfly (29.27).  

Knott, naka-ginto sa 100-M dash sa Canada

ni MC @Sports | June 19, 2024

Patuloy na umaasang buhay ang dugo ng Southeast Asian Games champ na si Kristina Knott lalo na sa pagsabak niya sa 2024 Paris Olympics makaraang masungkit ang gold medal sa women's 100-meter dash sa  2024 Harry Jerome Track Classic sa Burnaby, Canada.

Tinapos ni Knott ang takbo sa 11.64 segundo para manguna sa karera.

Tumapos namang silver si Canadian Victoria McIntyre nang maorasan ng 11.94s, habang si Zion Corrales Nelson ang naka-bronze medal sa oras na 11.94s.

Samantala sa  200m category, naging mabagal ang Filipina American nang malagay lamang si Knott sa third place finish sa timing na 23.42s.

Dinomina ng dalawang pambato ng Canada ang karera: sina Zoe Sharar (23.14s) at Jacqueline Madogo (23.20s) ang kapwa naka-gold at silver medals, ayon sa pagkakasunod.

Kailangan ni Knott na magkuwalipika sa Olympic standard na 22.57s sa 200m run para matiyak na magkatiket sa Paris.

Sa ilang araw na nalalapit bago ang Olympics, tinutumbok ni Knott na makatipon ng mas marami pang puntos para magkaroon ng slot sa women's 200m category.

Kilala si Knott sa pagwawasak ng records makaraang tumapos sa 11.2 seconds sa 100m dash sa ICTSI Philippine Athletics Championships 2024.

Naitatak niya ang kanyang tikas sa  Drake Blue Oval Showcase sa USA nang magtala ng national record na 11.27s noong Agosto 2020.