Gimik para sa bakuna, gagawing uniform sa lahat ng siyudad

ni Mary Gutierrez Almirañez | May 31, 2021

Nagkasundo ang 17 Metro Manila mayors na panatilihin sa general community quarantine (GCQ) ang buong NCR Plus sa pagtatapos ng umiiral na heightened GCQ ngayong araw, May 31.

Ayon kay Metro Manila Council (MMC) Chairman at Parañaque Mayor Edwin Olivarez, "Ang recommendation ng Metro Manila Council ay GCQ pa rin po tayo pero may kaunting pagbubukas ng kaunting negosyo."

Paliwanag niya, "'Di po tayo puwede mag-relax. Alam po nating bumababa ang cases at utilization ng healthcare pero ‘di po tayo kailangang mag-relax para totally ma-contain ang COVID na ito."

Sa ngayon ay kani-kanyang pakulo na ang bawat local government units (LGU) upang mahikayat ang publiko na magpabakuna kontra COVID-19.

"Ang ibang LGU, nag-umpisa nang magpa-raffle para ma-encourage... Pinag-uusapan po para uniform ang policy," sabi pa ni Olivarez.

Kaugnay nito, inaasahan na ring magsisimula ngayong Hunyo ang vaccination rollout sa mahigit 30 million economic frontliners at essential workers na nasa ilalim ng A4 priority list.

Giit pa ni Department of Labor and Employment (DOLE) Assistant Secretary Ma. Teresita Cujueco, "Isinama na ang private workers who go out of their residences, who physically have to report to work, all government employees. Nandu’n din po ang informal sector and self-employed who go out of their residences."

Sa kabuuang bilang nama’y 5,120,023 indibidwal na ang mga nabakunahan kontra COVID-19. Kabilang dito ang 1,189,353 na fully vaccinated at ang 3,930,670 na nabakunahan ng unang dose.

Sotto, may isang kondisyon sa pagtakbong VP

ni Mary Gutierrez Almirañez | May 31, 2021

Bukas ang posibilidad sa pagtakbo bilang bise-presidente ni Senate President Tito Sotto sa parating na 2022 national elections, batay sa naging panayam sa kanya ngayong umaga, May 31.

Ayon kay Sotto, "I have to admit I’m thinking about it unlike other politicians who say they’re not running but on the day of registration, nangunguna… What will make me run? If we can upgrade the vice-president into something. For example if the vice-president will be handling the problem in illegal drugs and drug abuse."

Sinabi rin ni Sotto na si Senator Panfilo Lacson ang gusto niyang maging runningmate.

Aniya, “If I do consider it, the number 1 on my list would be Senator Lacson, I know his capabilities. I know what he can do for the country. If he runs for president, I will support him."

Samantala, kinumpirma naman ni Senator Imee Marcos na nakipagkita sila ng kapatid na si former Senator Bongbong Marcos kay Davao Mayor Sara Duterte-Carpio.

Paglilinaw naman ng senadora, pumunta silang magkapatid sa Davao City kahapon, May 30, upang batiin ito ng "advance happy birthday" at hindi para pag-usapan ang 2022 national elections.

Sabi pa ni Senator Imee, "Nah, walang pulitika. ‘Yung posisyon, ‘di ko alam kasi 'di pa kami nag-uusap... Pero alam ko, tatakbo siya.”

"BBM (Bongbong Marcos) and I went to greet her an early happy birthday yesterday. Atty. Mans (Manases Carpio), her hubby, treated us to lunch," giit niya.

Karagdagang 50,000 doses ng Sputnik V, dumating na

ni Mary Gutierrez Almirañez | May 31, 2021

Lumapag na sa Ninoy Aquino International Airport (NAIA) Terminal 3 ang karagdagang 50,000 doses ng Sputnik V COVID-19 vaccines mula sa Gamaleya Research Institute na inihatid ng Qatar Airways Flight QR928 nitong May 30 nang hating-gabi.

Ayon sa National Task Force (NTF) against COVID-19, ang dumating na bakuna ay kaagad dinala sa PharmaServ Warehouse sa Marikina City upang doon iimbak.

Sabi pa ng NTF sa kanilang Facebook post, “They will be deployed in centers of gravity or areas throughout the country that are experiencing surges in COVID-19 cases.”

Sa ngayon ay 80,000 doses ng Sputnik V na ang nai-deliver sa ‘Pinas. Kabilang dito ang tig-15,000 doses na naunang dumating noong May 1 at May 12.

Sinalubong naman nina Vaccine Czar Secretary Carlito Galvez, Jr. at Russian Ambassador to the Philippines Marat Pavlov ang pagdating ng bakuna sa NAIA.

"We have... decided to help the Filipino people and ... we are ready to deliver 20 million doses of Sputnik V according to the contracts that have been signed between the Russian Direct Investment Fund and the Government of the Philippines," giit pa ni Pavlov.

Kaugnay nito, inaasahan ding darating ang iba pang suplay ng bakuna, batay sa nakatakdang petsa ng mga sumusunod na brand:

• June 6: 1 million doses ng Sinovac

• June 7: 1.3 million doses ng Pfizer

• June 11: 900,000 doses ng Pfizer

• June 21: (walang specific doses) Moderna

• June (walang specific date at doses): AstraZeneca at Sputnik V

"Nakikita namin this coming June 7 and onward, mapapabilis tayo… Nakita natin ngayon we are very thankful na we have already reached 'yung 5 million doses administered. So meron tayong 5,120,023 vaccines that have already been administered," sabi pa ni Galvez.