Bilyonaryong Mafia ang Mahal Ko (71)

ni Maria Angela Gonzales @Kuwentong Pag-Ibig | Ika-28 Araw ng Abril, 2024

KINABAHAN si Via sa sinabi ng kanyang ama. Kung hindi kasi siya nagkakamali, matinding galit ang nararamdaman nito ngayon. Nanlilisik ang mga mata nito na para bang gusto siyang sunugin ng buhay. 

“Ibig kong sabihin, sinaktan na niya ang kalooban mo, hindi ko na hahayaan na masaktan ka pa niya. Narito naman ako, tutulungan kita para buhayin ang apo ko,” mariin nitong sabi na para bang napaka-simple lang ng sinasabi nito. 

“Kahit gustuhin kong bumalik sa kanya, hindi ko magagawa. Paano kung sila na talaga ni Mariz?”

“Eh ‘di very good.”

Kumunot ang noo niya sa isinagot nito sa kanya. Para kasing may laman ang bawat katagang binibitawan nito. 

“Makakahanap ka pa naman ng ibang magmamahal sa iyo. Gaya na lamang ni Jake,” wika nito pagkaraan. 

“Hinding-hindi ko siya papatulan,” buong diing sabi niya. 

“Ang sakit naman nu’n,” wika ng isang tinig na galing sa kanyang likuran. 

Malalim na buntong hininga ang kanyang pinawalan nang makita niya si Jake, at agad na kumulo ang kanyang dugo. 

“Pero, mas masakit pa rin ito.”

Kumunot ang noo niya sa sinabi ni Jake. Para kasing masaya ito sa kung ano’ng nalaman. Lalong nagsalubong ang kilay ni Via nang ilabas nito ang cellphone at sabay play ng recording. 

“Sawa na ako kay Via kaya puwede mo na siyang makuha!”

Awtomatikong tumulo ang luha ni Via, dahil hindi siya maaaring magkamali kung sino ang nagsalita. Ito ay si Nhel na kanyang asawa. 

Nakagat niya ang kanyang pang ibabang labi dahil sa sakit na kanyang naramdaman.

Gusto na sana niyang humagulgol, ngunit nahihiya siya. Ayaw niyang ipakita kina Jake at sa kanyang ama ang sakit na kanyang nararamdaman. Pakiwari niya kasi ay nilalapirot ang kanyang puso. 

So, ibig sabihin, tama lang ang kanyang naging desisyon na hindi ipaalam kay Nhel ang katotohanan?

Itutuloy…

Magdasal ka na, sister (39)

ni Maria Angela Gonzales @Kuwentong Pag-Ibig | December 11, 2023

“Malas talaga kayong mga madre!” Galit na galit na sigaw ni David. 

Hindi na niya napigilan ang kanyang sarili, dahil iyon naman talaga ang kanyang nararamdaman. Galit at pagkapoot, sa mga nilalang na naging dahilan ng pagkamatay ng kanilang magulang. 

Mahal na mahal niya ang kanyang magulang, pero ‘di nagawa ng mga ito na magpaalam sa  kanya, dahil kinailangan ng mga magulang niyang magpunta sa orphanage na iyon para mag-donate ng pera at kung anu-ano’ng gamit. Kaya, walang ibang dapat sisihin kundi ang mga madre.

Nang tumira siya sa kanyang tiyahin at nakapagtapos ng kursong criminology. Hindi pa rin nawala ang galit sa kanyang puso. At mas lalo pa ngang nadagdagan iyon dahil ayaw niya ang nakagisnan niyang buhay. Masyadong relihiyoso ang kanyang tiyahin kaya sa tuwing bumibigkas siya ng dasal lalong nadadagdagan ang galit niya.

Para kay David, isang kalokohan ang pagdarasal. Nagdasal kasi siya noon na sana madugtungan pa ang buhay ng mga magulang nila ni Maritoni, pero walang nangyari.

Kaya, napagdesisyunan niyang mag-take ng criminology. Nais niyang maghiganti sa mga madre.

“Papatayin ko sila,” galit niyang sabi sa kanyang sarili. 

“Shhh…hmm.” wika rin niya sa sarili. 

“Seryoso ako, lahat ng mga madre ay papatulan ko dahil gusto ko silang maglaho sa mundong ito.” marahas na buntong hininga ang kanyang pinawalan. 

“Magandang hapon po,” wika ng isang madre. 

Nanlisik ang mga mata niya rito at sabay sabing, “magdasal ka na, sister.” 

Itutuloy…

Iba’t ibang diskarte para mapalago ang P1K

ni Justine Daguno - @Life and Style | August 8, 2022

Kung sa advertisement ng ice cream noon ay may famous line na, “Saan aabot ang P20 mo?” Ang tanong naman nating mga ka-BULGAR, “Kung may P1K ka sa wallet, ano’ng gagawin mo para mapalago ito?” Sa taas ng inflation ngayon, nagmimistulang barya na lang ang P1K na siyang pinakamataas na value sa Philippine money. True naman, madalas ay isang kisapmata na lang ‘yan. At kahit parang malabo, paano nga ba natin mapatatagal sa ating kaban ang isanlibo?

1. MAG-WORK PARA MADAGDAGAN PA. Makatotohanan naman talaga ang pagtatrabaho para ang madagdagan ang ating pera. Hindi man agad-agad, pero at least may hinihintay tayo tuwing kada dalawang linggo o dalawang beses sa isang buwan.

2. MAG-ISIP NG MGA BAGAY NA PUWEDENG I-RESELL. Tumingin sa Shopee, Lazada o iba pang online shopping outlet ng mga interesting items na puwedeng i-resell sa Facebook group ng subdivision o barangay n’yo. Mula sa ganu’n ay puwede nang makapagsimula ng maliit pero masasabing progressive na business.

3. MAGTINDA NG ULAM O PAGKAIN. Kung marunong magluto, try mo magbenta ng ulam sa online platforms. Pero kung nasa mataong lugar naman kayo ay oks kung meryenda ang ibebenta mo sa labas ng bahay n’yo.

4. MAG-OFFER NG SERBISYO. Halimbawa, may motor ka, ‘yung kalahati ng P1K ay ipang-gas mo, tapos mag-offer ng hatid/sundo sa mga kakilala, pero with a fee. Kung marunong ka namang magkulay o mag-hair service, pasok na sa banga ‘yung P1K para makabili ng pangkulay o matalas na gunting para gamitin sa service.

5. MAMUHUNAN SA MGA EARN & PLAY GAMES. Pero hindi ito advisable kung P1K na lang ang iyong last money. Okay lang kung mamaya o bukas ay may darating na ring pera sa ‘yo dahil ang mga earn & play games ay maihahalintulad na rin sa sugal. Tandaan, ‘wag isugal ang huling pera, ‘wag maniwala sa suwerte.

Isa sa mga oks na abilidad nating mga Pinoy ay ang pagiging likas na madiskarte sa buhay. Tipong akala mo ay wala nang pag-asa, pero magugulat ka kasi there’s more in life pa pala na puwedeng magawa. Sa panahon ngayon na lahat na lang ng kailangan natin ay nagtataas-presyo at halos dumaan na lang sa iyong mga kamay ‘yung kinita mo sa dalawang linggo na pagtatrabaho, kailangan na talaga natin pagalawin ang baso. Kumilos at dumiskarte dahil ‘ika nga’y wala namang imposible.

Gets mo?