Panahon sa mundo na hayop ang turing sa tao dahil sa kamangmangan

ni Sr. Socrates Magnus II - @Karunungang Lihim| August 24, 2020

Bigyang-daan natin ang pagpapatuloy sa pagtalakay ng mga bagay na kailangang gawin ng tao, may COVID-19 pandemic man o wala.

Sa nakaraang isyu, naitanong natin, minsan bang ang mga tao sa mundo ay hindi alam ang sinabi ni Albert Einstein na “Do not be afraid to ask questions,” kung saan sila ay alipin lang at walang karapatan magtanong? Taga-sunod lang ba sila at hindi puwedeng magbigay ng sariling opinyon?

May panahon ba sa kasaysayan na ang tao ay nawala ang pagiging tao, kumbaga, ang kanyang dignidad at dangal ay nawala rin, ang kanyang kalayaan at personal na karapatan ay wala sa kanya?

Ito ang panahon ng monarkiya at panahon na ang naghahari ay Simbahan. Tinatawag ito sa kasaysayan na “Dark Ages.” Kung ano ang sabihin ng Simbahan, ‘yun ang katotohanan at kung ano ang idikta nito, kailangan itong sundin ng mga tao. Ang umangal ay hindi makakapasok sa kaharian ng langit, kumbaga, sa impiyerno ang destinasyon ng mga susuway at kukuwenstiyon sa kagustuan ng Simbahan.

Okey lang sana kung hindi sa langit mapunta o impiyerno ang lugar para sa kanila dahil ito ay mangyayari pa lang naman kapag sila ay namatay.

Ang napakasakit ay ‘yung ang buhay pa sila at kapag sila’y palatanong, idedeklara silang mga rebelde, kusa silang iiwasan na para bang sila ay may nakakahawang karamdaman. Mawawalan sila ng mga kaibigan at mahal sa buhay.

May mga bansa naman na ang naghahari ay ang monarkiya kung saan hari mismo ang masusunod at ang mga tao ay alipin at tagasunod lang at parurusahan ang susuway sa utos ng hari. May pagkakataong ipapalamon pa sila sa gutom na mga leon.

Marami ang ikinukulong sa kulungan ng kadiliman. Ang kadiliman ay hindi sa kadiliman sa hell kundi sa iisang selda na hindi napapasok ng liwanag. Ang nakakatakot pa ay nakakulong na nga, nakakadena pa ang mga paa at kamay.

Marami rin ang ipinatapon sa isang lugar kung saan walang pagkain, tao at ang makakasalumuha lang ay ang mababangis na hayop.

Sa pangalan pa lang, talagang madilim ang naging kalagayan ng mundo dahil ito ay tinatawag na “Dark Age.” Sa Dark Age, ang mga tao ay nabubuhay sa kamangmangan, hindi marunong bumasa at sumulat ang mga tao, kaya masasabing nawala ang kanilang pagkatao at natulad sila sa mga hayop na hindi rin marunong magbasa at magsulat.

Ang lahat ay naghahanapbuhay, hindi para sa kanilang sarili kundi para sa monarkiya, hari at Simbahan. May natitira man sa kita ng kanilang pagtatanim, ang mga ito ay sapat lang para sa kanilang mga pagkain at personal na pangangailangan.

Ang malaking bahagi ay mapupunta sa hari at Simbahan. Ang masaklap pa ay sa hanay ng mga angat sa buhay, angat lang sila dahil dumidikit sila sa mga namumuno sa kaharian at Simbahan, pero ang kanilang mga ari-arian o lupa ay pag-aari ng kanilang dinidikitan.

Kaya kung susumahin, sa kalagayan ng mga tao sa panahon ng Dark Age, ang sinabi ni Einstein “Do not be afraid to ask questions” ay hindi umiiral. Ang tao ay hindi tao dahil nawala ang kanilang pagkatao.

