Vice-Governor ng Davao de Oro, positibo sa COVID-19

ni Mary Gutierrez Almirañez | June 5, 2021

Nagpositibo sa COVID-19 si Davao de Oro Vice-Governor Maricar Zamora, batay sa lumabas na resulta ng kanyang RT-PCR test.

Aniya, "Since I am symptomatic, I would be confined to a hospital for medical attention.”

Hinihikayat naman niya ang mga naging close contact simula nu’ng May 22 na magpunta sa health office upang mapadali ang contact tracing at para makatiyak na hindi kakalat ang virus.

Dagdag niya, "This only underscores the seriousness of this virus. It’s a real threat – especially for our most vulnerable loved ones, friends, and neighbors."

Sa ngayon ay 381 ang aktibong kaso ng COVID-19 sa Davao de Oro. Sa kabuuang bilang nama’y 2,088 cases na ang mga naitala.

9 patay, 1 nawawala kay Bagyong Dante

ni Mary Gutierrez Almirañez | June 5, 2021

Siyam ang patay at 1 ang nawawala sa pag-alis ni Bagyong Dante sa Philippine Area of Responsibility (PAR), batay sa tala ng National Disaster Risk Reduction and Management Council (NDRRMC) ngayong araw, June 5.

Kabilang sa casualties ang mga nakatira sa MIMAROPA, Regions VI, VII, VIII, XI at XII.

Ayon pa sa ulat, halos 93,683 indibidwal na binubuo ng mahigit 22,839 pamilya ang naapektuhan ng bagyo. Kabilang dito ang 732 pamilya o 2,753 indibidwal na pansamantalang nagpapahupa ng baha sa 50 evacuation centers sa iba’t ibang rehiyon.

Dagdag pa ng NDRRMC, 81 kabahayan ang nasira sa Regions VI, VIII at XI, kung saan umabot sa P86,110,147.60 ang halaga ng mga napinsala. Nagkakahalaga naman ng P53,730,000 ang mga napinsalang imprastraktura sa MIMAROPA, Regions VII, XII at CARAGA.

Samantala, 691 rolling cargoes, 46 vessels at 2,085 pasahero naman ang na-stranded dahil sa nakanselang 40 sea trips sa CALABARZON, MIMAROPA, Regions V, VI, VIII at CARAGA nu’ng kasagsagan ng bagyo.

Nagpaabot naman ng P1,925,967.26 na tulong ang lokal na pamahalaan at Department of Social Welfare and Development (DSWD) sa mga pamilyang naapektuhan.

Sa ngayon ay papunta na ang Bagyong Dante sa Ryukyu Islands, Japan.

Ospital, napupuno na sa dami ng COVID cases… Davao City, MECQ hanggang June 20

ni Mary Gutierrez Almirañez | June 4, 2021

Ilalagay ang Davao City sa modified enhanced community quarantine (MECQ) o mas mahigpit na quarantine classifications simula bukas, June 5 hanggang 20, dahil sa biglaang pagtaas ng COVID-19 cases.

Ayon sa naunang anunsiyo ng City Government of Davao sa kanilang Facebook page, “The City Government of Davao has requested the IATF-RTF to declare a Modified Enhanced Community Quarantine (MECQ) from June 5 to 30, 2021 to allow a circuit breaker in the surge of patients inside hospitals.”

Base naman kay Presidential Spokesperson Harry Roque, hanggang June 20 lamang ipatutupad ang MECQ sa Davao City, samantalang ang General Santos City nama’y ilalagay sa general community quarantine (GCQ) o mas maluwag na quarantine classifications hanggang sa katapusan ng Hunyo.

Sa ngayon ay malapit nang maging full capacity ang Southern Philippines Medical Center na pinakamalaking ospital sa Davao, dahil sa biglaang pagdami ng isinusugod na COVID-19 patients.

Base pa sa huling datos ng Department of Health (DOH), ang Mindanao ay nakapagtala ng 11,391 active cases ng COVID-19.

“All public transportation shall be permitted to operate. We need to help our frontliners by making sure that we stay home except for work or business,” dagdag naman ng City Government of Davao sa kanilang Facebook post.