DOH: Covid positive galing India, 5 lang hindi 6

ni Mary Gutierrez Almirañez | May 6, 2021

Kinlaro ng Department of Health (DOH) na 5 biyahero galing India lamang ang nagpositibo sa COVID-19, taliwas sa anim na unang iniulat.

Paglilinaw pa ng DOH, “Among these cases, five tested positive for COVID-19 through RT-PCR, while 137 of them tested negative… The test results of the seven remaining travelers are currently being verified.”

Batay sa tala ng Bureau of Quarantine, tinatayang 149 ang mga pasaherong dumating galing India simula nu’ng ika-1 ng Abril, bago pa man ipatupad ng ‘Pinas ang travel ban. Halos 129 sa kanila ay mga balikbayan at 20 naman ang foreigners.

Kabilang sa mga nagpositibo sa COVID-19 ang isang foreigner at 4 naman ang Pinoy. Kasalukuyan silang naka-isolate.

Dagdag pa ng DOH, “Samples from these positive cases are currently being determined if they are adequate for sequencing.”

Sa ngayon ay laganap na sa iba’t ibang bansa ang Indian variant ng COVID-19.

Matatandaang ipinatupad ng ‘Pinas ang travel ban sa mga biyahero galing India noong ika-29 ng Abril upang mapigilan ang pagpasok ng naturang variant sa bansa.

20 K Ivermectin galing India, hinarang sa NAIA

ni Mary Gutierrez Almirañez | May 6, 2021

Dalawampung libong tabletas ng Ivermectin at iba pang undeclared regulated drugs ang naharang sa Ninoy Aquino International Airport (NAIA) ngayong araw, May 6.

Ayon sa Bureau of Customs, nanggaling ang mga gamot sa New Delhi, India at idineklara sa shipment bilang mga food supplements, multivitamins at multi-mineral capsules.

Paliwanag naman ni Director Jesusa Joyce N. Cirunay ng Center for Drug Regulation and Research, ang mga pinapayagan lamang na Ivermectin sa bansa ay ‘yung galing sa importer na idi-distribute sa mga ospital na aprubado ang compassionate special permit (CSP).

Aniya, "In case Ivermectin has been granted authorization, a valid License to Operate (LTO) as Drug Importer and Emergency Use Authorization (EUA) or Certificate of Product Registration (CPR) shall be presented."

Sa ngayon ay 5 ospital na ang pinahihintulutan ng Food and Drug Administration (FDA) upang ipainom ang Ivermectin sa kanilang pasyenteng may COVID-19, buhat nu’ng maaprubahan ang isinumiteng CSP.

Gayunman, patuloy pa ring ipinagbabawal ang ilegal na pag-inom at pagdi-distribute ng Ivermectin sa bansa hangga’t hindi pa napatutunayan sa clinical trial test ang effectivity nito.

P22 M para sa clinical trials ng Ivermectin, kasado na

ni Mary Gutierrez Almirañez | May 6, 2021

Pinaghahandaan na ng Department of Science and Technology (DOST) ang clinical trials ng Ivermectin kontra COVID-19 sa darating na Hunyo at inaasahang magtatapos sa January 2022, kung saan nagkakahalaga ng P22 milyon ang nakalaang pondo na manggagaling sa Department of Health (DOH), ayon kay DOST Secretary Fortunato dela Peña.

Aniya pa, pangungunahan ni Dr. Aileen Wang ng UP-PGH Department of Medicine ang panel na magsasagawa ng trials sa loob ng 8 months.

Kabilang sa mga sasailalim sa clinical trials ay ang mahigit 1,200 asymptomatic at non-severe COVID-19 patients na mga Pinoy na may edad 18 pataas. Dagdag pa ni dela Peña, nakikipagtulungan din ang DOST kay Senator Richard Gordon at sa Philippine Red Cross (PRC) para sa mga pasilidad na pagdarausan ng trials.

Sa ngayon ay 5 ospital na ang pinahihintulutan upang ipainom ang Ivermectin sa pasyenteng may COVID-19, buhat nu’ng maaprubahan ng Food and Drug Administration (FDA) ang isinumite nilang compassionate special permit (CSP).

Kaugnay nito, inianunsiyo rin ni dela Peña ang timetable ng iba pang isinasagawang clinical trials sa mga hinihinalang gamot kontra COVID-19, kabilang ang mga sumusunod:

• tawa-tawa (11 months)

• lagundi (July 13, 2020 - May 12, 2021; 11 months)

• virgin coconut oil for hospitalized COVID-19 patients (June 1, 2020 to May 31, 2021; 12 months)

• VCO for suspect and probable COVID-19 cases (May 1, 2020 - June 31, 2021; 14 months or more)

• melatonin (September 7, 2020 - June 6, 2021; 9 months)

• convalescent plasma (July 1, 2020 - June 30, 2021; 12 months)