Itutuloy

Pagkakaroon ng lakas ng loob na magtanong, dahilan kaya naging moderno ang mundo

ni Sr. Socrates Magnus II - @Karunungang Lihim| August 21, 2020

Bigyang-daan natin ang pagpapatuloy ng pagtalakay sa mga bagay na kailangang gawin ng tao, may COVID-19 pandemic man o wala.

Sa larangan ng medisina, gamit na gamit ang sinabi ni Albert Einstein na “Do not be afraid to ask questions,” dahil tanggap ng mga dalubhasa na sa pamamagitan nito, nakakatuklas ng mga gamot at paraan para matulungan ang mga nagkakasakit.

Kumbaga, hindi humihinto ang mga eksperto sa paghahanap ng lunas o gamot sa mga karamdamang dumadapo sa tao. May ilang doktor na ayaw na ng mga katagang ito at sila ang mga doktor na papalaos na tulad ng mga halaman na hindi na lumalago.

Ang “Do not be afraid to ask questions,” ay katumbas ng “Keep on learning” dahil ang mundo ay isang malaking eskuwelahan na nagsasabing hindi sa paaralan natatapos ang pag-alam ng mga karunungan at bagong kaalaman.

Mayroon ding ilan na isinabuhay na sapat ang natutunan sa loob ng silid-aralan kaya ayaw na ng katagang ito at sila ang mga taong papaurong.

Alalahanin natin na kaya papaunlad nang papaunlad ang mundo ay dahil sa sinabing ito Einstein na niyayakap ng mananaliksik at manunuklas. Kaya kapag wala ito sa buhay, isip at puso nila, ang mundo ay walang pag-asenso.

Hindi naman para lang din sa mga mananaliksik at manunuklas ang magtanong nang magtanong dahil kahit naman sa isang tao, napakahalagang sikreto ito ng pagkakaroon ng progreso.

Sa totoo lang, ang mga taong naging matagumpay, ito ang kanilang isinabuhay. Sila rin na kasalukuyang nagtatagumpay ngayon, kapag sila ay ating tinanong, ang sasabihin nila na ang sinabing ito ni Einstein ang gumabay sa kanila kaya patuloy silang tumatamasa ng tagumpay.

Kaya hindi naman mahirap malaman kung sino ang magkakaroon ng successful life, dahil sino pa nga ba ang mga ito kundi ang taong palatanong.

Sino naman ang mga bigo sa buhay? Sino pa nga ba kundi ang hindi na nagtatanong.

Sino kaya ang mabibigo pa lang? Eh, ‘di ang mga ayaw magtanong.

Tulad ng nasabi na, ang sinabing “Do not be afraid to ask questions,” ang nagdala sa mundo kung saan tayo nananatili ngayon na ang lahat ay moderno na.

Mayroon ba sa kasaysayan ng mundo na ang tao ay hindi naisabuhay ang mga katagang ito?

Nangyari ba sa ating kasaysayan kung saan ang tao ay ayaw magtanong, na ang pagtatanong ay kanilang kinalimutan, na kung ano sila ay ‘yun na sila, na sila ay nabubuhay lang dahil sila ay tao pero hindi nagtatanong?

Kung mayroon, kailan ito nangyari? Ano ang kanilang naging sitwasyon? Gayundin, paano naging moderno ang mundo kung saan ang mga tao ay inasabuhay ang “Do not be afraid to ask questions”?

May kinalaman kaya sa kasaysayang ito ng mundo ang kasaysayan ng medisina, sakit, salot at kamatayan?

Totoo bang nagalit si God dahil ang mga tao ay hindi na isinabuhay ang mga salitang ito?

Ito ang ating pag-uusapan – ang kasaysayan ng tao na may kaugnayan sa nararanasan natin ngayon kung saan milyun-milyon na ang nagkakasakit at patuloy ang paglobo ng bilang ng mga namamatay.

