Pills kontra COVID-19, pinag-aaralan

ni Mary Gutierrez Almirañez | May 28, 2021

Isinasagawa ng American multinational pharmaceutical company na Merck & Co Inc. ang Phase 3 trial ng Molnupiravir o pills kontra COVID-19.

Ayon sa ulat, 1,850 pasyente ang sumalang sa trial, kung saan ipinapainom sa mga ito ang 800 milligrams ng Molnupiravir dalawang beses kada araw sa loob ng 5 days. Inaasahan namang lalabas ang resulta ng trial sa September o October.

Sabi pa ni Merck's Chief Scientific Officer Daria Hazuda, “Viruses are basically little machines and they need certain components to replicate themselves."

Dagdag naman ng infectious diseases physician na si David Hirschwerk ng Northwell Health, "It's great that we have vaccine rollout that has been significant, but it certainly will not be taken by everybody in our population, and not everybody who takes the vaccine will have a full response to it.”

Sa ngayon ay patuloy ang pag-aaral ng mga eksperto sa lahat ng gamot at bakuna na maaaring pumuksa sa lumalaganap na COVID-19 sa buong mundo.

'Di matangkad, puwede nang pulis, bumbero atbp.

ni Mary Gutierrez Almirañez | May 28, 2021

Pinirmahan na ni Pangulong Rodrigo Duterte ang batas na magbababa sa minimum height requirements ng mga aplikanteng pulis sa Philippine National Police (PNP) at iba pang uniformed personnel.

Nakasaad sa Republic Act 11549, ang bagong minimum height requirements para sa lalaking aplikante ay 1.57 meters at sa babae nama’y 1.52 meters. Magiging epektibo ang bagong requirement makalipas ang 90 days na pagpirma sa batas.

Kabilang din sa uniformed personnel na nabanggit ay ang mga aplikante sa Bureau of Fire Protection (BFP), Bureau of Jail and Management and Penology (BJMP), at Bureau of Corrections (BuCor) o ang PNP, BFP, BJMP, and BuCor Height Equality Act.

Ang mga naging pagbabago ay mula sa dating height requirements na 1.62 meters para sa lalaking aplikante at 1.57 meters naman sa babaeng aplikante.

Sa ngayon ay mas marami na ang puwedeng makapag-apply dahil sa pinababang height requirements.

Maguindanao, hinati na sa 2 probinsiya

ni Mary Gutierrez Almirañez | May 28, 2021

Pinirmahan na ni Pangulong Rodrigo Duterte ang batas upang hatiin sa dalawang probinsiya ang Maguindanao sa ilalim ng House Bill No. 6314.

Ayon kay Maguindanao Representative Esmael ‘Toto’ Mangudadatu, “Finally, the President has already signed into law the bill. May Allah bless and prosper our sincerest aspirations for the welfare and development of Maguindanao.”

Giit naman ng chairman ng Senate Local Government Committee na si Senator Francis Tolentino, ang Maguindanao ay mahahati sa Maguindanao del Sur at Maguindanao del Norte, kung saan mapapabilang sa Maguindanao del Sur ang 24 towns, habang 12 municipalities naman ang magiging sakop ng Maguindanao del Norte.

Nakasaad dito ang mga sumusunod na lugar sa ilalim ng Maguindanao del Norte:

• Barira

• Buldon

• Datu Blah Sinsuat

• Kabuntalan

• Matanog

• Northern Kabuntalan

• Parang

• North Upi

• Sultan Kudarat

• Sultan Mastura

• Talitay

• Datu Odin Sinsuat

Samantala, sakop naman ng Maguindanao del Sur ang mga sumusunod na munisipalidad:

• Ampatuan

• Datu Abdullah Sangki

• Datu Anggal Midtimbang

• Datu Hoffer Ampatuan

• Datu Montawal

• Datu Paglas

• Datu Piang

• Datu Salibo

• Datu Saudi Ampatuan

• Datu Unsay

• Gen. Salipada K. Pendatun

• Guindulungan

• Mamasapano

• Mangudadatu

• Pagalungan

• Paglat

• Pandag

• Rajah Buayan

• Sharif Aguak

• Sharif Saydona Mustafa

• Sultan sa Barongis

• Talayan

• South Upi

• Buluan

Paliwanag pa ni Tolentino, layunin ng hatian na mapabilis ang serbisyo pagdating sa kalusugan, edukasyon at transportasyon.

Layunin din nito na mapalakas ang social at economic development at ma-promote ang political stability sa rehiyon.

Ang naturang bill ay ipinasa nina Maguindanao Representative Ronnie Sinsuat at Tarlac Representative Noel Villanueva. Si Maguindanao Representative Esmael ‘Toto’ Mangudadatu ang bill author.

Nasaksihan naman ng mga opisyal ng gabinete at ni Maguindanao Governor Bai Mariam Sangki-Mangudadatu ang pagpirma ni Pangulong Duterte sa House Bill No. 6314 sa Malacañang nitong Miyerkules.