4 tips para balansehin ang trabaho at personal na buhay

ni Justine Daguno - @Life and Style | November 25, 2021

Mahalaga ang balanse sa buhay dahil kung meron tayo nito, mas nagiging makabuluhan ang lahat. At isa sa mga bagay na mahirap timbangin, pero kailangan ay ang trabaho at personal nating buhay. ‘Ika nga, hindi maganda kapag sobra o kulang sa mga ‘to — kapag nasobrahan sa trabaho, sure na hindi lang katawan ang pagod, kundi ang mental na aspeto, at kapag masyado namang nag-focus sa personal na buhay, walang growth o minsan ay “nganga”, kaya para maging saktuhan, dapat balance lang. Kaya naman, narito ang ating tips para ma-balance ang work at life:

1. MAGKAROON NG PLANO. Sa lahat naman yata ng aspeto ng buhay, mahalagang magkaroon ng plano, dahil kung wala nito, malamang ay magkakalabo-labo tayo. Madaling mababalanse ang buhay kung nagagamit nang maayos ang oras, at nagagawa ito kapag organisado, kaya’t gumawa ng plano at sikaping sundin ito.

2.DAPAT MAY SAPAT NA TULOG. Mahirap mag-isip kapag kulang ang tulog. Lahat ay apektado at halos hindi rin tayo makapag-function nang maayos. Importanteng magkaroon ng sapat na tulog upang ang trabaho ay magagawa nang tama, at sa kabilang banda ay hindi rin naman napapabayaan ang sarili.

3.MAGPAHINGA. Sabi nga nila, ‘wag puro trabaho. Kailangang may oras din para sa ibang bagay o sa mga taong nakapaligid sa atin. Hindi lamang materyal na bagay ang kailangan ng bawat isa, mahalaga na may aruga o pag-aalaga sa sarili. Naimbento ang “rest day” dahil hindi robot ang tao na walang kapaguran. Tandaan, mas madaling mababalanse ang trabaho at personal na buhay ‘pag sapat ang pahinga.

4.BAWASAN ANG PAGGAMIT NG GADGET. Isa sa mga dahilan kung bakit nako-compromise ang panahon ay dahil sa matinding distraction na dulot ng paggamit ng gadgets. Wala namang masama sa paggamit nito, pero ang lahat ng sobra ay hindi maganda. ‘Wag hayaang mapunta sa gadget ang panahon na dapat inilalaan sa trabaho o sa sarili.

‘Ika nga, “work-life balance is the key” para maging happy. Bilang adult na may kani-kanyang responsibilidad, mahalagang sa kapaki-pakinabang na bagay natin nailalaan ang ating panahon nang sa gayun ay worth it ang pagod. Okay!

Nanay at tatay, read n’yo ‘to! Mga pag-iingat para sa mga bagets, alamin!

ni Justine Daguno - @Life and Style | November 20, 2021

Alert Level 2 na, puwede na lumabas at makapamasyal ang ating mga bagets!

Siyempre, sa halos dalawang taon ba naman nilang na-lockdown, hindi natin sila masisisi kung manabik sila na pumunta sa park o mag-mall. Pero wait, kahit pa mas pinaluwag na ang direktiba mula sa gobyerno, tandaan na may COVID pa rin sa paligid, hindi pa tayo totally safe!

Kaya naman sa mga magulang at iba pang guardians d’yan na pinagbibigyan silang makagala, narito ang ating safety tips para sa mga kids:

1.‘WAG KALIMUTAN ANG FACEMASK AT FACE SHIELD. Kailangang may facemask at face shield ang mga bata sa lahat ng pagkakataon, make sure lang na komportable sila sa mga ito. Bilang nakatatanda, dapat sundin din natin ang tamang pagsusuot nito.

Siguraduhing nakatakip ang facemask sa ilong at bibig, at hindi nakasuot ang face shield sa ulo kundi sa mukha.

2.MAG-DISINFECT SA LAHAT NG PAGKAKATAON. Likas na makukulit at curious sa lahat ng bagay ang mga bata, kaya hawak dito, hawak doon ang mga ito. Sa bawat pagkakataon na may hahawakan sila, siguraduhing i-spray-an ang kanilang mga kamay ng alcohol at hand sanitizer. Oks din kung ipaiintindi sa kanila ang kahalagahan nito para sa kanilang kaligtasan.

3.GAWIN ANG SOCIAL DISTANCING. Kapag nasa mall o pasyalan na, marami na ang nakakalimot sa social distancing o ‘yung bawal magdikit-dikit dahil sa katwirang nasa iisang bahay lang naman ang mga ito. Pero tandaan na ang prebilehiyo ay hindi inaabuso. Hindi porke may katwiran ay hindi na susunod.

