Bahay-bahay na libreng pagkain, aprub

ni Mary Gutierrez Almirañez | April 26, 2021

Pinaboran ng Philippine National Police (PNP) ang rekomendasyon na gawing bahay-bahay na lamang ang pamimigay ng mga donasyong pagkain katulad nu’ng nakasanayan, sa halip na lumabas papuntang community pantry, batay kay PNP Spokesman Brigadier General Ronaldo Olay.

Aniya, "Maganda rin ‘yung suggestion na ‘yan na ibahay-bahay na lang para hindi na maglabasan ang mga tao sa daan."

Sang-ayon din siya sa rekomendasyong mga kamag-anak na lamang ang pakukuhanin ng donasyon para hindi na ma-expose sa COVID-19 ang mga vulnerable na indibidwal, partikular na ang mga senior citizen, lalo pa’t nasa ilalim pa rin ng modified enhanced community quarantine (MECQ) ang NCR Plus.

Sabi pa niya, "Tama 'yan, nasa MECQ pa rin tayo at batay sa panuntunan ng IATF, ang mga 18 years old o mas bata, 65 years old o mas matanda, hindi muna lalabas sa tahanan."

Sa ngayon ay naglabas na ng guidelines ang Quezon City para sa mga nais mag-organisa ng community pantry na sinuportahan naman ni Department of the Interior and Local Government (DILG) Secretary Eduardo Año.

Ayon kay Año, “It's the organizer's responsibility to impose the minimum health standards. That's the primary reason why they have to coordinate with the LGU’s (local government units) so that the latter can provide assistance.”

Kaugnay ito sa pinaiimbestigahan ng DILG sa PNP, hinggil sa pagkamatay ng isang senior citizen na pumila sa community pantry ng aktres na si Angel Locsin.

“Since somebody died, the PNP has to conduct an investigation. We cannot ascertain yet who could be liable until the completion of the investigation,” sabi pa ni Año.

Community pantry, hinahanapan lang ng butas – VP Robredo

ni Mary Gutierrez Almirañez | April 26, 2021

Sinopla ni Vice- President Leni Robredo ang mga opisyal na nagsasabing komunista ang mga organizers ng community pantry at ang ilan na pilit itong hinahanapan ng butas, batay sa kanyang weekly radio program.

Aniya, “May lugar at panahon para sa lahat. Ngayon na maraming nagugutom, maraming nawalan ng hanapbuhay, malaki ‘yung pangangailangan, dapat nga, ‘pag may mga ganitong activities ay sinusuportahan. ‘Di ba dapat nga, gayahin na lang nila, kaysa nag-aaksaya sila ng panahon na maghanap ng diperensiya?”

Kaugnay ito sa napabalitang ‘red-tagging’ umano kay Maginhawa Community Pantry organizer Ana Patricia Non at sa nangyaring insidente sa pantry ng aktres na si Angel Locsin.

Dagdag pa ni VP Robredo, “Napaka-misplaced, napaka-irresponsible ‘yung ginagawa ng ibang mga opisyal ng pamahalaan, na sa pahanong gaya nito, eh, ‘yan ang iniisip nila… Instead na maging thankful na merong isang bata pa na nakaisip ng napakahusay na activity, hinahanapan pa ng diperensiya.”

Samantala, humingi naman ng paumanhin si VP Robredo sa nangyaring delay sa kanyang free medical teleconsultation program.

Paliwanag pa niya, "Pasensiya na po kung mayroong delays, kasi talagang grabe po iyong volume ng requests na pumapasok. Sinusubukan po nating matugunan as soon as possible, pero hirap po talaga."

Sa ngayon ay mayroong 600 volunteer doctors at 1,900 non-medical volunteers ang Bayanihan E-Konsulta na itinayo ng Office of the Vice-President. Maaaring ma-access ang libreng konsultasyon hinggil sa COVID-19 at iba pang sakit sa pamamagitan ng pakikipag-ugnayan sa kanilang Facebook page.

15,000 doses ng Sputnik V, iniurong ang pagdating sa 'Pinas

ni Mary Gutierrez Almirañez | April 26, 2021

Iniurong sa ika-28 ng Abril ang pagdating ng initial 15,000 doses ng Sputnik V COVID-19 vaccines na inaasahang darating sana kahapon, Abril 25, ayon sa National Task Force (NTF).

Paliwanag ng NTF, ang dahilan ng pagkaka-delay ay ‘logistic concerns’. Kaugnay nito, susundan naman iyon ng 480,000 doses sa ika-29 ng Abril, bilang karagdagang suplay mula sa Gamaleya Research Institute ng Russia.

Nauna nang sinabi ng Department of Health (DOH) na nangangailangan ang Sputnik V ng cold storage facility na hindi lalagpas sa 18 degree Celsius na temperatura.

Sa ngayon ay 3,525,600 doses ng bakuna na ang dumating sa bansa, kabilang ang 3 milyong doses ng Sinovac at 525,600 doses mula sa AstraZeneca.