Moderna COVID-19 vaccine, aprub na sa 'Pinas

ni Mary Gutierrez Almirañez | May 5, 2021

Inaprubahan na ng Food and Drug Administration (FDA) ang emergency use authorization (EUA) para sa bakunang Moderna kontra COVID-19 ng US pharmaceutical firm, ayon sa kumpirmasyon ni FDA General Director Eric Domingo ngayong umaga, Mayo 5.

Nilinaw ni Domingo sa ginanap na Kapihan sa Manila Bay forum na inabot nang mahigit 9 na araw ang pag-e-evaluate nila sa mga isinumiteng dokumento ng Moderna bago naaprubahan ang EUA application nito.

Matatandaan namang sinabi ni Vaccine Czar Secretary Carlito Galvez Jr. na tinatayang 13 million doses ng Moderna ang binili ng pamahalaan at karagdagang 7 million doses nito ang binili ng private sectors na inaasahang ide-deliver sa bansa ngayong taon.

Nauna na ring nagpaabot ng liham si Senator Manny Paquiao kay US President Joseph Biden upang hilingin na pabilisin nito ang pagdating ng 20 million doses ng Moderna COVID-19 vaccines sa ‘Pinas.

Sa ngayon ay Sputnik V, AstraZeneca, Sinovac, Pfizer at Moderna pa lamang ang mga bakuna kontra COVID-19 na aprubado ng FDA ang EUA.

Galing ibang bansa, sa ika-8 day na iko-COVID-19 test

ni Mary Gutierrez Almirañez | May 5, 2021

Inirerekomenda ng Department of Health (DOH) sa Inter-Agency Task Force (IATF) na isagawa sa ika-7 o ika-8 araw ang pagkuha ng COVID-19 test sa mga biyaherong dumarating sa bansa, sa halip na kunin iyon sa ika-5 araw na unang ipinatupad, batay kay DOH Undersecretary Maria Rosario Vergeire.

Aniya, “That’s why we are revising again our protocol… We want to be sure that we get to identify all of these travelers coming in accurately so that we can isolate properly and we can break the chain of transmission, but this is still for approval in the IATF.”

Kaugnay ito sa naobserbahang hindi nasusunod o nakukumpletong mandatory 14-day quarantine ng isang biyahero pagkarating sa kanyang local government unit (LGU) na itinuturong dahilan kaya nagiging mabilis ang hawahan ng virus.

Paliwanag pa ni Vergeire, “We have seen that there are lapses in this kind of protocol that’s why we are revising so that we can have stricter border control especially now that there are different variants.”

Sa ngayon ay pumalo na sa 1,075 cases ang nakapasok na South African variant ng COVID-19 sa bansa. Tinatayang 948 naman ang nagpositibo sa United Kingdom variant, habang nananatili pa rin sa 2 ang Brazilian variant. Samantala, 157 na ang nagpositibo sa P.3 variant o ‘yung COVID-19 variant na na-develop sa ‘Pinas.

Patuloy pa rin namang pinagbabawalang makapasok sa bansa ang mga biyahero galing India upang maiwasan ang Indian variant.

Presyo ng bilihin, kuryente, etc., tumaas dahil sa pandemya

ni Mary Gutierrez Almirañez | May 5, 2021

Nanatili sa 4.5% ang naitalang inflation rate ng Philippine Statistics Authority (PSA) para sa buwan ng Abril, katulad sa naitalang datos nitong Marso, ayon kay PSA Chief and National Statistician Claire Dennis Mapa sa ginanap na virtual press conference ngayong Miyerkules, Mayo 5.

Aniya, “Ang magkakaibang paggalaw ng presyo sa mga commodity groups nitong Abril 2021 ay nagresulta sa magkaparehong antas ng inflation nitong Abril 2021 at Marso 2021.”

Matatandaang umakyat sa 4.7% ang inflation o ang pagtaas ng presyo ng mga produkto at serbisyo sa bansa noong Pebrero.

Kabilang sa naapektuhan ay ang presyo ng elektrisidad, transportasyon at mga bilihin, partikular ang baboy na tumaas sa 20.7% mula sa 17.1% kumpara noong Enero.

Sa ngayon ay patuloy pa ring nararamdaman ng mga konsumer ang nagtataasang presyo ng bilihin at bawat serbisyo sa bansa.

Gayunman, inaasahan pa rin ang dahan-dahang pagbaba nito sa kabila ng lumalaganap na pandemya.