4.PALAGING MAGPAALALA. ‘Wag mapapagod magpaalala sa mga bata, tayo ang nakatatanda at mas may isip, kaya dapat mahaba ang ating pasensiya, kaya kung hindi natin sila kayang disiplinahin at bigyang-paalala ay ‘wag na silang isama sa labas.

Malaking pagbabago sa buhay ng bawat isa ang pandemya na hanggang ngayon ay hindi pa rin natatapos. ‘Ika nga ay hindi naibabalik ang mga nakasanayan noon, pero kailangan nating gumawa ng paraan kahit paunti-unti upang makapagsimula muli.

Walang masama kung mamasyal tayo, pero dapat safety first!

Realtalk lang, besh! Iba’t ibang dahilan kaya ‘di ka yumayaman

ni Justine Daguno - @Life and Style | November 6, 2021

“Bakit hindi ako yumayaman?” Isa ka ba sa mga nakapagtanong na niyan sa iyong sarili? Tipong kahit ano’ng sikap at tiyaga, tila mailap ang pag-asenso? Naku, maraming dahilan ‘yan. Posibleng ito’y dahil madalas magkaroon ng maling desisyon, hindi balanse ang lifestyle, masyadong pressured sa mga tao sa paligid at iba pa. Well, para mabawasan ang mga iniisip mo sa buhay, narito ang ilan sa mga dahilan kung bakit hanggang ngayon ay hindi ka pa rin yumayaman:

1. WA’ PAKI SA UTANG. Ikaw ba ‘yung tipong utang here, utang there? Naku, maling desisyon ‘yan sa buhay. Ang pagkakaroon ng utang ay isa sa mga dahilan kung bakit hindi umuunlad ang tao. Hangga’t makakapagtiis o makakapagsakripisyo ay ‘wag humiram na pera, lalo na kung para lang naman sa luho o hindi importanteng bagay.

Domino-effect kasi ‘yan, ‘pag nangungutang ang tao ay hindi rin ito nakakapag-ipon. At kapag walang ipon, malabong umasenso.

2. HINDI INIISIP ANG BUKAS. Sa ayaw o sa gusto natin, magkakaiba ng pribilehiyo sa buhay ang bawat tao, kaya kung ikaw ‘yung tipo na “isang kahig, isang tuka”, mali naman yata na puro YOLO ka. ‘Ika nga, mabuhay nang naaayon sa financial status. Walang masama sa pag-e-enjoy, pero dapat ‘wag kalilimutang may bukas pa na kailangan din ma-survive. ‘Wag buhus-buhos biyaya, tapos bukas tunganga.

3. WALANG ‘MONEY PLAN’. Ang pagkakaroon ng plano sa pera ay malaking hamon na dapat nating napapagtagumpayan. Sobrang mali ‘yung once na matanggap ang suweldo ay iwi-withdraw lahat, tapos saka pa lang pag-iisipan kung saan mapupunta ang bawat sentimo. Mas oks siguro kung bago pumunta sa ATM machine, gumawa muna ng listahan, para man ito sa bayarin, pambayad-utang o pang-savings. Goods ito dahil naiiwasan ang pagkalito at pagkakaroon ng mga hindi inaasahang gastusin.

4. HINDI MARUNONG IHIWALAY ANG KAILANGAN SA GUSTO LANG. Isa pa sa mga pagkakamaling nagagawa ng marami sa atin ay ang kawalan ng kaalaman sa paghihiwalay sa mga gastusin para sa mga bagay na kailangan at kagustuhan lamang.

Ito’y simple lamang, palaging unahin ang mga bagay na kailangan at kapag may sumobra sa budget, puwede na bigyang-pansin ang mga bagay na gusto lang.

5. WALANG PAGSUNOD SA BUDGET. May mga tao na may listahan nga at alam ang kailangan sa gusto lamang, pero hindi naman kayang panindigan. Hindi kayang kontrolin ang sarili laban sa tukso, kaya ang ending ay nawawala na sa budget. Kapag gumagawa ng budget, dapat committed at disiplinado, ‘wag ito hayaang masira nang sa gayun ay mapunta sa bagay na kapaki-pakinabang ang perang pinaghirapan natin.

Marami sa atin ang hirap sa paghawak sa pera, hindi dahil sa hindi madaling kumita o walang oportunidad, kundi dahil mahirap kalaban ang sarili at ang mga bagay-bagay sa paligid.

Maraming maaaring makaapekto sa diskarte natin sa paghawak sa pera. Sa totoo lang, wala naman yata talagang sikreto sa pagyaman, pero kung magkakaroon ng disiplina, matututong magsakripisyo at higit sa lahat ay magiging wais, hindi malayong makamit ang pag-asenso at tagumpay.

Gets mo?