ni Nitz Miralles @Bida | Mar. 3, 2025
Tsinek namin ang price ng Land Cruiser at ang nakita namin, more than P5M. Ang Land Cruiser Prado naman ay more than P4M. Hindi kami bibili nito, wala kaming milyones, at kaya lang kami nag-check ay dahil ito ang bagong sasakyan ni Barbie Forteza. Hindi lang namin alam kung Prado o LC ang binili ng aktres.
Ang sabi, cash na binili ni Barbie ang bagong sasakyan, from her hard-earned money, pinagpaguran at pinagpuyatan at katas ng kasipagan. Mabibili na nito ang gusto at nakakapag-travel na siya dahil may bahay na for her parents.
Kaya naiinis ang mga solid fans ni Barbie sa solid fans ni David Licauco na ayaw sa aktres dahil hindi raw mayaman at hindi Chinese kaya hindi raw bagay sa aktor.
Anyway, madaragdagan pa ang ipon at pera ni Barbie dahil may dalawa silang big endorsements ni David. In fact, bukas, March 4, ang launching ng TVC ng fast food TVC nila at susunod ang launching ng TVC for a brand of toothpaste.
Dagdag din sa ipon niya ang talent fee sa gagawing bagong series with Kyline Alcantara.
Sabi nga ng fans nito, mas gugustuhin naman nila ang kagaya ni Barbie na galing sa pagsisikap ang pera kesa galing sa pamilya.
Sayang at walang nadalang music para sa sumikat na Budots campaign dance ni Sen. Bong Revilla, Jr. kaya hindi nito napagbigyan ang request ng media na ipakita niya ang sample ng new version ng kanyang dance movie.
Sabi kasi ng senador, may new version siya, updated at maganda sanang makita.
Nabanggit nito na ayaw sana niyang sumayaw sa video ng Budots at dito ay ipinakita ang dapat lang niyang gawin. Kaya lang, sinabihan siya ng anak na si Cavite 1st District Representative Jolo Revilla na sumayaw. Ipinakita pa raw ni Jolo kung paano ang dance moves na kanya namang ginawa.
So, si Jolo pala ang choreographer ng dance moves ni Bong na marami ang gumaya.
Napanood namin ang video nina Senators Robin Padilla, Bong Go, at Bato dela Rosa at tumatakbong senador na si Phillip Salvador na sumasayaw. Hindi natanong si Bong kung si Jolo pa rin ang kanyang choreographer.
Bukod sa Budots, may bagong campaign jingle si Bong na tinutugtog sa kanyang campaign sortie.
“May bago tayong jingle, magba-viral din ang Ito na si Bong Revilla.”
Ipinagmamalaki pala ni Bong na suportado ng kanyang pamilya ang kanyang kampanya at kapag may libre sa kanyang mga anak, sinasamahan siya.
Pati ang asawang si Lani Mercado, tumutulong din sa kampanya. Noon ngang inikot niya ang Laguna, nasa Batangas naman si Lani.
Samantala, nagbigay ng assurance si Bong na tutulungan nila ang movie industry. Gumagawa raw ng paraan ang gobyerno, “‘Wag kayong mag-alala, ‘yan ang purpose
naming mga senador, ang matulungan ang movie industry.
“‘Pag naibalik natin ang sigla ng pelikula, well and good,” wika ni Bong.
Ang tinukoy ni Bong na mga senador na magtutulung-tulong for the movie industry ay sina Senators Robin, Lito Lapid at Jinggoy Estrada.
Madaragdagan ang bilang nila kapag nanalo ang iba pang galing showbiz na tumatakbo ring senador.
PINATAWA ni Melai Cantiveros ang media sa mga hirit sa Pinoy Big Brother Collab Celebrity Edition (PBBCCE). Hindi ito nagpatalo sa inglesan ng mga hosts ng mediacon na sina VJ AI at Kaloy Tingcungco at co-hosts sa PBB. Ang kaibahan kay Melai, may halong comedy.
Binigyan pa nito ng idea si Big Brother sa naging sagot sa tanong kung papayag ba siyang muling pumasok sa Bahay ni Kuya.
Papayag daw siya basta kasama ang kanyang pamilya, hindi raw niya maiiwan ang mga anak at asawang si Jason Francisco, kaya kung papasok man siya, kasama ang kanyang pamilya.
“Para libre na rin ang food namin,” sabi nito na ikinatawa ng lahat.
May mga hirit pa ito na kapag airing na ang PBB, matutuwa at matatawa ang mga viewers. ‘Kaaliw din ang tips nito kina Gabbi Garcia at Mavy Legaspi na ihanda ang mga sarili dahil pati ang mga hosts ay maba-bash.
Hindi rin nito nakalimutang magpasalamat na kasama siya sa PBB Collab Celebrity Edition, “Thank you sa opportunity na makasama ako sa PBB at sa opportunity to work with Gabbi and Mavy.”
