5,000 OFWs at empleyado, babakunahan sa Labor Day

ni Mary Gutierrez Almirañez | April 28, 2021

Tatlong libong overseas Filipino workers (OFWs) at 2,000 minimum wage earners ang tinatarget mabakunahan kontra-COVID-19 ngayong darating na Labor Day, May 1, ayon kay Department of Labor and Employment (DOLE) Secretary Silvestre Bello III.

Aniya, "Humingi ako kay Galvez... binigyan naman ako ng 5,000 bakuna para sa pagbabakuna namin ng 3,000 OFWs at saka 2,000 manggagawa. Gumagawa na kami ngayon ng listahan."

Matatandaang nagsimula ang vaccination rollout sa ‘Pinas noong ika-1 ng Marso sa pangunguna ng mga frontline healthcare workers at pulis na sinundan ng mga senior citizens at may comorbidities.

Kabilang din sa mga naging prayoridad sa bakuna ang mga mayor at governor na nasa high risk areas.

Sa ngayon ay prayoridad na ring mabakunahan ang mga nasa A4 Priority Groups, kung saan kabilang ang mga frontline employees upang maabot ang herd immunity sa bansa.

Sputnik V ng Russia, naudlot uli ang pagdating sa ‘Pinas

ni Mary Gutierrez Almirañez | April 28, 2021

Naudlot uli ang pagdating sa ‘Pinas ng initial 15,000 doses ng Sputnik V COVID-19 vaccines na inaasahan sana ngayong araw, Abril 28.

Ayon sa Qatar Airlines, hindi nakalapag sa tamang oras sa Doha, Qatar ang eroplanong may dala ng mga bakuna na inaasahang manggagaling sa Moscow papuntang ‘Pinas.

Nauna nang naudlot ang pagdating nito nu’ng Linggo dahil sa ‘logistic concerns’.

Inaasahan namang darating bukas ang 480,000 doses ng Sputnik V, bilang bahagi ng 500,000 doses na iaaloka ng Russia Gamaleya Research Institute sa ‘Pinas.

Sa ngayon ay 3,525,600 doses ng bakuna na ang dumating sa bansa, kabilang ang 3 milyong doses ng Sinovac at 525,600 doses mula sa AstraZeneca.

59 days na bakasyon, pinalagan ng mga guro

ni Mary Gutierrez Almirañez | April 28, 2021

Pumalag ang Alliance of Concerned Teachers (ACT) Philippines sa Department of Education (DepEd), hinggil sa pagbubukas ng 2021-2022 school year ngayong darating na ika-23 ng Agosto sa pangunguna ni ACT-Philippines Secretary General Raymond Basilio.

Iginiit niyang 59 na araw lamang ang magiging bakasyon ng mga guro kung sakaling ipatutupad iyon, gayung ang nakasaad sa regulasyon ay dapat na 80 araw.

Aniya, "’Di pa nga tapos ang usapin ng overtime pay ng ating mga teachers ay may usapin na naman ngayon ng maka-cut short ang bakasyon ng ating mga teachers."

Batay pa sa ginawa nilang survey, halos 10% ng mga guro ang nagsabi na nagkakasakit sila dahil sa ‘burden’ na dala ng distance learning program at hindi maayos na delivery nito.

“And yet, hindi pa natin mabibigyan ng karampatang pahinga ang ating mga guro,” dagdag ni Basilio.

Ipinaliwanag niyang hindi madali ang online classes para sa kanila at may mga pagkakataon na sila na rin ang nag-aambagan para lamang makapag-provide ng modules dahil sa kakulangan ng pondo.

Nanawagan din siya kung sakaling sisimulan ang limited face-to-face classes ay siguraduhin muna ng DepEd ang maayos na pasilidad para sa kaligtasan ng mga estudyante laban sa banta ng COVID-19, sapagkat aniya palagi namang nakahanda ang mga guro para magserbisyo.

Dagdag pa niya, "Tayo po ay handang magbigay ng serbisyo at maglingkod sa panahon ng pandemya. Ang amin pong panawagan sa departamento ay kilalanin ang aming mga batayang karapatan at igalang ito, at in as much as possible, ibigay ang karampatang benepisyo."

Nilinaw niyang nu’ng nakaraang buwan pa sila nagpadala ng liham sa DepEd tungkol sa computation ng magiging bakasyon ng mga guro at kung paano iyon maipatutupad ngunit wala silang natanggap na tugon, kaya’t labis nilang ikinagulat ang inianunsiyo ng DepEd kahapon.

Sa ngayon ay pag-aaralan nila ang mga legal indication na dapat gawin para sa gagawing pag-apela sa DepEd.

Matatandaang nakatakda sanang matapos ang 2020-2021 school year sa ika-11 ng Hunyo, subalit naurong ito ng isa pang buwan dahil sa ‘learning gaps’.