Itutuloy

Pagiging palatanong ng bata, iba’t iba ang resulta sa kanilang pagtanda

ni Sr. Socrates Magnus II - @Karunungang Lihim| August 19, 2020

Bigyang-daan natin ang pagpapatuloy sa pagtalakay ng mga bagay na kailangang gawin ng tao, may COVID-19 pandemic man o wala.

“Do not be afraid to ask questions,” tulad ng nasabi sa nakaraang isyu, ito ang naging gabay ni Albert Einstein sa kanyang buhay, kaya siya ay kinilala bilang may pinakamalakas na impluwensiya sa larangan ng siyensiya at sa buong mundo kung ang pag-uusapan ang mas pinaniwalaan ng maraming pinuno ng mga bansa.

Ayon sa kasaysayan, hinihimok si Einstein na mamuno sa United Nations pero tinanggihan niya ito. Naitala rin sa kasaysayan na siya ay pinipilit na maging presidente sa Israel, pero ito ay mahigpit niya ring inayawan. Kung sa iba in-offer ang once in a lifetime opportunity na ito, tiyak na kanila itong susunggaban.

Pero si Einstein ay hindi. Wala siyang balak mamuno sa kahit anong bansa. Marahil, ang gusto lang niya ay magtanong nang magtanong tulad ng kanyang sinabi na “Do not be afraid to ask questions.” Nakakatuwa at nakakamangha na mayroon palang mas gusto ang magtanong kaysa sa iba pang bagay sa mundo.

Pero ang hindi nakakatuwa na masasabing side effect, kumbaga, sa pag-inom ng mga gamot, ang sinabi niyang ito ay ginagamit ng mga misis at girlfriend kapag nagseselos na may nararamdamang may masamang ginawa ang kanilang mahal.

Tanong nang tanong at parang nag-iimbestiga, tapos tanong pa rin nang tanong kahit sinasagot sila nang tama pero naiirita lang. Tapos, ‘pag nagtanong at sinagot ulit, ganu’n na naman ang nangyayari kahit alam niyang mahal na mahal naman siya ng kanyang kasintahan o asawa.

May makikita rin tayong mga bata na habang lumalaki ay tanong nang tanong sa kanilang mga magulang at kapamilya. Kahit nasagot na, hindi sila nauubusan ng tanong, kung saan ang ganitong musmos na bata ay larawan ni Einstein noong siya ay bata pa.

May anak ka bang tanong nang tanong? Huwag kang maiirita, sa halip ay matuwa ka dahil ayon sa mga sikolohista, ang ganitong bata ay aani ng karangalan at pagkilala sa kanyang pagtanda.

Samantala, may mga tanong nang tanong pero alam naman ang sagot sa kanyang katanungan. Ayon sa mga eksperto, ito naman ay ang mga taong walang mararating sa buhay dahil inuuna ang pagyayabang at kahambugan.

Gayundin, may mga tanong nang tanong pero ayaw namang ilantad ang kanilang mga tanong, kumbaga, sinasarili lang at hindi mo malaman kung mahiyain o ano. Ayon sa mga sikolohista, darating ang sandali sa kanilang buhay na siya ay kikilalanin na may natuklasang bago at kakaibang paniniwala na huhubog sa kaisipan ng tao sa buong mundo.

Mayroon ding tanong nang tanong pero ayaw sabihin o ipaalam kung ano ang kanyang mga tanong. Sa kanyang pagtanda, ayon din sa mga sikolohista, siya ay magtatayo ng sarili niyang relihiyon.

Pero mas marami ang pangkaraniwan lang, nagtatanong nang simple ang mga tao na kadalasan ay tungkol lang sa kanilang personal na interes. Ayon sa mga sikohista, sila ay mga tagasunod sa lipunan, pero may babala na kapag ang kanilang personal na interes ay nasaling, nahadlangan o tinanggal ang mga bagay na kinakapitan ng kanilang personal na ligaya, sila ay magrerebelde at tiyak na babaguhin nila ang gobyernong hindi nakapagbigay ng kanilang personal na saya at ligaya.

Itutuloy