Pinatay na pari sa Cebu na pinagbintangang terorista, iimbestigahan

ni Mary Gutierrez Almirañez | May 30, 2021

Iimbestigahan ng Philippine National Police (PNP) Cebu head na si Police Colonel Englebert Soriano ang pagpatay sa 80-anyos na dating pari at peace consultant ng National Democratic Front of the Philippines (NDFP) na si Fr. Rustico Tan sa Pilar, Barangay Poblacion Camotes Island, Cebu nitong Biyernes nang gabi.

Ayon kay Soriano, “It was really dark that time. As of now, we have yet to get eyewitnesses for the crime. But the Scene of the Crime Operatives (SOCO) processed the crime scene."

Batay sa ulat, nakahiga si Fr. Tan sa duyan na nasa gawing terrace ng bahay nito pasado alas-8 nang gabi nang pagbabarilin ng suspek sa katawan na naging sanhi ng pagkamatay nito.

Samantala, tumanggi naman ang mga kamag-anak ng biktima na ipa-autopsy ang labi nito upang kaagad mai-cremate.

"The family already asked the body to be buried. They are not interested anymore with whatever future findings of the police with respect to the possible outcome of the autopsy," sabi pa ni Soriano.

Gayunman, nilinaw ni Soriano na ipagpapatuloy pa rin nila ang imbestigasyon kahit walang autopsy.

"We will pursue this. We will get to the bottom of the investigation until we identify and file charges against the suspects," deklara niya.

Samantala, iniugnay naman ng Kilusang Mayo Uno (KMU) ang pagpatay kay Fr. Tan sa sinapit ng 74-anyos na NDFP peace consultant na si Reynaldo Bocala.

Ayon pa sa KMU, “Ang magkasunod na insidente ng pagpatay ay naganap dalawang linggo matapos isapubliko ng Anti-Terrorism Council ang listahan ng mga NDFP consultant na pinagbibintangan nitong mga terorista… Ang dalawang NDFP consultant na pinaslang ay parte ng negosasyon sa pagitan ng gobyerno ng Republika ng Pilipinas at ng rebolusyunaryong kilusan upang bigyang solusyon ang ugat ng armadong tunggalian.”

DA, umutang ng P14 bilyon sa World Bank

ni Mary Gutierrez Almirañez | May 30, 2021

Inaasahang maaaprubahan ang second additional financing (AF2) loan ng Department of Agriculture (DA) sa World Bank, kung saan nagkakahalagang $280 million o P14 billion ang ilalaang pondo para sa Philippine Rural Development Project (PRDP).

Ayon pa kay DA Secretary William Dar, "We look forward to more enable communities and expanded opportunities under the new normal with the approval of the AF2-EU."

Dagdag nito, “The loan will finance agriculture enterprise and rural infrastructure subprojects under the PRDP as part of the second tranche of the $450-million funding from the World Bank approved by the Investment Coordination Committee (ICC) in 2016.”

Ang proyektong PRDP ay aabutin ng 6 years, kung saan layunin nitong mapaunlad ang makabagong sistema sa agrikultura at pangingisda.

"We must continue to improve our services and processes as the world is ever-changing, and as we gradually move towards a new way of living. It is also our responsibility to keep up with the times and offer innovative solutions on how to provide for a modern, climate-smart, and market-oriented agri-fishery sector," sabi pa ni Dar.

Matatandaan namang mahigit 1,091 proyekto ang isinagawa ng DA mula sa 78 na probinsiya, kung saan halos 766,200 households ang nag-benefit nitong nakaraang Abril.

50 K pulis at bumbero, joint force sa bakuna kontra COVID-19

ni Mary Gutierrez Almirañez | May 30, 2021

Itatalaga ang mahigit 50,000 tauhan ng Philippine National Police (PNP) at Bureau of Fire Protection (BFP) sa malawakang rollout kontra COVID-19, ayon kay Department of the Interior and Local Government (DILG) Secretary Eduardo Año.

Aniya, misyon ng PNP at BFP na gawing ‘smooth’ ang vaccination rollout, partikular na sa ilalim ng A4 priority list o mga economic frontliners.

“Mass vaccination will be a big challenge to the government but with the help of our uniformed personnel, we aim to get as many of our countrymen and women vaccinated as efficiently and as soon as possible. This is the only way for us to put an end to this pandemic,” sabi pa ni Año.

Batay sa ulat, tinatayang 35,415 police personnel ang ia-assign sa delivery at transportation ng mga bakuna sa iba’t ibang lungsod. Ang 13,840 nama’y titiyaking nasusunod ang health protocols habang isinasagawa ang rollout.

Ang BFP nama’y magpapadala ng 2,390 personnel at 356 emergency medical service units upang i-deploy sa 1,150 warehouse at vaccination sites. Magpapadala rin sila ng 733 fire trucks at 59 ambulansiya upang gawing sasakyan o panghatid ng mga kakailanganin o ide-deliver na bakuna.

Sa ngayon ay 14,082 police medical workers na ang nabakunahan ng unang dose ng COVID-19, habang 8,416 naman ang nakakumpleto sa dalawang turok.

Samantala, 6,298 BFP personnel naman ang nabakunahan ng unang dose, habang 2,298 ang nakakumpleto sa dalawang turok.