Kahit nagpositibo sa COVID-19... MEETING NI DUMAGUETE MAYOR REMOLLO KAY PDU30, TULOY

ni Mary Gutierrez Almirañez | May 24, 2021

Nagpositibo sa COVID-19 si Dumaguete City Mayor Felipe Antonio Remollo, batay sa Facebook post ng pamahalaang lungsod ngayong umaga, May 24.

Ayon sa alkalde, “I received a call from IPHO (Integrated Provincial Health Office) right after dinner that my test results are positive for the COVID-19 virus.”

Paliwanag pa niya, sumailalim siya sa RT-PCR test kahapon bilang requirement sa National Peace and Order Council meeting kasama si Pangulong Rodrigo Duterte, kung saan Dumaguete City ang magiging host.

Aniya, “May 23, 2021, I took the RT-PCR test as a requirement for attendance in the National Peace and Order Council to be presided over by President Rodrigo Duterte on May 24, 2021 and hosted by the City of Dumaguete.”

Gayunman, inilahad niya sa Facebook post na matutuloy pa rin ang meeting kahit siya ay nagpositibo.

Sabi pa niya, “The meeting with President Duterte will push through as scheduled and Dumaguete City will be ably represented in said event.”

Sa ngayon ay asymptomatic ang lagay ni Remollo at kasalukuyan siyang naka-self-isolate.

“Regular functions of Government will continue in my physical absence as I will still be working while in isolation. I will also be continually abreast of the daily affairs of the City,” giit pa niya.

3 days nag-party, 54 nagpositibo sa COVID-19 sa QC

ni Mary Gutierrez Almirañez | May 24, 2021

Limampu’t apat ang nagpositibo sa COVID-19 matapos dumalo sa 3-day improvised pool party at inuman session na ginanap sa covered court ng Barangay Nagkaisang Nayon, Quezon City, ayon kay Mayor Joy Belmonte.

Batay sa panayam sa alkalde ngayong umaga, naging super spreader ng virus ang naganap na event, kung saan 610 indibidwal ang dumalo.

Aniya, “Nagkaroon ng improvised pool party. Merong diskuhan, may sayawan, may inuman, may videoke. Kumpleto po at walang nagsusuot ng mask."

Ayon pa sa ulat, kaagad na pinuntahan ng contact tracer ang nasabing lugar upang mag-conduct ng contact tracing at interview sa naging close contacts ng isa na unang nagpositibo sa COVID-19. Doon lamang nila nalaman ang nangyaring 3-day event.

Sabi pa ni Belmonte, "Sa pagko-conduct nila ng interviews sa taumbayan, saka pa lang nila nalaman na nagkaroon pala ng 3-day fiesta celebration from May 9 to May 11.”

Sa ngayon ay mayroon pang 18 results ng RT-PCR swab test ang hinihintay na lumabas upang makumpirma ng City Epidemiology and Disease Surveillance Unit (CESU) ang kabuuang bilang ng mga nagpositibo.

Samantala, dinala naman sa HOPE facilities ang mga nagpositibo upang doon mag-quarantine at maobserbahan ang kondisyon.

Nilinaw pa ni Belmonte na pananagutin pa rin nila ang 54 na nagpositibo, kahit sila ay tinamaan ng virus. Pinadalhan na rin nila ng show cause order ang punong barangay, kung saan mismong fire truck pa ng barangay hall ang naglagay ng tubig sa improvised pool na ipinuwesto sa covered court.

“Lahat ng mga mapapatunayang lumabag sa ating guidelines at mga ordinansa lalo na ‘yung mga nagkukumpulan at nag-iinuman o nagka-karaoke ay iisyuhan ng ordinance violation receipt (OVR) at maaaring makasuhan sa ilalim ng RA 11332,” giit pa ni Belmonte.

Matatandaan namang kasalukuyan pa ring nasa ilalim ng heightened general community quarantine (GCQ) ang buong NCR Plus, kabilang ang Quezon City, kung saan limitado lamang sa 30% capacity ang outdoor activities.

DENR, tameme sa unti-unting pagkawala ng dolomite sand sa Manila Bay

ni Mary Gutierrez Almirañez | May 23, 2021

‘Di maipaliwanag ng Department of Environment and Natural Resources (DENR) ang nangyari sa dolomite sand na itinambak nila sa Manila Bay bilang bahagi ng rehabilitation program, batay sa pahayag ni DENR Undersecretary Jonas Leones.

Aniya, “Siguro, too early to say na nag-wash out na siya.” Kaugnay ito sa sinabi ng Oceana Philippines nu’ng Abril na nag-e-erode na ang dolomite sand. “From December 2020 to February 2021, this dolomite beach has eroded by at least 300 square meters. They are refilling it again and even extending the area,” sabi pa ni Oceana Vice-President Gloria Ramos.

Sagot naman ni Leones, normal lamang ang pag-erode ng buhangin sa mga dagat. Paliwanag pa niya, “We have put in place 'yung mga geotubes to ensure na 'di mawa-wash out 'yung mga dolomite.” Sa ngayon ay inaabangan na nila ang pagsapit ng tag-ulan upang malaman kung epektibo ang geotubes para maiwasan ang soil erosion.

“Gusto natin mag-rainy season na dahil para once and for all, we can see and evaluate kung talagang effective 'yung ating beach nourishment. Pinag-aralan namin ‘yan and we are confident na kahit bagyuhin 'yan, kahit ano'ng ulan man, nandiyan pa rin 'yung beach nourishment,” dagdag ni Leones.