Remdesivir vs. COVID-19, wa' epek - WHO

ni Mary Gutierrez Almirañez | May 09, 2021

Maituturing na paglabag kung patuloy pa ring bibili ng Remdesivir ang Department of Health (DOH) sa kabila ng pagbabawal ng World Health Organization (WHO) na gamitin iyon kontra COVID-19 dahil sa lumabas na adverse events at limitadong bisa nito laban sa virus.

Ayon kay Representative Michael Defensor, “All further purchases of Remdesivir after the WHO came out with its adverse recommendation may be deemed as transactions highly detrimental to the government under the Anti-Graft and Corrupt Practices Act.”

Aniya, sa halip na bumili ng Remdesivir ay idagdag na lamang ang pondo nito sa pambili ng COVID-19 vaccines.

Paliwanag pa niya, “The problem with Remdesivir is its outrageous price, and yet, based on the findings of the WHO, the drug offers no significant relief to patients.”

Maaari ring masampahan ng criminal charges ang DOH officials o 10 taon na pagkakakulong kung patuloy pa rin silang bibili ng Remdesivir.

Voting registration sa 2022 election, walang extension

ni Mary Gutierrez Almirañez | May 09, 2021

Pinaaalalahanan ng Commission on Elections (Comelec) ang publiko na magparehistro na para sa 2022 national elections sapagkat 4 buwan na lamang bago ang deadline ng voting registration at hindi na ‘yun magkakaroon ng extension.

Ayon kay Comelec Spokesperson James Jimenez, “Unfortunately, mukhang hindi na siya puwedeng i-extend because the day after the close of registration [is] filing of COC (certificates of candidacy), which means we have to start preparing for election day documents na.”

Dagdag pa niya, ine-expect ng Comelec ang mahigit 7 milyong bagong rehistradong botante ngunit halos 2.8 milyon pa lamang ang mga nakapagparehistro mula nu’ng ika-30 ng Abril.

Iginiit niyang gumagawa naman sila ng mga hakbang para palawakin ang pagkakataon ng publiko na makapagparehistro, sa kabila ng ipinatutupad na health protocols laban sa COVID-19.

Sa ngayon ay nakikiusap ang Comelec na magparehistro na habang maaga pa, upang maiwasan ang hassle sa nalalapit na deadline.

Pinayuhan din ng Comelec ang magpaparehistro na sagutan muna ang downloadable application form sa irehistro.comelec.gov.ph bago pumunta sa tanggapan.

'Yung aprub daw ng FDA... VP Robredo, magpapabakuna na kontra COVID-19

ni Mary Gutierrez Almirañez | May 09, 2021

Nakahanda nang magpaturok kontra-COVID-19 si Vice-President Leni Robredo gamit ang bakunang may emergency use authorization (EUA) mula sa Food and Drug Administration (FDA), batay sa naging pahayag niya sa kanyang weekly radio program.

Aniya, “'Pag hindi natin tangkilikin ‘yung may EUA, parang walang saysay tuloy ang FDA. Kaya tayo may regulatory agencies kasi sila ang experts. Sila ang may capacity na mag-assess, may obligasyon na siguruhin ang makakapasok sa bansa ay dumaan sa rigorous na assessment."

Matatandaan namang nagpabakuna kamakailan si Pangulong Rodrigo Duterte gamit ang Sinopharm ng China, kahit na hindi pa iyon nagagawaran ng EUA.

Pagpaparinig pa ni VP Robredo, "Kung public official ako, nagpaturok ako, tapos ipinahayag ko in public, in a way ipino-promote mo ‘yung klase ng bakunang itinurok sa 'yo. Tapos, kung ang ipino-promote mo, walang EUA, mahirap ‘yun kasi parang mockery ‘yun ng existing regulatory agencies natin."

Sa ngayon, ang mga bakunang may EUA pa lamang ay ang Pfizer, AstraZeneca, Sputnik V, Sinovac, Johnson & Johnson, Bharat Biotech at Moderna.

Nilinaw pa ni VP Robredo na hinihintay na lamang niya ang kanyang ‘turn’ upang mabakunahan sa hanay ng mga may comorbidity.

"Alam ko naman na puwede na akong magpabakuna. Pero gusto ko lang siguruhin na wala akong maagawan na iba na dapat mas nauna sa 'kin," dagdag niya.