4 paraan para i-promote ang online business

ni Justine Daguno - @Life and Style | June 13, 2021

Lumabas ang pagiging madiskarte nating mga Pinoy dahil sa pandemya, masuwerte ang mga nanatili sa kani-kanilang regular na trabaho, pero dahil maraming nagsaradong negosyo, nauso nang sobra ngayon ang mga online business. May ilan na ginawang negosyo ang kanilang mga hilig sa buhay tulad ng baking, pagluluto, pagdo-drawing at marami pang iba. Kaya naman, para mas ma-promote ang inyong business online, narito ang ilan sa mga puwede nating gawin:

1. PALAKASIN ANG SOCIAL MEDIA. Halos lahat tayo ay mayroong social media account at marami sa atin ang malaki ang oras na naigugugol dito. Kung ikaw ay may business, siguraduhing active ang lahat ng iyong social media accounts nang sa gayun ay madaling makikita o makikilala ng mga tao ang iyong produkto kahit nasa malayong lugar man sila.

2. SUBUKANG MAG-BLOG. Maaari ring gumamit ng blogging sa libreng pagpo-promote ng negosyo online. Kilalaning mabuti ang iyong produkto nang sa gayun ay madali itong maipakikilala sa publiko.

3. MAG-JOIN SA MGA ONLINE COMMUNITY. Bukod sa pagpo-post gamit ang sariling account, oks din kung sasali sa mga online community, tulad ng mga barter, buy & sell at iba pa na may kaugnayan dito. Sa ganitong community, marami ang mga nakare-relate at talagang susuporta sa inyong negosyo.

4. GAMITIN ANG KONEKSIYON. Iba pa rin ang nagagawa ng ‘support system’ sa negosyo. Hangga’t kaya humingi ng tulong sa mga kaibigan o kakilala, gawin ito para mas makahikayat ng mas maraming customer.

Dahil parte na ng araw-araw ang teknolohiya, ‘ika nga ay ‘i-embrace’ na lang ito. Lahat ng diskarte ngayon ay mahalaga at malaking bagay ito para maka-survive sa pang-araw-araw na pangangailangan. Good luck!

Wala pa man, pero dapat palaging ready… Dapat gawin habang papalapit ang tag-ulan

ni Justine Daguno - @Life and Style | June 03, 2021

Kasunod ng napakainit na panahon, halos maya’t maya na rin ang pagdating ng ulan ngayon. Tipong kung walang patayan ang electric fan at aircon noon, halos hindi na ito bubuksan ngayon dahil malamig na. Well, bagama’t wala pang opisyal na ‘rainy season’ na nga, dapat palagi pa rin tayong ready. Kaya naman, narito ang ilan sa mga tips natin:

1. PALAGING MAGDALA NG PAYONG AT JACKET. Hindi tayo water-proof kaya ugaliing magdala ng mga gamit panangga tulad ng payong, jacket, kapote at iba pa. Magdala ng mga ito umulan man o hindi dahil hindi natin alam kung kailan ito bubugso. Huwag hayaang mabasa ang sarili, bawal magkasakit sa panahon ‘to.

2. KUMAIN NG MASUSUSTANSIYA AT UMINOM NG VITAMINS. ‘Ika nga, “Prevention is better than cure.” Huwag hayaang magkasakit muna bago alagaan ang sarili. Ugaliing kumain ng masusustansiyang pagkain at uminom din ng bitamina nang sa gayun ay makasisiguro tayong malakas ang ating resistensiya.

3. MAG-STOCK NG PAGKAIN. Mahirap mamalengke o mag-grocery kapag umuulan, bukod sa hassle dahil basa at ‘messy’ ang mga daan, mahirap din naman ang labas nang labas dahil nagkalat pa rin sa paligid ang nakahahawang virus. Kung may budget at time ay mamili ng mga kailangan, at iwasan na ang pakikipagsabayan sa iba.

4. IHANDA ANG EMERGENCY KIT. Siguraduhing may ‘go bag’, kung saan narito ang mga basic supply tulad ng mga de-lata, bottled water, flashlight, at ekstrang damit. Ilagay din ang mahahalagang dokumento at sapat na pera. Siguraduhing ilalagay ito sa ‘accessible’ o sa lugar na madali itong makikita at makukuha kapag may hindi magandang pangyayari o sakuna dulot ng panahon.

