Mass at religious gatherings, tuloy… 400 K nagka-Covid sa India sa isang araw

ni Mary Gutierrez Almirañez | May 1, 2021

Umabot na sa 401,993 ang nagpositibo sa COVID-19 sa India sa loob lamang ng 24 oras, kaya pumalo na sa mahigit 19.1 million ang mga naitalang kaso, ayon sa Health Ministry.

Kabilang sa mga itinuturong dahilan sa paglaganap ng virus sa India ay ang pagiging maluwag nila sa health protocols nu’ng nasa 10,000 pa lamang ang mga naitatalang kaso kada araw. Patuloy din ang mass at religious gatherings kaya naging mabilis ang hawahan.

Batay pa sa huling tala, tinatayang 3,523 ang karagdagang namatay, kaya umabot na sa 211,853 ang kabuuang bilang ng mga pumanaw.

Samantala, nag-alok naman ng tulong si Chinese President Xi Jinping kay Indian Prime Minister Narendra Modi upang masugpo ang lumalaganap na pandemya sa India.

Ayon kay Jinping, “On behalf of the Chinese government and the Chinese people, and in my own capacity, I would like to express my sincere condolences to the Indian government and people. China is willing to strengthen cooperation with India in the fight against the epidemic and provide support and assistance to India.”

Sa ngayon ay nangangailangan ang India ng pandemic aid, partikular na ang karagdagang suplay ng oxygen concentrators.

300 K balik-trabaho sa extended MECQ — DTI

ni Mary Gutierrez Almirañez | April 30, 2021

Tatlong-daang libong trabaho ang naghihintay sa mga empleyadong nawalan ng hanapbuhay sa muling pagbubukas ng ilang establisimyento sa extended modified enhanced community quarantine (MECQ) sa National Capital Region (NCR) at mga kalapit nitong lalawigan, batay kay Department of Trade (DTI) Secretary Ramon Lopez ngayong araw, Abril 30.

Kabilang ang mga resto, barbershop, salon at spa sa magbabalik-operasyon, kung saan may 10% dine-in capacity para sa mga restaurant at 30% capacity naman sa mga beauty salon, barbershop at spa.

Ayon pa kay Lopez, "Kahit papaano, makakadagdag ng trabaho... para maibalik man lang ‘yung trabaho nu’ng marami nating nagugutom na kababayan."

Ngayong araw din ay na-finalize na ng Inter-Agency Task Force (IATF) for the Management of Emerging Infectious Diseases ang mga lugar na isasailalim sa MECQ simula May 1 hanggang May 14, kabilang ang mga sumusunod:

• Abra

• Ifugao

• Santiago City, Quirino

• Metro Manila

• Bulacan

• Cavite

• Laguna

• Rizal

Samantala, iniakyat naman sa mas maluwag na quarantine classifications o general community quarantine (GCQ) hanggang sa katapusan ng Mayo ang mga sumusunod pang lugar:

• Apayao

• Baguio City

• Benguet

• Kalinga

• Mountain Province

• Cagayan

• Isabela

• Nueva Vizcaya

• Batangas

• Quezon

• Puerto Princesa City

• Tacloban City

• Iligan City

• Davao City

• Lanao del Sur

Sa ngayon ay umakyat na sa 1,028,738 ang kabuuang bilang ng COVID-19, kung saan 69,354 ang active cases, mula sa 8,276 na nagpositibo kahapon.

Nananatili namang Quezon City ang may pinakamataas na kaso sa buong NCR.

Pulis na nabakunahan ng Sinovac, patay

ni Mary Gutierrez Almirañez | April 30, 2021

Patay ang 50-anyos na police lieutenant mula sa Calabarzon ilang araw matapos itong mabakunahan ng unang dose ng Sinovac COVID-19 vaccine, kaya umakyat na sa 56 ang mga pulis na nasawi simula nu’ng lumaganap ang pandemya sa bansa.

Ayon sa Philippine National Police (PNP) Health Service, nabakunahan ang pulis na may comorbidity nu’ng ika-31 ng Marso, subalit kalauna’y nagpositibo sa COVID-19. Dinala naman ito sa isang ospital sa Batangas nu’ng Abril 15.

Nakatakda sana itong sumailalim sa hemoperfusion nitong ika-28 ng Abril ngunit wala silang nakitang available na ospital sa Metro Manila at Calabarzon dahil puno na ang mga pasilidad.

"However, he was put on the waiting list for the said procedure," giit pa ng PNP Health Service.

Ika-29 ng Abril nang ideklara ng attending physician ng pulis ang pagpanaw nito.

Gayunman, hindi binanggit kung may kinalaman ang Sinovac sa pagkamatay nito.

Sa kabuuang bilang ay 20,150 na ang mga naitalang kaso ng COVID-19 sa kapulisan, kung saan 1,722 ang active cases, mula sa 147 na huling nagpositibo. Samantala, tinatayang 18,372 naman ang mga nakarekober.