300 K Moderna vaccine, darating sa June 21

ni Mary Gutierrez Almirañez | May 24, 2021

Inaasahang darating sa ika-21 ng Hunyo ang 300,000 doses ng Moderna COVID-19 vaccines, batay sa kumpirmasyon ni Philippine Ambassador to the United States Jose Manuel Romualdez ngayong araw, May 24.

Aniya, "June 21 is the target date of delivery for the first batch of Moderna vaccines. It will be 300,000 doses as a start. We will be getting more by July, August and September."

Matatandaang mahigit 20 million doses ng Moderna ang binili ng ‘Pinas sa America, kasama rito ang 7 million na binili ng private sectors. Ito ay nagtataglay ng 94% efficacy rate at puwede sa 18-anyos pataas.

Sa ngayon ay 8,279,050 doses ng COVID-19 vaccines na ang kabuuang bilang ng mga nai-deliver sa bansa, kabilang ang mga brand na Sinovac, AstraZeneca, Sputnik V at Pfizer.

Trial ng 2 magkaibang brands ng bakuna, start na

ni Mary Gutierrez Almirañez | May 24, 2021

Sisimulan na ng Department of Science and Technology (DOST) ang clinical trial hinggil sa paghahalo ng magkaibang brand ng COVID-19 vaccines, batay sa panayam kay DOST Secretary Fortunato dela Peña ngayong umaga, May 24.

Aniya, "Ito po ay magkaibang bakuna sa 2 doses. Meron po tayong 7 bakuna na approved with an EUA (emergency use authorization) pero ‘di po natin masiguro kung darating sa tamang petsa ‘yung kailangang second dose kaya mangangailangan tayo na magkaroon ng kombinasyon ng bakuna."

Nilinaw niyang magpo-focus ang trial sa Sinovac COVID-19 vaccines at ilang candidate na bakuna para i-combine rito.

Dagdag pa niya, "Gagamitin po 'yan para magkaroon tayo ng basis kung alin ang magandang ipag-mix. Puwede naman lahat ‘yan, kaya lang titingnan kung ano ang mas magandang kombinasyon."

Iginiit din ni Peña na tatagal nang mahigit 18 months ang pag-aaral ng DOST, kung saan 1,200 participants mula sa Manila, Rizal, Pasig, Makati, Pasay, Muntinlupa, Cebu at Davao ang nakahandang sumalang.

Sa ngayon ay hinihintay na lamang nila ang approval ng Food and Drug Administration (FDA) at Health Research Ethics Board (HREB) para masimulan ang trial sa Hunyo.

P12K bayad para mauna sa bakuna, buking

ni Mary Gutierrez Almirañez | May 24, 2021

Natukoy na ng pulisya ang hinihinalang nasa likod ng COVID-19 vaccine slot for sale, batay sa panayam kay Philippine National Police (PNP) Spokesperson Police Brigadier General Ronaldo Olay ngayong umaga, May 24.

Aniya, "May mga impormasyon na tayo at may mga tao na o personalities na na-identify through sa ating back tracking sa mga bagay na 'yan.”

Kaugnay ito sa napabalitang puwedeng makakuha ng slot o mauna sa pila para mabakunahan kontra COVID-19, kung magbabayad ng P8,000 hanggang P12,000 ang bawat indibidwal na magpapareserba ng slot.

Nabanggit din sa ulat na laganap ang ganoong sistema sa Mandaluyong at San Juan.

Sa ngayon ay tumanggi muna si Olay na ibigay ang ilang impormasyon tungkol sa tinutukoy na pasimuno, sapagkat aniya’y maaaring mabulilyaso ang ginagawa nilang hakbang sa patuloy na imbestigasyon.