5. I-CHARGE PALAGI ANG CELLPHONE. Madalas ang brownout o pagkawala ng kuryente kapag ganitong tag-ulan. Huwag hayaang ma-‘deadbatt’ o mawalan ito ng battery dahil malaking bagay ang telepono o cellphone kapag may emergency. Gayundin, i-charge ang power bank, flashlight at iba pang kapaki-pakinabang na bagay.

6. PALAGING MAKINIG NG BALITA. Ugaliing tumutok palagi sa balita nang sa gayun ay palaging updated sa mga kaganapan sa paligid. Makabubuti na alam natin ang mga nangyayari para alam din natin ang mga hakbang na ating gagawin sakaling may aksidente.

Sa panahon ngayon, kailangan na palagi tayong handa sa mga puwedeng mangyari. Bukod sa pagsunod sa mga health protocols para manitiling COVID-free, dapat ready din sa epekto ng panahon. Tandaan, iba pa rin ang may alam. Gets mo?

Mga nanay at tatay, para sa inyo ‘to! TIPS PARA ‘DI MAADIK SA GADGETS ANG MGA ANAK

ni Justine Daguno - @Life and Style | May 31, 2021

Habang tumatagal, mas tumataas pa ang bilang ng mga tao na nahuhumaling sa teknolohiya, partikular ang kabataan. Marahil, isa na rin sa mga epekto ng pandemya kung saan pinagbabawalan silang lumabas kung hindi importante ang gagawin, kung kaya’t umaasa na lang sa mga ganap gamit ang social media. Pero lahat ng sobra ay hindi maganda, ang madalas na paggamit ng teknolohiya ay maaaring magkaroon ng masamang epekto sa pisikal na aspeto, maging sa lifestyle ng mga ito.

Kaya naman, narito ang ilan sa mga dapat gawin upang matulungan ang kabataan na makontrol ang paggamit ng social media o gadget:

1. MAGING HALIMBAWA. Bago pagsabihan ang mga bata na ‘wag ma-adik sa gadget, siguraduhin munang kontrolado rin ang sarili pagdating sa bagay na ‘to. ‘Ika nga, lahat ng ginagawa ng matanda ay tama sa mata ng bata, kaya maging mabuting halimbawa.

2. BAGUHIN ANG SISTEMA. Kung kinakailangang baguhin ang nakasanayan ay gawin ito. ‘Wag iasa ang lahat ng galaw sa gadget, mas maraming kapaki-pakinabang na bagay o gawain bukod sa paglaan ng buong oras sa social media. Hikayatin silang magbasa ng libro, maglaro ng board games, mag-aral magluto at marami pang iba.

3. ‘WAG ITONG GAWIN ACCESSIBLE. Kailangang magkaroon ng disiplina ang mga kabataan sa paggamit ng teknolohiya. ‘Wag silang i-spoil, maglaan ng tamang panahon kung kailan lamang maaaring gumamit nito. Ipaintindi na hindi sa lahat ng oras ay gadget lamang ang kanilang hawak.

4. TULUNGAN SILANG MAG-EXPLORE. Sa totoo lang, marami talaga tayong puwedeng ma-discover sa pamamagitan ng ‘internet’, pero hindi lamang ito ang bagay na puwedeng pagkunan ng mga bagong ideya. Bagama’t mas accessible nga naman, mas exciting pa rin kapag nag-explore sa ibang bagay. Sikaping magkaroon ng ‘quality time’ kasama sila nang sa gayun ay mas magabayan pa.

Totoo namang malaking bagay ang gadget, lalo pa’t limitado lamang ang mga puwedeng pagkaabalahan sa panahon ngayon pero dapat matutunan ng mga bata na hindi lamang ito ang mga bagay na kanilang magagawa. ‘Wag natin hayaan na tuluyan nila itong gawing mundo dahil may mas makabuluhang buhay pa sa labas ng social media. Gets mo?