Naniniwala ka ba rito, besh? Paniniwala at pampasuwerte tuwing Chinese New Year

ni Justine Daguno - @Life and Style | January 23, 2022

Napakabilis ng panahon, tapos na ang pangatlong linggo ng January!

Bagama’t tapos na nga ang pagdiriwang ng pagsalubong sa Bagong Taon sa mga Pinoy at iba pang lahi, sa susunod na buwan pa lamang magdiriwang ng New Year ang mga Chinese sa buong mundo, kung saan tinatawag din itong Lunar New Year dahil nakabase ang petsa ng selebrasyon sa mga yugto ng buwan.

Ibang lahi man kung iisipin, malapit sa atin ang tradisyon ng mga Chinese, sapagkat malaking porsiyento ng ating populasyon ay Chi-Noy o Chinese-Pinoy ang lahi. Gayundin, kahit walang bahid ng pagka-Chinese ang ilan, marami sa ating mga kababayan ang sumusunod sa kanilang mga pamahiin sa paniniwalang tunay ang suwerte.

Kasabay ng pagdiriwang ng Lunar New Year, narito ang ilan sa mga diumano’y pampasuwerte at pag-iwas sa malas sa buong taon:

1. PAGPAPAGUPIT NG BUHOK. Marami ang naniniwala na dapat new year, new hair. Pero bago pumunta sa mga salon, wait muna. Sa kasabihan kasi ng mga Chinese, oks magpagupit ng buhok sa bisperas ng Chinese New Year bilang simbolo ng paghiwalay sa patapos na taon. Pero take note, huwag na huwag sa araw mismo ng Lunar New Year dahil pinaniniwalaan namang mapuputol ang pagpasok ng magandang kapalaran sa bagong taon.
   

2. PAGSA-SHAMPOO. Iwasan din ang pagsa-shampoo ng buhok sa mismong araw ng Lunar New Year dahil para sa mga Chinese, pampawala ito ng suwerte. Kumbaga, puwedeng maligo, pero ‘wag magbabad at tamang banlaw lang ng tubig ang gawin. Isa pang rason kung bakit may ganito silang tradisyon ay dahil pang-iwas din umano ito sa mga sakit, kung saan kapag nagkasakit sa Chinese New Year, mamalasin na raw nang buong taon.
   

3. PAGLILINIS NG BAHAY. Kailangang maglinis ng bahay sa bisperas nang matanggal ang lahat ng malas na dumating noong nakaraang taon. Dapat mag-focus sa paglilinis dahil kailangang matapos ang paglilinis bago maghating-gabi at hindi ito dapat abutan ng pagpasok ng Lunar New Year. Ipinagbabawal ang anumang uri ng paglilinis sa unang araw ng bagong taon — mula sa pagwawalis ng kalat, pagpupunas o pagpapagpag ng alikabok hanggang sa pagtatapon ng basura sapagkat katumbas ito ng pag-aalis o pagsasayang ng buwenas.
   

4. PAGHAHANDA NG SIOMAI. Hindi lang masarap o paborito ng marami sa atin ang siomai at iba pang uri ng dumplings, dahil para sa mga Chinese ay pampasuwerte ang mga ito. Ang Chinese word para sa dumplings ay “jiao zi”, tulad ito sa ancient word na ang ibig sabihin ay pagpapalit ng bago sa luma. Tulad din ang tradisyunal na dumplings sa hugis ng ginto na ginagamit na pera noong sinaunang panahon sa China. Kaya ang isang platong dumplings ay maihahalintulad sa isang tumpok na ginto. In short, tila pagma-manifest ng kaperahan ang ibig sabihin ng dumplings kapag naghanda o kumain ng dumplings sa Lunar New Year.

5. PAGHAHANDA NG TIKOY. Kapag sinabing Chinese New Year, aminin nating isa ang tikoy sa mga bagay na pumapasok sa ating isipan. Ito ay dahil nakasanayan na ang pagreregalo at paghahain nito bilang simbolo ng mahigpit na pagsasama ng pamilya, magkakaibigan at magkakatrabaho. Anila’y dumidikit o sa pamamagitan nito’y dirikit ang suwerte sa atin dahil sa malagkit na pagkaing ito.

6. PAG-IWAS SA MATALIM NA BAGAY. Sa mismong araw ng Lunar New Year, makabubuting iwasan ang paggamit ng matatalim na bagay, tulad ng gunting, kutsilyo at karayom. Sa paniniwala pa ng mga Chinese, kung may baby sa bahay, maaari umanong maging kasing liit ng butas ng karayom ang mga mata ng baby kapag gumamit ang mommy nito ng karayom sa anumang gawain. Samantala, kapag kutsilyo at gunting naman ang kanyang ginamit, mapuputol daw ang yaman ng pamilya.

Ilan lamang ang ating mga nabanggit sa napakahabang listahan ng pamahiin ng mga Chinese. Bagama’t walang scientific explanation, hindi maitatangging marami sa atin ang naniniwala sa mga ito – Chinese man o hindi. Para sa mga Pinoy, walang mawawala kung maniniwala dahil kung titingnan nga naman ang status ng buhay ng mga Chinese, mayaman o asensado sila.

Pero tandaan, totoo man o ideya lang ang “suwerte”, kailangan pa rin nating magbanat ng buto dahil kailanma’y wala sa “sabi-sabi”, kundi sa pagsisikap at tiyaga nakukuha ang tunay na ginhawa sa buhay. Ganern!

Para ‘di magpalipat-lipat ng kumpanya… 4 katangian na dapat taglay ng emepleyado

ni Justine Daguno - @Life and Style | January 17, 2022

Lipat dito, lipat doon.

Pabagu-bago ng trabaho dahil sa iba’t ibang dahilan. Mayroong tinanggal dahil may nakaaway o may kasalanan, meron din namang hindi nakuntento, nagsawa o sumuko na.

Pero ‘ika nga, hangga’t may kumpanyang tumatanggap o nangangailangan ng tao, apply lang nang apply!

Pero sa kabilang banda, kung may mga taong hindi nagtatagal sa trabaho, mayroon din namang mga empleyado na halos iginugol na ang buhay sa kumpanya. Sila ‘yung mga nabibigyan ng oportunidad na magtagal sa industriya.

Tunay na masuwerte ‘yung mga inaabot ng tatlo hanggang limang taon, lalo na ‘yung mga inaabot ng dekada. May sikreto nga ba sila? Well, narito ang ilan sa mga katangiang dapat taglay ng empleyado upang magtagal sa trabaho:

1. MAPAGKAKATIWALAAN. Bagama’t gasgas na ang linyahang, “Honesty is the best policy”, truly na mahalaga ang tiwala sa lahat ng pagkakataon. Kung walang tiwala sa ‘yo ang employer mo, kahit pa ano’ng pagmamalaki ang iyong gawin, mamimili ka pa rin sa dalawa: mapapalayas ka o ikaw ang lalayas sa kanila dahil ipararamdam nila sa ‘yo na wala silang tiwala sa kakayahan mo at pandagdag ka lang sa bilang ng mga empleyado.

2. MERONG INITIATIVE. Walang may gusto sa taong walang initiative o pagkukusa, aminin natin o hindi, nakakaumay ang mga taong kailangan pang sabihan ng mga dapat nitong gawin. ‘Ika nga, hindi eskuwelahan ang professional field, bagama’t may matututunan, kailangan ay may kaalaman na bago pa sumabak sa laban. ‘Ika nga, kung gusto mo umabot ng dekada, magbida-bida ka!

3. MAY PRINSIPYO. Bulok ang mga taong walang prinsipyo sa buhay. Sila ‘yung mga taong umaasa o naniniwala lang sa sinasabi ng iba. Walang sariling disposisyon at mahilig lang magpatangay sa kung ano ang nar’yan sa harap niya. Tandaan, prinsipyo ang madalas na basehan kung may kakayahan ba sa hinaharap o wala ang empleyado na magtagal sa kumpanya.

4. MAPAPAKINABANGAN. Aminin man natin o hindi, lahat naman ay oportunista, lalo na ang mga negosyante, kaya hindi nila pinatatagal ang mga bagay hindi nila napakikinabangan. Kumbaga, kapag wala namang kuwenta, dapat hindi na pinatatagal o idini-dispose na. Kaya kung gusto mong magtagal sa kung nasaan ka man ngayon, siguraduhing may function ka sa kumpanya.

Madalas na payo ng matatanda sa kabataan na sulitin ang pag-aaral at ‘wag magmadali dahil kapag nakapagtapos na sila’y habambuhay na ang pagkayod o pagtatrabaho. Truly naman, kaya kung pipiliin mong maging empleyado, dapat tanggap mo ang katotohanang malaking porsiyento ng buhay mo ang mapupunta sa pagtatrabaho. At dahil d’yan, siguraduhing pipili ka ng kumpanya na ramdam mong para sa ‘yo nang sa gayun ay magtatagal ka. Gets mo?

Paano masasabing worth it ang pagtatrabaho?

ni Justine Daguno - @Life and Style | January 4, 2022

Maiksi man o mahaba ang naging panahon sa kumpanya, masasabi nating naging parte pa rin ito ng ating buhay. Para sa iba, destiny nila ang trabaho na meron sila ngayon, pero may ilan namang wala lang choice kaya napadpad sa field kung saan siya naroon.

Sa panahon ng pandemya, masuwerte ang mga taong hindi nawalan ng oportunidad para maghanapbuhay, pero paano nga ba natin masasabing naging makabuluhan ang buhay sa trabaho?

1. MERONG IPON. Sure na worth it ang buhay natin sa trabaho kung may ipon tayo. Bagama’t marami rin naman ‘yung halos walang naipon o savings, pero ang maganda lang ay may naipundar o may napuntahan naman ang kanilang kinita, tulad ng nakabili ng appliances, nalinis ang utang ng mga magulang, napag-aral ang mga kapatid at iba pa.

2. MERONG BAHAY. Malaki man o maliit ang naipundar na bahay, oks lang ‘yan. Marami sa atin ang may pangarap na magkaroon ng sariling bahay. Hindi man ito ang basehan ng estado sa buhay, madalas basehan naman ito kung gaano kagaling humawak o dumiskarte sa buhay ang tao.

3. MERONG SASAKYAN. Tulad ng pagkakaroon ng sariling bahay, ang pagkakaroon ng sariling sasakyan ay pinapangarap din ng marami sa atin. Kaya marami sa atin ang todo-sikap nang sa gayun ay makabili ng 2-wheels, 4-wheels o family van man ‘yan.

4. MERONG MAGANDANG MEMORY. Minsan, kapag walang ipon, walang naipundar na bahay o sasakyan ay bumabawi na lang sa memories. Ito ‘yung mga experiences sa kumpanya hindi matutumbasan ng anumang halaga — experience na hindi man makita ng mga mata, alam naman natin sa pakiramdam ang tunay na halaga.

‘Ika nga nila, masuwerte ang mga taong pinalad makapag-retire sa entry level o unang trabaho nila, pero magkakaiba ng kapalaran ang bawat isa. Malaki o maliit man ang suweldo, madali man o mahirap, maganda man pakinggan o hindi, tandaan na anumang uri ng trabaho ay mahalaga, basta legal at marangal ito. Sikapin lamang na magiging makabuluhan ito nang sa gayun ay hindi sayang ang oras natin. Okay!